Thursday, March 7, 2019

ភ្លើងប្រច័ណ្ឌ! បុរស​ចិនតៃវ៉ាន់​ម្នាក់ ឈ្លោះ​ប្រកែក​បង្កជាហិង្សា​លើនារី​រូបស្រស់ជាសង្សារ​​ ត្រូវប៉ូលិសប៉ុស្តិ៍ភ្នំពេញថ្មី​ចាប់​ខ្លួន

ភ្នំពេញៈ បុរស​ជនជាតិ​តៃវ៉ាន់​ម្នាក់ ត្រូវ​​សមត្ថកិច្ច​ចាប់ឃាត់​ខ្លួន​ បន្ទាប់​ពី​​ឈ្លោះ​ប្រកែក​គ្នា​ជាមួយ​នឹង​នារី​ជាសង្សារ​ រហូត​កើតជា​ហិង្សា​ដាក់នា​ង បណ្ដាល​ឲ្យ​រងរបួស​ និង​បង្ខាំង​នៅ​ក្នុង​បន្ទប់​មិនឲ្យ​ចេញ​ទៅ​ក្រៅ​ថែមទៀត​ផង​។

ហេតុ​ការណ៍​នេះ​ បាន​បង្កឲ្យមាន​ការភ្ញាក់​ផ្អើល​ឡើង​កាលពី​វេលាម៉ោង​៣និង​៤០នាទី​ទៀបភ្លឺ ថ្ងៃ​ទី​៧​ ខែមីនា​ ឆ្នាំ​២០១៩​ នៅត្រង់ចំណុច​បុរីពិភពថ្មី​ខាងមុខ​ផ្សារ​ទំនើប​ម៉ាក្រូ​ ផ្ទះ​លេខ​96A​ ផ្លូវ​លេខ​NW-02​ សង្កាត់​ភ្នំពេញថ្មី​ ខណ្ឌ​សែនសុខ​ រាជធានីភ្នំពេញ។

សមត្ថកិច្ចមូលដ្ឋាន បានឲ្យដឹងថា នារីរងគ្រោះ​ឈ្មោះ Dalex ភេទស្រី​ អាយុ២៥ឆ្នាំ​ មុខរបរ ​ជាងអ៊ុតសក់​ ស្នាក់នៅផ្ទះជួលជិតផ្សារដីហុយ​ ស្ថិតក្នុងសង្កាត់ភ្នំពេញ​ថ្មី​ ខណ្ឌ​សែន​សុខ។ ចំណែក​ឯ​បុរស​ជាសង្សារ​ មិនបាន​ស្គាល់​ឈ្មោះ​នោះ​ទេ​ គ្រាន់​តែ​ដឹក​ថា​ ជាជនជាតិ​តៃវ៉ាន់​ វ័យ​ប្រហែល​៤០ឆ្នាំ​ ស្នាក់នៅកន្លែងកើតហេតុ។

បើតាមប្រភព​ពី​សមត្ថកិច្ច​ប៉ុស្តិ៍​នគរបាល​រដ្ឋ​បាល​ភ្នំពេញថ្មី ​បានរៀបរាប់ប្រាប់​ភ្នាក់ងារ​ CAM POST​​ បានឲ្យដឹងថា​ នៅមុន​ពេល​កើត​ហេតុ​ មានសាច់​ញាតិ​របស់​នារី​រង​គ្រោះ​ខាងលើ​ បាន​ទូរស័ព្ទ​មក​ប្តឹងថា​ មាន​ករណី​បុរស​ជាជន​ជាតិ​តៃវ៉ាន់ម្នាក់ ​បាន​ប្រើប្រាស់​អំពើហិង្សា​ និង​បង្ខាំង​នារី​រងគ្រោះ​ជា​សង្សារ​នៅ​ក្នុង​ផ្ទះ​កើតហេតុ​ខាងលើ​។ បន្ទាប់​ពី​បាន​ទទួល​ព័ត៌មាន​រួចមក​ ​​កម្លាំង​ពួកគាត់​ ក៏​បាន​ចុះ​ទៅ​ដល់​កន្លែង​កើត​ហេតុ​ភ្លាមៗ​តែម្ដង​ តែ​ខណៈ​ពេល​នោះ​ក៏​ឃើញ​នារី​រងគ្រោះ​ខាងលើ ​បាន​វាយ​ចេញ​ពី​​ក្នុងបន្ទប់មក​វេរ៉ដា​ខាងក្រៅ​ជាន់ទី​១​ ដោយ​ក្នុង​ទុនទ្រុឌទ្រោម។ រួចមកកម្លាំង​សមត្ថកិច្ច​ក៏បាន​ទៅ​គោះ​ទ្វារ​ផ្ទះ​កើតហេតុ ​ដើម្បី​ចូល​ទៅសួរនាំ​ ប៉ុន្តែ​បែរ​ជា​មាន​ជនជាតិ​តៃវ៉ាន់ប្រុសៗពីរទៅ​បីនាក់​ផ្សេងទៀត​ ដែល​ស្នាក់នៅ​ក្នុង​ផ្ទះ​កើតហេតុ​ខាងលើ បាន​ចេញ​មកមើល​ប៉ុន្តែ​មិន​ព្រម​បើក​ទ្វារ​នោះទេ​។​

លុះមួយសន្ទុះក្រោយមក ​ទើបបុរស​ជនជាតិ​តៃវ៉ាន់រូបនោះ​ ព្រម​នាំ​នារី​រងគ្រោះ​ជា​សង្សារ​ចុះ​មក​ជួបសមត្ថកិច្ច​នៅខាងក្រោម​ ដោយ​នារី​រងគ្រោះ​មានរងរបួស​រយះជើងខាងស្តាំ ​និងហើមមុខ​ ហើមមាត់ថែមទៀត​ផង​។ ហើយ​ដោយ​ឃើញ​ស្ថានភាព​ដូច្នេះ​ កម្លាំង​សមត្ថកិច្ច​ក៏​បាន​ធ្វើការ​ចាប់​ឃាត់​ខ្លួន​បុរសជាជនជាតិតៃ​វ៉ាន់​ខាងលើ​តែម្តង ​ដើម្បី​នាំយក​ទៅ​សួរ​នាំ​ ប៉ុន្តែ​បែរ​ជា​នារី​រងគ្រោះ​ជាសង្សារ​ស្រែក​ទ្រហោ​យំ​មិន​ព្រម​ឲ្យ​សមត្ថកិច្ច​ធ្វើការ​ឃាត់​ខ្លួន​សង្សារ​ជនជាតិ​តៃវ៉ាន់ខាងលើទៅវិញ។

ប្រភពពីបុរសម្នាក់ ដែលជាមេជាងនៅហាងអ៊ុតសក់របស់​នារី​រងគ្រោះ​ បានរៀបរាប់ប្រាប់​ភ្នាក់ងារ​ CAM POST យើងដែរថា នារីរងគ្រោះ​និងបុរសជនជាតិតៃវ៉ានខាងលើ បានស្គាល់គ្នានិងស្រលាញ់គ្នាអស់រយៈពេលជាង៦ខែ​មកហើយ​ ដោយមិនដែរមានបញ្ហាអ្វីនោះទេ​។ ហើយកាលពី​យប់ថ្ងៃ​៦​ ខែមីនា​ នៅមុនពេលកើតហេតុ នារី​រងគ្រោះ​​បាន​នាំ​បុរស​ជាសង្សារ​ដែល​ជាជនជាតិ​តៃវ៉ាន់​ខាងលើ​ទៅចូលរួមកម្មវិធី​ខួបកំណើរ​ប្អូន​ប្រុស​របស់នាង​ នៅក្នុងខារ៉ាអូខេមួយកន្លែង​ ដោយមាន​ការ​ផឹកស៊ី​រាំច្រៀង​យ៉ាង​សប្បាយរីករាយ​។ លុះ​ពេល​រៀង​ស្រវឹង​ស្រឿង​ៗរៀងៗខ្លួន​ ស្រាប់​តែ​បុរសជនជាតិតៃវ៉ាន់នោះ​ កើតចិត្តប្រច័ណ្ឌ​ និង​អន់ចិត្ត​ទៅលើនារីរងគ្រោះ​ដែលជា​សង្សារ​ ដោយបាននិយាយថា “ហេតុអ្វីចងចាំតែថ្ងៃខួបកំណើតប្អូន​ ចុះថ្ងៃ​ខួបកំណើត​របស់​គាត់ម៉េចក៏មិនចាំដែលចឹង” រហូតកើតជាការឈ្លោះប្រកែកគ្នារវាងពួកគេទាំងពីរ​។ ពេល​នោះ​ក៏​មាន​មិត្តភក្ដិ​ដែលចូលរួមក្នុង​កម្មវិធី​នេះ​ បានជួយ​សម្របសម្រួលពួកគេរហូតត្រូវរូវគ្នា​។ ទើបនារីរងគ្រោះ​ និងបុរសជនជាតិតៃវ៉ាន់​ជាសង្សារ​នោះ​ នាំគ្នាត្រលប់មកផ្ទះកើត​ហេតុ​ដែល​ជា​ផ្ទះ​របស់​បុរស​ជាសង្សារ​វិញ។

ប្រភពដដែល​បាន​បន្ត​ថា​ លុះ​ដល់​ម៉ោង​១រំលង​អធ្រាត្រ​ថ្ងៃ​កើត​ហេតុ​ ស្រាប់តែនារីរងគ្រោះទូរស័ព្ទមកប្រាប់ថា បុរសជនជាតិតៃវ៉ាន់នោះ​ បានវាយនាងស្ទើស្លាប់ហើយ​ និងបិទទ្វារចាក់សោមិនឲ្យចេញក្រៅឡើយ ។ ទើបរូបគាត់ប្រញាប់ទូរស័ព្ទប្រាប់បងស្រីនារីរងគ្រោះឲ្យបានដឹង រួចរាយការណ៍ប្រាប់ខាងសមត្ថកិច្ចមូលដ្ឋាន​ឲ្យ​ចុះ​ទៅ​ជួយ​ធ្វើ​ការ​អន្តរាគមន៍​ភ្លាមៗតែម្ដង។

ក្រោយកើតហេតុ​ បុរសជនជាតិចិនខាងលើ​ ត្រូវបាសមត្ថកិច្ចឃាត់ខ្លួនបញ្ជូនទៅអធិការដ្ឋានគរបាលខណ្ឌសែនសុខ​ ដើម្បីសាកសួរបន្ត​ ចំណែកនារីរងគ្រោះ​ឃើញទំនងជាអាណិតជនជាតិចិននោះពេក​ ទាំងខ្លួនឯងមានស្នាមជាំនៅលើផ្ទៃមុខ​ និងមានរបួសជើងចេញឈាម​ក៏ដោយ​ បែរជាស្រែក​ទ្រហោយំ​ ហើយកុហកសមត្ថកិច្ចថា​ ជនជាតិចិននោះមិនបានធ្វើអ្វីដាក់រូបនាងឡើយ​ ​ហើយក៏មិនព្រមប្ដឹងជនជាតិចិននោះទេ​។ យ៉ាងណាក្ដី​ ទោះជានារីរងគ្រោះមិនព្រមប្ដឹងក៏ដោយ​ សមត្ថកិច្ច​បានឃុំខ្លួនជនជាតិចិនខាងលើបណ្ដោះអាសន្ន រងចាំសាកសួរបន្តនៅព្រឹកននេះ​៕

Feature Ads