ភ្នំពេញៈ ក្រុមក្មេងស្ទាវមានគ្នាជិត២០ម៉ូតូ ដេញកាប់យុវជន៣នាក់ ជិះម៉ូតូមួយគ្រឿង ម៉ាក ICON បណ្ដាលឲ្យយុវជនម្នាក់ ដាច់សរសៃដៃទាំងពីរ ដេកដួលក្នុងថ្លុកឈាម និង២នាក់ រងរបួសរត់គេចខ្លួនបាត់។
ករណីក្មេងទំនើងដេញកាប់គ្នាយ៉ាងសាហាវដូចរឿងហុងកុងនេះ បានកើតឡើងនៅវេលាម៉ោង១៖៤០នាទីរំលងអធ្រាត្រឈានចូលថ្ងៃទី៨ ខែកុម្ភៈ ឆ្នាំ២០១៩នេះ នៅត្រង់ចំណុចជិតសណ្ឋាគារស្រែលាភ លើកំណាត់ផ្លូវលេខ៦១៤ ស្ថិតក្នុងសង្កាត់បឹកកក់ទី២ ខណ្ឌទួលគោក រាជធានីភ្នំពេញ។
យុវជនរងគ្រោះមិនទាន់ស្គាល់អត្តសញ្ញាណនោះទេ ជិះម៉ូតូ Honda ICON ពណ៌ត្រួយចេក ពាក់ស្លាកលេខភ្នំពេញ 1AR-5338 បានរងរបួសធ្ងន់ ដេកស្ដូកស្ដឹងក្នុងថ្លុកឈាម ត្រូវបានរថយន្តគិលានសង្គ្រោះគ្លីនិកឯកជន "ហុងហាក់" ដាក់អុកស៊ីហ្សែន ដឹកយកទៅសង្គ្រោះនៅឯមន្ទីរពេទ្យ។
ប្រភពព័ត៌មានពីអ្នកភូមិបានរៀបរាប់ប្រាប់ឲ្យភ្នាក់ងារសារព័ត៌មាន ខេមប៉ុស្តិ៍ ដឹងថា មុនពេលកើតហេតុ គេឃើញយុវជន៣នាក់ ជិះម៉ូតូមួយគ្រឿង ម៉ាក Honda ICON ពណ៌ត្រួយចេក ពាក់ស្លាកលេខភ្នំពេញ 1AR-5338 ឌុបគ្នា ធ្វើដំណើរតាមបណ្ដោយផ្លូវបេតុង ចូលមកដល់ចំណុចកើតហេតុខាងលើ ក៏បានជួបក្រុមក្មេងស្ទាវមួយក្រុមទៀត មានគ្នាជាច្រើននាក់ជិះម៉ូតូជិត២០គ្រឿង ប្រដាប់ដោយកាំបិត និងដាវសាម៉ូរ៉ៃ ហើយមិនដឹងមានរឿងអ្វីនោះទេ ស្រាប់តែនាំគ្នាដេញកាប់យុវជនទាំង៣នាក់នោះ ហើយយុវជនទាំង៣នាក់ ក៏បានស្រែកសួរថា មានរឿងអីបង? ហើយបន្តិចក្រោយមក ក៏លាន់លឺសំឡេងប្រ៉ាវ ប្រហែលជាដួលម៉ូតូ ហើយលឺសំឡេងស្រែកថា "បងប្អូនអើយជួយខ្ញុំផង គេកាប់ខ្ញុំហើយ ជួយខ្ញុំផង" ហើយក៏ស្ងាត់ទៅវិញ។
ប្រភពបន្តថា ហើយក៏លឺសំឡេងក្រុមក្មេងស្ទាវទាំងនោះ ស្រែកថា "ពួកហ៊ែងតាមវា អាពីរនាក់នោះរត់ទៅតាមនោះហើយ" ហើយក៏លឺសំឡេងម៉ូតូជាច្រើនគ្រឿង និងសំឡេងជើងមនុស្សរត់ជាច្រើននាក់ ដេញតាមកាប់យុវជន២នាក់ កំពុងនាំគ្នារត់នោះ ដោយមិនដឹងថា កាប់ត្រូវកន្លែងណាខ្លះ ព្រោះពេលក្រុមក្មេងស្ទាវទាំងនោះ នាំគ្នាជិះម៉ូតូចេញទៅវិញអស់ មានអ្នកភូមិចេញមកមើលឃើញ ព្រោះឃើញមានឈាមដាបទាំងថ្លុកនៅក្បែរម៉ូតូជនរងគ្រោះ និងស្នាមឈាមតក់ពេញកន្លែងកើតហេតុ ប្រហែលជាត្រូវរបួសដែរហើយ តែមិនឃើញយុវជនទាំង២នាក់នោះ ចំណែកឯយុវជនម្នាក់ទៀត គឺឃើញរងរបួសធ្ងន់ ត្រូវដៃទាំងសងខាង ដេកស្ដូកស្ដឹងក្នុងថ្លុកឈាមប៉ុណ្ណោះ ទើបអ្នកភូមិរាយការណ៍ប្រាប់សមត្ថកិច្ចឲ្យចុះមកកន្លែងកើតហេតុ និងទាក់ទងរករថយន្តសង្គ្រោះបន្ទាន់ អោយមកយកជនរងគ្រោះទៅសង្គ្រោះសិន។
មួយសន្ទុះក្រោយមក គេឃើញមានរថយន្តគិលានសង្គ្រោះមួយគ្រឿង របសគ្លីនិកឯកជន "ហុងហាក់" មកដល់កន្លែងកើតហេតុ រួចប្រញាប់មើលស្ថានភាពយុវជនរងគ្រោះ នៅអាចជួយសង្គ្រោះបាន ទើបលើកឡើងលើរថយន្តដាក់អុកស៊ីហ្សែន រួចដឹកយកទៅសង្គ្រោះនៅឯមន្ទីរពេទ្យភ្លាមៗផងដែរ។
ក្រោយកើតហេតុ សមត្ថកិច្ចមូលដ្ឋានបានចុះមកដល់កន្លែងកើតហេតុ រួចធ្វើការសាកសួរប្រជាពលរដ្ឋ និងធ្វើកំណត់ហេតុទុក រួចយកម៉ូតូជនរងគ្រោះ ទៅរក្សាទុកបណ្ដោះអាសន្ននៅប៉ុស្តិ៍នគរបាលបឹងកក់ទី២ ដើម្បីរង់ចាំភាគីខាងរងគ្រោះ យកឯកសារពាក់ព័ន្ធមកបញ្ជាក់ រួចប្រគល់ជូនវិញ និងរង់ចាំអោយភាគីរងគ្រោះដាក់ពាក្យបណ្ដឹង ដើម្បីធ្វើការស្រាវជ្រាវ រកបក្ខពួកក្រុមជនដៃដល់ទាំងនោះ យកមកផ្ដន្ទាទោសតាមផ្លូវច្បាប់៕
