បាត់ដំបងៈ ដោយមានការសម្របសម្រួលលើនីតិវិធីពីលោកនួន សាន ព្រះរាជអាជ្ញាអមសាលាដំបូងខេត្តបាត់ដំបង និងស្ថិតក្រោមបញ្ជាផ្ទាល់របស់ឧត្តមសេនីយទោ អ៊ុច សុខុន ស្នងការនៃស្នងការដ្ឋាននគរបាលខេត្តបាត់ដំបង នៅថ្ងៃទី២២-២៣ ខែកុម្ភៈ ឆ្នាំ២០១៩ លោកឧត្តមសេនីយ៍ត្រី ជេត វណ្ណនី ស្នងការរងទទួលផែនព្រហ្មទណ្ឌ បានដឹកនាំកម្លាំងនគរបាលជំនាញក្នុងផែន ចូលរួមជាមួយកម្លាំងនគបាលអធិការដ្ឋាននគរបាលស្រុកថ្មគោល ស្រុកបវេល ស្រុកកំរៀង បានធ្វើការស្រាវជ្រាវករណីក្រុមក្មេងទំនើងប្រើហិង្សាលើអ្នកដទៃមានអាវុធ នៅក្នុងភូមិសាស្រ្តក្រុបាត់ដំបង កាលពីរាត្រីថ្ងៃទី ២២ ខែកុម្ភៈ ឆ្នាំ២០១៩។
ឆ្លងតាមរយៈនៃការស្រាវជ្រាវនេះ សមត្ថកិច្ចនគរបាលបានឃាត់ខ្លួនជនសង្ស័យបានចំនួន៨នាក់ ព្រមទាំងដកហូតបានវត្ថុតាងពាក់ព័ន្ធ នឹងអំពើហិង្សាបានមួយចំនួន។ ដោយប្រើប្រាស់វិធានការជំនាញលើការស្រាវជ្រាវក្នុងករណីនេះក្រុមក្មេងទំនើង ដែលប្រើអំពើហិង្សានេះ គឺមានពាក់ព័ន្ធករណីចែកកចាយគ្រឿងញៀននៅក្នុងមូលដ្ឋានទៀតផង។
រហូតមកដល់រសៀលថ្ងៃទី២៣ ខែកុម្ភៈ ឆ្នាំ២០១៩ សមត្ថកិច្ចនគរបាលនៃស្នងការដ្ឋាននគរបាលខេត្តបាត់ដំបង ដកហូតវត្ថុតាងរួមមាន ៖ ម៉ាទឹកកកចំនួន១២ថង់ (ទម្ងន់៩៤,៧៧ក្រាម) ថ្នាំគ្រាប់យ៉ាម៉ាចំនួន១៣៣គ្រាប់ ជញ្ជីងថ្លឹងថ្នាំញៀនចំនួន១ ទូរស័ព្ទចំនួន៣គ្រឿង ម៉ូតូចំនួន៣គ្រឿង កាំបិតកែច្នៃចំនួន១ដើម ដុំថ្មចំនួន៤ដុំ ស្បែកជើងចំនួន១គូ និងសម្ភារៈជក់គ្រឿងញៀនមួយចំនួន។
ជនសង្ស័យ ដែលពាក់ព័ន្ធក្នុងករណីនេះ និងវត្ថុតាងមន្រ្តីជំនាញកំពុងកសាងសំណុំរឿងបញ្ជូនទៅសាលាដំបូងខេត្តបាត់ដំបងចាត់ការតាមផ្លូវច្បាប់៕
