កណ្តាលៈ ក្រុមចោរ៣នាក់ ចូលលួចព្រះពុទ្ធបដិមាធ្វើពីស្ពាន់ នៅវត្តព្រែកហូរ ស្ថិតក្នុងភូមិបត្តាជី១ សង្កាត់ព្រែកហូរ ក្រុងតាខ្មៅ ខេត្តកណ្តាល ត្រូវសមត្ថកិច្ចនគរបាលខេត្តកណ្ដាល ចាប់បានហើយ កាលពីរសៀលថ្ងៃទី២៩ ខែមីនា ឆ្នាំ២០១៩ នៅសង្កាត់ព្រែកហូរ ក្រុងតាខ្មៅ ខេត្តកណ្តាល ក្រោយពួកគេធ្វើសកម្មភាពលួច កាលពី២ថ្ងៃទី២៨ ខែមិនា ឆ្នាំ២០១៩។
ស្នងការខេត្តកណ្តាលលោក អ៊ាវ ចំរើន បានប្រាប់តាម Whatapp ឲ្យដឹងថា ជនសង្ស័យទី១ឈ្មោះ ឃុន ម៉េងហាក់ ភេទប្រុស អាយុ១៧ឆ្នាំ មុខរបរមិនពិតប្រាកដ មានទីលំនៅ ភូមិបត្ដាជី១ សង្កាត់ព្រែកហូរ ក្រុងតាខ្មៅ ខេត្ដកណ្ដាល។ ទី២ ឈ្មោះ រុន សុភាព ហៅ ភើម ភេទប្រុស អាយុ១៧ឆ្នាំ មុខរបរកម្មករ មានទីលំនៅភូមិព្រែកហូរលិច១ សង្កាត់ព្រែកហូរ ក្រុងតាខ្មៅ ខេត្ដកណ្ដាល ទី៣ ឈ្មោះ អេង សុភ័ក្រ ភេទប្រុស អាយុ២៦ឆ្នាំ មុខរបរកម្មករ មានទីលំនៅភូមិព្រែកហូរលិច សង្កាត់ព្រែកហូរ ក្រុងតាខ្មៅ។ វត្ថុតាងចាប់យក៖ រូបព្រះពុទ្ធបដិមា(ធ្វើពីស្ពាន់)២៦អង្គ។
លោកស្នងការ បានបញ្ជាក់ថា មុនពេលកើតហេតុ គណៈកម្មការវត្ត បានយករូបព្រះបដិមាចំនួន៥.០០០អង្គ ដាក់នៅក្រោមបល្ល័ងព្រះជាយូរមកហើយ មិនដែលមានការបាត់បង់ឡើយ លុះដល់ថ្ងៃទី២៨ មីនា ២០១៩ វេលាម៉ោង៧យប់ ស្រាប់តែឃើញឈ្មោះ ខូវ ម៉េងហាក់ ហៅ សាក់ បានយករូបបដិមា ចំនួន២៦អង្គ ដូចបានចាប់យកខាងលើ មកប្រគល់ឲ្យ ឈ្មោះ មឿន វាសនា ជាកូនសិស្សលោកទើបដឹងថា មានការបាត់រូបបដិមា ហើយគណៈកម្មការ បានរាយការណ៍ជូនសមត្ថកិច្ច ដើម្បីចុះធ្វើការស្រាវជ្រាវ រហូតឃាត់ខ្លួនជនសង្ស័យទាំង៣ខាងលើ។
តាមចម្លើយសារភាពរបស់ឈ្មោះ ឃុន ម៉េងហាក់ ភេទប្រុស អាយុ១៧ឆ្នាំ មុខរបរមិនពិតប្រាកដ បានឲ្យដឹងថា ខ្លួនបានធ្វើសកម្មភាពលួចចំនួន ៣លើក លើកទី១ ៖ កាលពីថ្ងៃមិនចាំខែមីនា ឆ្នាំ២០១៩ វេលាម៉ោង១ទៀបភ្លឺ ដោយខ្លួន និងឈ្មោះ រុន សុភាព បាននាំគ្នាទៅធ្វើសកម្មភាពវាយ បំបែកកញ្ចក់ទ្វារ កន្លែងទុកព្រះពុទ្ធរូបបដិមា ស្ថិតនៅក្នុង វត្តព្រែកហូរ (សង្កាត់ព្រែកហូរ) បានលួចយកព្រះពុទ្ធរូបបដិមា៩អង្គ (មានតូច មានធំ) និងយកទៅលក់ឲ្យឈ្មោះ លីន ចំនួន២អង្គ ដែល មានទីលំនៅ ភូមិព្រែកហូរកើត សង្កាត់ព្រែកហូរ ក្រុងតាខ្មៅ ខេត្តកណ្ដាល បានចំនួនទឹកប្រាក់ ៦០ដុលា្លរ។
លើកទី២ ៖ មិនចាំថ្ងៃក្នុងខែមីនា ឆ្នាំ២០១៩ វេលាម៉ោង១ទៀបភ្លឺ ឈ្មោះ ឃុន ម៉េងហាក់ ហៅ សាក់ និង ឈ្មោះ អេង សុភ័ក្រ ភេទប្រុស អាយុ២៦ឆ្នាំ ដែលមានទីលំនៅភូមិព្រែកហូរលិច សង្កាត់ព្រែកហូរ ក្រុងតាខ្មៅ បាននាំគ្នាទៅលួចព្រះពុទ្ធរូប ចំនួន ២៦អង្គ យកទៅទុកនៅផ្ទះឈ្មោះ អេង សុភ័ក្រ។
លើកទី ៣ ៖ មិនចាំថ្ងៃក្នុងខែមីនា ឆ្នាំ២០១៩ដូចគ្នា វេលាម៉ោង១ទៀបភ្លឺទៀត ឈ្មោះ ឃុន ម៉េងហាក់ ហៅ សាក់ និង ឈ្មោះ រុណ សុភាព ហៅ ភឹម បាននាំគ្នាទៅលួចម្ដងទៀត ប៉ុន្តែពេលនោះ ក៏ត្រូវព្រះពុទ្ធរូប បដិមា ជ្រុះលាន់ស្នូរសំឡេងឮខ្លាំង ក៏នាំគ្នារត់ចែកផ្លូវគ្នារៀងៗខ្លួន លុះដល់ថ្ងៃទី២៨ ខែមីនា ឆ្នាំ២០១៩ឈ្មោះ ឃុន ម៉េងហាក់ ហៅ សាក់ បានយកព្រះពុទ្ធរូបចំនួន២៦អង្គមកប្រគល់ឲ្យកូនសិស្សលោកទុកវិញ។
បច្ចុប្បន្នជនសង្ស័យទាំង៣នាក់ ត្រូវបានសមត្ថកិច្ចជំនាញ កំពុងកសាងសំណុំរឿងចាត់ការតាមនីតិវិធីច្បាប់៕