Monday, February 11, 2019

បាត់ខ្លួនចៅស្រី មិនដឹងទៅទីណា ស្រាប់តែប្រទះឃើញសព អណ្ដែតទឹកព្រែកក្រោយភូមិ

កំពង់ចាម​:​ បន្ទាប់ពី​ទទួលបានព័ត៌ថា មានករណីបាត់ក្មេងស្រីម្នាក់​ នៅភូមិកៀនជ្រៃ​ក្នុង​ ឃុំកៀនជ្រៃ ស្រុកកំពង់សៀម​ ដោយ​មិន​ដឹង​មូលហេតុ​ នៅវេលាម៉ោង​៩និង៣០នាទី​ព្រឹក​ ថ្ងៃ​ទី​១១​ ខែ​កុម្ភៈ​ ឆ្នាំ​២០១៩​ លោក គួច​ ចំរើន​ អភិបាលខេត្តកំពង់ចាម​ បានដឹកនាំកងកម្លាំងសមត្ថកិច្ច​ជំនាញ​ ចុះទៅ​ដល់​ទីតាំង​កើតហេតុ​ភ្លាម​ៗ​ ដើម្បី​​ស្រាវជ្រាវ​យ៉ាង​យក​ចិត្ត​ទុកដាក់​ រហូត​ដល់​ម៉ោង​១១​ព្រឹក​ថ្ងៃ​ដដែល​ ស្រាប់​តែ​មាន​ប្រជាពលរដ្ឋ​បាន​ប្រទះ​ឃើញ​ក្មេង​ស្រី​រងគ្រោះនោះ​ បាន​លង់ទឹក​ព្រែក​ក្រោយ​ភូមិ​ ស្លាប់​បាត់​ទៅ​ហើយ ​។

សមត្ថកិច្ច​បាន​ឲ្យដឹងថា​ ក្មេងស្រី​រងគ្រោះ​មាន​ឈ្មោះ​ ចំរើន សុខជា​ អាយុ៥ឆ្នាំ​ សព្វថ្ងៃរស់នៅជាមួយលោកយាយ-លោកតា​ នៅឯភូមិកើតហេតុខាងលើ​ ដោយឪពុក​ចិញ្ចឹម​ឈ្មោះ ស្រ៊ាន ចំរើន និងម្តាយឈ្មោះ ធី សុខឡូត​ មានមុខរបរ​រកស៊ី​ នៅ​រាជធានី​ភ្នំពេញ ​។

សមត្ថកិច្ច​បាន​បន្ត​ថា​ ករណីនេះ បានកើតឡើងនៅវេលាម៉ោង៦ល្ងាច ថ្ងៃទី១០ ខែកុម្ភៈ ឆ្នាំ២០១៩ ​ដោយ​បាត់ខ្លួនចៅស្រី មិនដឹងជាទៅទីណា ក៏ឆោឡោស្រែកឲ្យអ្នកភូមិជួយរក​ តែរកមិនឃើញ រហូតដល់​វេលា​ម៉ោង១១​ថ្ងៃទី១១​ ខែកុម្ភៈ​ ឆ្នាំ​២០១៩នេះ​ ខណៈ​ដែល​លោក គួច​ ចំរើន​ អភិបាល​ខេត្ត​កំពង់ចាម​ បាន​ដឹកនាំ​មន្ត្រី​ជំនាញ​ពាក់ព័ន្ធ​ ចុះ​ស្រាវជ្រាវ​ដោយ​ផ្ទាល់​​ ស្រាប់​តែ​មាន​ប្រជាពលរដ្ឋ​ បាន​ប្រទះ​ឃើញ​សពក្មេង​ស្រី​រងគ្រោះ​នៅ​អណ្តែត​ទឹក​​ព្រែក​ក្រោយ​ភូមិ​ ចម្ងាយប្រមាណជា៥០ម៉ែត្រ ពីផ្ទះ​ មិន​ដឹងជា​ស្លាប់​តាំង​ពី​ពេល​ណា​នោះ​ទេ​។

ក្រោយ​ពី​សមត្ថកិច្ច​ជំនាញ​ ធ្វើ​កោសល្យវិច័យ​ ពិនិត្យ​លើរាងកាយសព​ក្មេង​ស្រី​រងគ្រោះ ដោយ​ពុំឃើញមានស្លាកស្នាមអ្វីនោះទេ ហើយ​ក៏បានប្រគល់ជូនក្រុមគ្រួសារ យកទៅធ្វើបុណ្យតាមប្រពៃណីផងដែរ ៕

Feature Ads