ព្រៃវែងៈ ជនសង្ស័យម្នាក់ ត្រូវបានសមត្ថកិច្ចចាប់ខ្លួន និងជនសង្ស័យម្នាក់ទៀត ត្រូវបានសមត្ថកិច្ចផ្ទុះអាវុធ៣ទៅ៤គ្រាប់ បណ្ដាលឲ្យរបួសធ្ងន់ ហើយស្លាប់ពេលបញ្ជូនដល់មន្ទីរពេទ្យខេត្តព្រៃវែង ក្រោយគេរាយការណ៍ថា ជនសង្ស័យទាំងពីរ បានធ្វើសកម្មភាពលួចរថយន្តម៉ាកព្រូសមួយគ្រឿងពីភ្នំពេញ។
លោក ជា ឡាឌីន មេប៉ុស្ដិ៍កំពង់សឹង បានឲ្យដឹងថា នៅម៉ោងប្រហែល៨យប់ថ្ងៃទី២៣ ខែមីនា ឆ្នាំ២០១៩ ឈ្មោះ ផាន់ សុឌី ភេទប្រុស ទីកំណើតនៅភូមិតាម៉ៅ ឃុំកំពង់សឹង ស្រុកព្រះស្ដេចខេត្តព្រៃវែង បច្ចុប្បន្នជាជាងជួសជុលឡាននៅភ្នំពេញ បានទូរសព្ទ័មកប្ដឹងលោកថា មានចោរលួចឡានពីភ្នំពេញ បើកតាមផ្លូវជាតិលេខ១ កាត់តាមភូមិកំពង់សឹង។
លោកមេប៉ុស្តិ៍ បន្តថា ភ្លាមនោះលោកបានដឹកនាំកម្លាំងចេញស្ទាក់ នៅចំណុចផ្សារកំពង់សឹង ខណៈដែលម្ចាស់រថយន្ត បានបើករថយន្តដេញតាមពីក្រោយ លុះដល់គល់ស្ពានអ្នកលឿងត្រើយខាងកើត រថយន្តនោះ ក៏បត់ទៅផ្លូវជាតិលេខ១១ ហើយឈ្មោះ ផាន់ សុឌី បានទូរស័ព្ទប្រាប់លោកថា ឲ្យជួយស្ទាក់តាមផ្លូវ មកស្រុកបាភ្នំវិញ។
លោកមេប៉ុស្តិ៍ បានបន្តទៀតថា ពេលនោះកម្លាំងរបស់លោក រួមមានទាំងកម្លាំង PM បានដេញតាមក្រោយចំនួនពីរឡានដែរ ពេលមកដល់ចំណុចភូមិគោកសណ្តែក ឃុំរក្សជយ័ ស្រុកបាភ្នំ ម៉ោងប្រហែល១១យប់ថ្ងៃដដែល រថយន្តក្រុមចោរបានគេចពីរថយន្ដសមត្ថកិច្ច ដែលដាក់ពាំងផ្លូវ ភ្លាមៗនោះ សមត្ថកិច្ច ក៏បានផ្ទុះអាវុធ៣ទៅ៤គ្រាប់ ក្នុងពេលកំពុងប្រតិបត្តិការ ធ្វើឲ្យសមត្ថកិច្ចចាប់បានជនសង្ស័យម្នាក់ ឈ្មោះ វ៉ាន ខេមរិន ភេទប្រុស អាយុ២៧ឆ្នាំ រស់នៅភូមិឈើកាច់ ឃុំឈើកាច់ ស្រុកបាភ្នំ ខេត្តព្រៃវែង និងបាញ់ត្រូវជនសង្ស័យម្នាក់ទៀត ឈ្មោះ យ៉ន ដាវុធ ភេទប្រុស អាយុ៣២ឆ្នាំ មុខរបរម៉ៅការជាងពិដាន រស់នៅភូមិជ្រៃកោង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ បណ្ដាលឲ្យរងរបួលក្បាល សមត្ថកិច្ច ក៏បានបញ្ជូនទៅមន្ទីរពេទ្យស្រុកបាភ្នំ តែរបួសធ្ងន់ធ្ងរពេក សមត្ថកិច្ចក៏បញ្ជូនបន្តទៅមន្ទីរពេទ្យខេត្តព្រៃវែងទៀត លុះដល់មន្ទីរពេទ្យ ជនសង្ស័យក៏ដាច់ខ្យល់ស្លាប់។
សមត្ថកិច្ច បានបញ្ជាក់ថា រថយន្តដែលក្រុមចោរលួចនោះ ម៉ាកព្រូស ពណ៌ស្ករ ពាក់ស្លាកលេខភ្នំពេញ 2AF-2679។
បច្ចុប្បន្នពាក់ព័ន្ធករណីនេះ សមត្ថកិច្ចជំនាញខេត្តព្រៃវែង កំពុងធ្វើការស្រាវជ្រាវនៅឡើយ៕