√ ធ្លាយវីដេអូ ប៉ូលិសចរាចរណ៍ខណ្ឌទួលគោក ផាកពិន័យ មិនចេញវិក្កយបត្រ យកលុយដាក់ហោប៉ៅ កក្រើកពេញហ្វេសប៊ុក អធិការខណ្ឌបដិសេធ

ភ្នំពេញៈ អធិការដ្ឋាននគរបាលខណ្ឌទួលគោក សុំធ្វើការបំភ្លឺជូនសាធារណជនថា គ្មានករណីត្រួតពិនិត្យគ្រឿងស្រវឹង ពិន័យដោយមិនចេញវិក្កយប័ត្រឡើយ ក្រោយពីលោក សុខ ហេងអធិការដ្ឋាននគរបាខណ្ឌទួលគោក បានកោះប្រជុំភ្លាមៗ ដើម្បីពិនិត្យកងកម្លាំង ដែលចុះប្រតិបត្តិនោះ បានប្រព្រឹត្តិការដូចគេចោទ ឬអត់ តែក្រោយពីបានសាកសួរ ពុំមានឡើយ ហើយបើមាន នឹងចាត់វិធានការអនុវត្តវិន័យ តាមបទបញ្ជាលេខ ០០៦ ប.ប.ជ របស់ក្រសួងមហាផ្ទៃ ដោយពុំមានការអត់ឱនអោយឡើយ។

គួរបញ្ជាក់ថា កាលពីវេលាយប់ថ្ងៃសៅរ៍ ទី៩ ខែកុម្ភៈ ឆ្នាំ២០១៩នេះ មានការបែកធ្លាយវីដេអូ ដែលមានបុរសម្នាក់ Live ផ្ទាល់ សកម្មភាពសមត្ថកិច្ចខណ្ឌទួលគោក ដាក់គោលដៅត្រួតពិនិត្យអាវុធជាតិផ្ទុះ នៅផ្លូវ២៧១ មុខវិទ្យាល័យជាស៊ីមសាមគ្គី ធ្វើការផាកពិន័យ មិនចេញវិក្កយបត្រ ហើយយកលុយដាក់ហោប៉ៅ រួចអោយអ្នកល្មើសចរាចរណ៍ទាំងនោះ បត់ត្រឡប់ក្រោយ កំពុងកក្រើកពេញបណ្ដាញសង្គមយ៉ាងខ្លាំង ព្រោះចាប់អ្នកអត់ពាក់មួកសុវត្ថិភាព អត់ដាក់កញ្ចក់ ដឹកលើសចំនួនមនុស្ស អ្វីដែលធ្វើឲ្យភ្ញាក់ផ្អើលនោះ គឺប៉ូលិសចរាចរណ៍មិនបានចេញនៅវិក្កយបត្រឲ្យទៅជនល្មើចរាចរណ៍នោះទេ។ ក្រោយពេល Live ផ្សាយផ្ទាល់ បានប្រហែល៥នាទី ស្រាប់តែកម្លាំងអធិការដ្ឋានខណ្ឌទួលគោក នាំគ្នារើប៉ារ៉ាសចេញអស់ ឈប់ត្រួតពិនិត្យមុនម៉ោងកំណត់ ដោយមិនដឹងមូលហេតុ។

ក្រោយពីបែកធ្លាយវីដេអូនោះ អគ្គស្នងការរង និងជាស្នងការនគរបាលរាជធានីលោកឧត្តមសេនីយ៍ឯក ស ថេត បានដាក់បទបញ្ជាអោយអធិការដ្ឋាននគរបាលខណ្ឌទួលគោក សាកសួរមន្រ្តីនគរបាលក្រោមឱវាទ ថា បានពិន័យពលរដ្ឋ ដោយមិនចេញវិក្កយប័ត្រ ដូចពលរដ្ឋផ្សាយតាមហ្វេសប៊ុកមែន ឬអត់។

បើតាមរបាយការណ៍ប្រជុំ របស់អធិការដ្ឋាននគរបាលខណ្ឌទួលគោក បានឲ្យដឹងថា វេលាម៉ោងប្រហែល១០យប់ ថ្ងៃទី៩ ខែកុម្ភៈ ឆ្នាំ២០១៩ កម្លាំងរបស់អធិការដ្ឋាននគរបាលខណ្ឌទួលគោក បានប្រតិបត្តិការត្រួតពិនិត្យ អាវុធជាតិផ្ទុះ និងជាតិស្រវឹង នៅចំណុចមុខវិទ្យាល័យ ជាស៊ីម សាមគ្គី ផ្លូវលេខ២៧១ សង្កាត់បឹងសាឡាង ខណ្ឌទួលគោក រាជធានីភ្នំពេញ ខណៈពេលដែលយើងកំពុងប្រតិបត្តិការ ស្រាប់តែមានប្រជាពលរដ្ឋ ដែលបើកបរម៉ូតូដោយសង្ស័យមានពិសាជាតិស្រវឹង សមត្ថកិច្ចបានហៅអោយឈប់ ហើយធ្វើការវាស់ជាតិអាល់កុល មានពីរនាក់ ដែលម្នាក់មានជាតិស្រវឹង ០,២៥mg/L និងម្នាក់ទៀត មានជាតិស្រវឹង ០,៣៩mg/L សមត្ថកិច្ចបានធ្វើការអប់រំ និងបានធ្វើការផាកពិន័យ ដោយបានចេញវិក្កយបត្រត្រឹមត្រូវ ហើយមានប្រជាពលរដ្ឋ បានបង្ហោះព័ត៌មានមួលបង្កាច់ដល់កម្លាំងខុសពីការពិត។ នៅក្នុងប្រតិបត្តិការនេះ ពុំមានកម្លាំងណាម្នាក់ យកលុយ ឬធ្វើការផាកពិន័យដោយខុសច្បាប់ឡើយ។

ក្រោយសាកសួរ អធិការដ្ឋាននគរបាលខណ្ឌទួលគោក លោក សុខ ហេង បានអះអាងថា គ្មានករណីត្រួតពិនិត្យគ្រឿងស្រវឹងពិន័យដោយមិនចេញវិក្កយបត្រឡើយ។

ក្រោយពីលេចលឺដំណឹងពុករលួយនេះ ចែកចាយបន្តគ្នាកក្រើកបណ្ដាញសង្គមនោះ នៅវេលាម៉ោង៩យប់ថ្ងៃអាទិត្យ ទី១០ ខែកុម្ភៈ ឆ្នាំ២០១៩ លោក ឯក ឃុនដឿន អភិបាលខណ្ឌទួលគោក និងជាប្រធានគណៈបញ្ជាការឯកភាពខណ្ឌទួលគោក បានដឹកនាំកម្លាំងចុះអនុវត្ត និងពង្រឹងច្បាប់ចរាចរណ៍ផ្លូវគោក ឆែកឆេរអាវុធ ត្រួតពិនិត្យជាតិអាកុល នៅតាមបណ្តោយផ្លូវលេខ២៧១ សង្កាត់ទឹកល្អក់ទី៣ មុខផ្សារហេងលី ស្ថិតក្នុងសង្កាត់ទឹកល្អក់៣ ខណ្ឌទួលគោក រាជធានីភ្នំពេញ។

ទស្សនាវីដេអូដែលបុរសខាងលើ Live ផ្ទាល់ រហូតដល់សមត្ថកិច្ចការរើប៉ារ៉ាស់ចេញ និងឈប់ត្រួតពិនិត្យមុនម៉ោងកំណត់ នេះទុកឲ្យប្រិយមិត្តទស្សនាវហើយ វិនិច្ឆ័យដោយខ្លួនឯងចុះ ៖