ស្វាយរៀងៈ នាព្រឹកថ្ងៃទី១៤ ខែកុម្ភៈ ឆ្នាំ២០១៩ កម្លាំងនគរបាលស្នងការដ្ឋានខេត្តស្វាយរៀង ផែនអន្តោប្រវេសន៍ សហការជាមួយរដ្ឋបាលក្រុងបាវិត អធិការដ្ឋាននគរបាលក្រុងបាវិត ដឹកនាំដោយលោក លឹម សៀងហេង អភិបាលរងក្រុងបាវិត និងលោកវរសេនីយ៍ឯក ឃន តារាសម្បត្តិ ស្នងការរងទទួលផែនការងារអន្តោប្រវេសន៍ ចុះត្រួតពិនិត្យរដ្ឋបាលតាមបណ្ដាផ្ទះជួល ក្នុងភូមិបាវិតកណ្ដាល សង្កាត់បាវិត ខេត្តស្វាយរៀង។
នៅពេលចុះត្រួតពិនិត្យរដ្ឋបាលតាមបណ្ដាផ្ទះជួល បានរកឃើញជនជាតិវៀតណាម៤នាក់ ស្រី៣នាក់ ពាក់ព័ន្ធករណីជួញដូរ និងប្រើប្រាស់សារធាតុញៀន ១. ឈ្មោះ ហាយ វៀកហុង ភេទប្រុស អាយុ៦៦ឆ្នាំ, ២.ឈ្មោះ ង្វៀង ធីឡើយ ភេទស្រី អាយុ២៤ឆ្នាំ, ៣.ឈ្មោះ ប៊ួយ ធីលួ ភេទស្រី អាយុ៣៤ឆ្នាំ និង៤.ឈ្មោះ ត្រឹង ធីម៉ាយ ភេទស្រី អាយុ២៣ឆ្នាំ។
វត្ថុតាងដែលដកហូតរួមមាន ៖ ម្សៅក្រាមពណ៌សថ្លា (មេតំហ្វេតាមីនអាយ) ចំនួន៣កញ្ចប់ធំ, ថ្នាំគ្រាប់ (អ៊ិចស្តាស៊ី) ចំនួន ៤០គ្រាប់ និងទូរស័ព្ទដៃចំនួន ៥គ្រឿង។
បច្ចុប្បន្នជនសង្ស័យទាំង៤នាក់ និងវត្ថុតាង ត្រូវបានប្រគល់ឲ្យខាងជំនាញគ្រឿងញៀន ក្រុងបាវិត ដើម្បីបន្តនីតិវិធី៕