ភ្នំពេញៈ យុវតីរូបស្រស់ម្នាក់ ទំនងម្ដាយបង្ខំចិត្តឲ្យរៀបការ បានរត់គេចមិនដឹងទៅទីណា ធ្វើឲ្យម្ដាយ និងបងប្អូនភ័យខ្លាចបាត់ខ្លួន បានពឹងពាក់ឲ្យអ្នកសារព័ត៌មានជាច្រើននាក់ជួយផ្សព្វផ្សាយស្វែងរក បង្កឲ្យមានការភ្ញាក់ផ្អើលយ៉ាងខ្លាំង កាលពីវេលាម៉ោង៩យប់ ថ្ងៃអាទិត្យ ទី៣ ខែមីនា ឆ្នាំ២០១៩ ស្ថិតនៅផ្ទះជួលមួយកន្លែង ខាងក្រោយរបងកាណាឌីយ៉ា ផ្លូវវេងស្រេង ក្នុងសង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ។
យុវតីដែលគេចខ្លួនខាងលើ ឈ្មោះ អ៊ាង ស្រីមុំ អាយុ១៧ឆ្នាំ មុខរបរបុគ្គលិកលក់គ្រឿងក្រអូប នៅផ្សារបឹងត្របែកផ្លាហ្សា ខណ្ឌចំការមន ដោយស្នាក់នៅកន្លែងធ្វើការ។ ចំណែកស្ត្រីជាម្ដាយឈ្មោះ ប្រាជ្ញ សារ៉ាន់ អាយុ៤៩ឆ្នាំ មានស្រុកកំណើតនៅភូមិតាពេច ខាងជើង ឃុំរក្សជ័យ ស្រុកបាភ្នំ ខេត្តព្រៃវែង ។
បើតាមសម្ដីស្ត្រីជាម្ដាយយុវតីខាងលើ បានប្រាប់ឲ្យដឹងថា យុវតីរូបនេះនៅសល់តែ៨ថ្ងៃទៀតទេ គឺថ្ងៃទី១១ ខែមីនា ឆ្នាំ២០១៩ និងត្រូវរៀបការ តែមិនដឹងមានបញ្ហាអ្វី ស្រាប់តែបាត់ខ្លួន១ថ្ងៃ មិនដឹងដំណឹងសោះ ទើបធ្វើឲ្យរូបគាត់ជាម្ដាយមានការព្រួយបារម្ភជាខ្លាំង និងបានទាក់ទងបងប្អូនក្រុមអ្នកសារព័ត៌មានជួយផ្សព្វផ្សាយស្វែងរក។
លុះក្រោយមក រំលងបានប្រហែលជាង២ម៉ោង ស្រាប់តែលឺដំណឹងពីវិទ្យុ ABC ថា យុវតីខាងលើបានគេចខ្លួនពីម្ដាយ និងសុំទៅស្នាក់នៅបណ្ដោះអាសន្ន ទើបធ្វើឲ្យស្ត្រីជាម្ដាយធ្វើដំណើរស្កាត់ទៅជួបកូនស្រីទាំងយប់តែម្ដង។ តែមិនដឹងថា យុវតីខាងលើមានបញ្ហាអ្វីឲ្យពិតប្រាកដនោះទេ បែរជាមិនព្រមជួបម្ដាយរបស់គេ ថែមទាំងផ្ដាំផ្ញើឲ្យម្ដាយ និងបងប្អូនត្រឡប់ទៅផ្ទះវិញថែមទៀតផង។
បច្ចុប្បន្នយុវតីខាងលើ បានកំពុងស្នាក់នៅបណ្ដោះអាសន្ន ក្នុងស្ថានីយវិទ្យុABC ចំណែកឯម្ដាយនិងបងប្អូនបានត្រឹមត្រឡប់ទៅផ្ទះវិញសិន រង់ចាំដោយស្រាយបញ្ហានេះនៅពេលព្រឹក ម៉ោងកម្មវិធីកញ្ញាកាច្រឹប អ៊ិនទ័រ៕