កណ្តាលៈ លោកវរសេនីយ៍ឯក អុល ប៊ុណ្ណា ស្នងការរងនគរបាលខេត្តកណ្តាល ប្រើសិទ្ធអំណាចយកឡានទឹកក្រសួងមហាផ្ទៃ២គ្រឿង ដឹកទឹកមកធ្វើសំណង់សង់ផ្ទះឯកជន នៅឃុំត្រើយស្លា ឃុំត្រើយស្លា ស្រុកស្អាង ខេត្តកណ្តាល ធ្វើអោយមហាជននាំគ្នារិះគន់គ្រប់គ្នា។
តាមសេចក្តីរាយការណ៍ពីប្រជាពលរដ្ឋ បានឲ្យដឹងថា ឡានដឹកទឹកចំនួន២គ្រឿង បិទស្លាកអក្សរក្រសួងមហាផ្ទៃថ្មីស្រឡាង ដឹកទឹកមកផ្គត់ផ្គង់ធ្វើសំណង់ឯកជនខាងលើនេះ ចាប់តាំងពីព្រឹកថ្ងៃទី១៩ ម្សិលមិញមកម្លេះ ធ្វើប្រជាពលរដ្ឋមានការរិះគន់គ្រប់គ្នាថា ឡានទឹករបស់រដ្ឋសម្រាប់ការពារទប់ស្កាត់ឧប្បត្តិហេតុភ្លើងឆេះអ្វីមួយ គឺបម្រើប្រជាពលរដ្ឋទូទៅប៉ុណ្ណោះ មិនតម្រូវអោយបម្រើការងារឯកជននោះទេ។ បែរជាមានបុគ្គលមានអំណាចប្រើសិទ្ធិយកឡានពន្លត់អគ្គិភ័យរបស់ក្រសួងមហាផ្ទៃមកធ្វើយ៉ាងដូច្នេះទៅវិញ។
ប្រជាពលរដ្ឋបានបន្តថា ផ្ទះប្រជាពលរដ្ឋ ដែលមានជួបឧប្បត្តិហេតុ ដោយអគ្គីភ័យនាពេលកន្លងមកមិនសូវឃើញមានឡានទឹកមកធ្វើការពន្លត់ទាន់ពេលវេលានោះទេ ទុកទាល់តែឆេះអស់ ទើបមកដល់ ហើយពេលខ្លះក៏មានការតថ្លៃគ្នាទៀតផង ប៉ុន្តែបើអ្នកមានលុយមានអំណាចវិញ ពួកគេរហ័សរហួនយ៉ាងយកចិត្តទុកដាក់បំផុត ហើយថែមទាំងយកឡានទឹករបស់រដ្ឋមកបម្រើផ្ទាល់ខ្លួនទៀតផង ជាក់ស្តែងដូចជាករណីខាងលើនេះអ៊ីចឹង។
ការលើកឡើងរបស់ប្រជាពលរដ្ឋនេះ ដើម្បីអោយមន្រ្តីថ្នាក់លើដឹងឮ ធ្វើការកែតម្រូវទៅដល់មន្រ្តីខិលខូចថ្នាក់ក្រោមផង ដើម្បីកុំអោយខូចឈ្មោះស្ថាប័ន និងមន្រ្តីល្អៗដទៃទៀត៕
