ភ្នំពេញៈ ទុករថយន្ដចោល នៅបរិវេណមុខផ្ទះរបស់ខ្លួន ដោយគ្មានរបងទ្វារឡើយ ដោយអាងលើកាមេរ៉ាសុវត្ថិភាព លុះភ្ញាក់ពីដំណេក ទើបដឹងថា បាត់រថយន្ដ ហើយរាយការណ៍ និងដាក់ពាក្យបណ្ដឹងនៅប៉ុស្តិ៍ទាំងព្រឹក។
ហេតុការណ៍បាត់រថយន្តនេះកើតឡើងត្រង់ចន្លោះម៉ោង២រំលងអធ្រាត្រថ្ងៃទី៩ ខែកុម្ភៈ ឆ្នាំ២០១៩ នៅចំណុចភូមិព្រែកពោធិ៍ ឃុំទឹកវិល ស្រុកស្អាង ខេត្តកណ្ដាល។
រថយន្ដដែលត្រូវចោរនោះ ម៉ាក Camry បាឡែន ពណ៌ស ឆ្នាំ២០០៣ ពាក់ស្លាកលេខភ្នំពេញ 2AK-6435 លេខតួ៖ jTDBE32K330177186 លេខម៉ាស៊ីន៖ 2AK7047352 (ម្ចាស់កម្មសិទ្ធិ ឈ្មោះ ជុំ វុត្ថា)។
តាមសម្ដីឈ្មោះ ជុំ ឡេងហាក់ ភេទប្រុស អាយុ៣៧ឆ្នាំ ជនជាតិខ្មែរ មុខរបរជាងជួសជុលរថយន្ដ មានទីលំនៅភូមិ-ឃុំកើតហេតុ បានរៀបរាប់ថា នៅថ្ងៃទី៨ កុម្ភៈ គាត់ (ជុំ ឡេងហាក់) ត្រូវជាបងបង្កើត បានខ្ចីរថយន្ដរបស់ប្អូនយកមកជិះ។ លុះដល់ម៉ោង៥ល្ងាច បានចតទុករថយន្ដ នៅបរិវេណមុខផ្ទះរបស់ខ្លួន ដោយគ្មានរបងទ្វារឡើយ ដោយអាងលើកាមេរ៉ាសុវត្ថិភាព។ លុះដល់ម៉ោង៥ព្រឹកព្រឹកភ្ញាក់ពីដំណេក ទើបដឹងថា បាត់រថយន្ដតែម្ដង ។ រួចបានរាយការណ៍ និងដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលទឹកវិល។
ករណីនេះ កម្លាំងប៉ុស្តិ៍សហការជាមួយកម្លាំងជំនាញកំពុងបន្តស្រាវជ្រាវតាមនីតិវិធី៕