ភ្នំពេញៈ ជនសង្ស័យម្នាក់ ត្រូវបានប្រជាពលរដ្ឋដេញព័ន្ធចាប់ខ្លួនបានភ្លាមៗ រួចប្រគល់ជូនសមត្ថកិច្ចដាក់ខ្នោះ ក្រោយធ្វើសកម្មភាពលួចម៉ូតូបានសម្រេចហើយ តែឆ្កែព្រុសផ្អើល ម្ចាស់ចេញមកឃើញ ស្រែកឲ្យអ្នកជួយដេញចាប់។
ករណីនេះ កើតឡើងកាលពីវេលាម៉ោង១១៖២០នាទីព្រឹកថ្ងៃទី១៥ ខែកុម្ភៈ ឆ្នាំ២០១៩ ស្ថិតនៅក្នុងភូមិត្រពាំងល្វា សង្កាត់កាកាប១ ខណ្ឌពោធិ៍សែនជ័យ។
ជនសង្ស័យឈ្មោះ យិន ដា ភេទប្រុស អាយុ២២ឆ្នាំ មុខរបរ មិនពិតប្រាកដ យកផ្ទះសំណាក់៣ដុល្លារ ម្តុំភូមិត្រពាំងថ្លឹង សង្កាត់ចោមចៅ១ ធ្វើជាកន្លែងស្នាក់អាស្រ័យ មានស្រុកកំណើត ភូមិចាម ឃុំអ្នកលឿង ស្រុកពាមរក៍ ខេត្តព្រៃវែង ។ ម្ចាស់ម៉ូតូឈ្មោះ បាន ធួន ភេទស្រី អាយុ២៨ឆ្នាំ មុខរបរកម្មកររោងចក្រ ស្នាក់នៅបន្ទប់ជួលជាន់ទី១ កន្លែងកើតហេតុ មានស្រុកកំណើត ភូមិប្រាសាទ ឃុំកំពែង ស្រុកគីរីវង្ស ខេត្តតាកែវ។ ម៉ូតូដែលជនសង្ស័យលួចម៉ាក ស៊ុយសូគីនិច ពណ៌ស សេរីឆ្នាំ២០១៨ ពាក់ស្លាកលេខ តាកែវ 1Q-4368 ។
នារីជាម្ចាស់ម៉ូតូ បានប្រាប់ឲ្យដឹងថា កាលពីយប់មិញ នាងបានយល់សប្តិ «ឃើញជំនាងផ្ទះមកប្រាប់ថា ប្រយ័ត្នចោរលួចម៉ូតូបាត់» ក្រោយពីសុបិនឃើញអាក្រក់បែបនេះ ធ្វើឲ្យនាងបង្កើនការប្រុងប្រយ័ត្ន លុះពេលចេញពីធ្វើការរោងចក្រ ចតទុកដាក់ចាក់សោក រួចឡើងទៅបន្ទប់ជាន់ទីមួយហូបបាយ ស្រាប់តែនៅវេលាម៉ោងខាងលើ ឮសូរសំឡេងឆ្កែព្រុសប្លែក រួមផ្សំនឹងអារម្មណ៍នឹកឃើញពេលយល់សប្តិផង ក៏ស្ទុះចេញមកមកអើតមើល ស្រាប់តែឃើញជនសង្ស័យ កាច់សោកម៉ូតូបានហើយ ឡើងជិះរៀបបើកចេញ ស្រែកឆោឡោផ្អើលអ្នកជិតខាងជួយចេញមកព័ទ្ធចាប់បាន ប្រគល់ជូននគរបាលប៉ុស្ដិ៍កាកាបទី១។
បច្ចុប្បន្នជនសង្ស័យ ត្រូវបានសមត្ថកិច្ចឃាត់ខ្លួននាំទៅប៉ុស្តិ៍កាកាប១ ដើម្បីកសាងសំណុំរឿងបញ្ជូនទៅផ្នែកជំនាញអធិការដ្ឋានបន្តតាមនីតិវិធី៕