ភ្នំពេញៈ បុរស២នាក់ បើករថយន្តមួយគ្រឿង ទៅបុករបាំងថ្មពុះចែកទ្រូងផ្លូវ លាន់ដូចរន្ទះ ប៉ើងខ្ទាតរបាំងថ្មទៅកណ្ដាលផ្លូវជាង១០ម៉ែត្រ បណ្ដាលឲ្យអ្នកបើកបររងរបួសធ្ងន់ ចំណែកព្រូរថយន្តរងរបួសស្រាល ហើយនាំគ្នារត់គេចខ្លួនបាត់ស្រមោលអស់ បន្សល់ទុកតែរថយន្តនៅកន្លែងកើតហេតុឲ្យសមត្ថកិច្ចស្ទូចយកទៅ។
ហេតុការណ៍គ្រោះថ្នាក់ចរាចរណ៍នេះ កាលពីវេលាម៉ោង២និង៣៥នាទីទៀបភ្លឺ ឈានចូលថ្ងៃទី៥ ខែមីនា ឆ្នាំ២០១៩ ស្ថិតនៅតាមបណ្ដោយផ្លូវព្រះមុនី្នវង្ស កែងផ្លូវកម្ពុជាក្រាម ស្តុបសេរីភាព ស្ថិតក្នុងក្នុងសង្កាត់ផ្សារថ្មី២ ខណ្ឌដូនពេញ រាជធានីភ្នំពេញ។
តាមប្រភពព័ត៌មានពីកន្លែងកើតហេតុ បានប្រាប់ឲ្យដឹងថា មុនពេលកើតហេតុ គេឃើញរថយន្ត១គ្រឿង ម៉ាក HYUNDAI ក្បាលពណ៌ខៀវ ពាក់ស្លាកលេខ កណ្ដាល 3A-0237 បើកបរដោយបុរសម្នាក់ និងអ្នករួមដំណើរម្នាក់ទៀត ធ្វើដំណើរតាមបណ្ដោយផ្លូវព្រះមុន្នីវង្សពីត្បូងមកជើង។ លុះមកដល់ចំណុចកើតហេតុ ស្រាប់តែរថយន្តរេចង្កូតជ្រុលទៅបុករបាំងថ្មពុះចែកទ្រូងផ្លូវ លាន់ដូចរន្ទះ រថយន្តបើកទៅលែងរួច ដាច់កង់មុខម្ខាងកល់ជាប់ទ្រូងផ្លូវ និងប៉ើងខ្ទាតមួយកង់ទៅកណ្ដាលផ្លូវជាង១០ម៉ែត្រ និងបណ្ដាលឲ្យអ្នកបើកបររងរបួសធ្ងន់ ប្លោងបោកជាមួយកញ្ចក់ខាងមុខធ្លាក់មកលើថ្នល់ ឈាមហូរជោគខ្លន ចំណែកព្រូរថយន្តរងរបួសស្រាល ហើយនាំគ្នារត់គេចខ្លួនបាត់ស្រមោលអស់ បន្សល់ទុកតែរថយន្តនៅកន្លែងកើតហេតុឲ្យសមត្ថកិច្ចស្ទូចយកទៅ។
ក្រោយកើតហេតុ សមត្ថកិច្ចមូលដ្ឋានបានចុះមកដល់កន្លែងកើតហេតុ ធ្វើការទាក់ទងទៅសមត្ថកិច្ចជំនាញ ដើម្បីឲ្យចុះមកធ្វើការវាស់វែង យករថយន្តទៅរក្សាទុកនៅការិយាល័យចរាចរណ៍ផ្លូវគោក រាជធានីភ្នំពេញ រងចាំដោះស្រាយគ្នា ទៅតាមផ្លូវច្បាប់នៅពេលក្រោយ៕