ឆ្មក់បង្ក្រាបឈើប្រណី​តរបស់មេឈ្មួញឈ្មោះ ណុប ឌី ហៅឆើត ខណៈកំពុង​លើកដាក់លើរថយន្ត ប្រុងបើករត់គេច

កំពង់ស្ពឺៈ ឈើចម្រុះ​ប្រមាណ​ជាង៤ម៉ែត្រគូប ត្រូវបានបង្ក្រាប ដោយមន្ត្រីអាវុធហត្ថខេត្ត សហការជាមួយខណ្ឌរដ្ឋបាលព្រៃឈើកំពង់ស្ពឺ ក្រោមការបញ្ជាផ្ទាល់ពីលោក វ៉ី សំណាង អភិបាលនៃគណៈអភិបាលខេត្តកំពង់ស្ពឺ ខណៈដែលមេឈ្មួញឈ្មោះ ណុប ឌី កំពុងតែបញ្ជាឲ្យ​កូនចៅលើក និងស្ទូចឈើប្រណី​តឡើងលើរថយន្តម៉ាកយីឌុបមួយគ្រឿងពេញប្រៀប ប៉ុន្តែដោយបែកការ ទើបមេឈ្មួញល្បីឈ្មោះរូបនោះ បានបញ្ជាឲ្យ​កូនចៅ បើករថយន្តយីឌុបនោះ រត់គេចយកទៅលាក់ទុកនៅក្នុងព្រៃបាត់ទៅ បន្សល់តែឈើជាង៤ម៉ែត្រគូបប៉ុណ្ណោះ។

ការឆ្មក់បង្ក្រាបឈើប្រណី​តរបស់មេឈ្មួញឈ្មោះ​ ណុប ឌី នេះ ធ្វើឡើងកាលពីវេលាម៉ោង៣៖៣០នាទីរសៀល ថ្ងៃទី១៩ ខែមីនា ឆ្នាំ២០១៩ នៅចំណុចភូមិស្រែច្រាប ឃុំត្រពាំងជោ ស្រុកឱរ៉ាល់ ខេត្តកំពង់ស្ពឺ។

បើតាមសម្តីរបស់មន្ត្រីជំនាញ បាននិយាយអោយដឹងថា បន្ទាប់ពីទទួលព័ត៌មានពីបណ្តាញរួចមក បានរាយការណ៍ទៅលោក​អភិបាលខេត្តថា មេឈ្មួញរកស៊ីបទល្មើសព្រៃឈើឈ្មោះ ណុប ឌី កំពុងតែលើកជញ្ជូនឈើប្រណី​តដាក់លើរថយន្តធុនធំ(យីឌុប)នៅតំបន់ភូមិស្រែច្រាបនោះ ទើបលោក បានសហការជាមួយកម្លាំងកងរាជអាវុធហត្ថ មិនលើកលែងដាច់ខាតរាល់ការប្រព្រឹត្តល្មើសសច្បាប់ និងការកាប់បំផ្លាញធនធានធម្មជាតិ នៅក្នុងខេត្តកំពង់ស្ពឺនោះ។

បើតាមការអោយដឹងពីជំនាញ បាននិយាយថា មេឈ្មួញល្បីឈ្មោះ ណុប ឌី ហៅឆើត នេះទើបតែមករកស៊ីបទល្មើសព្រៃឈើនៅក្នុងខេត្តកំពង់ស្ពឺ បាន​រយៈពេលជិត១ខែប៉ុណ្ណោះ បន្ទាប់ពីចាកចេញពីខេត្តពោធិ៍​សាត់នោះ។ ហើយការដឹកជញ្ជូនឈើប្រណីតនេះ មេឈ្មួញរូបនេះបានបញ្ជាកូនចៅដឹកចេញពីខេត្តពោធិ៍​សាត់ ឆ្លងកាត់តំបន់អូរត្រាវ និងខេត្តកោះកុងផងដែរ។ ដែលគេដឹងថា ការដឹកជញ្ជូនបទល្មើសនេះ ឃុបឃិតគ្នាជាលក្ខណៈជាប្រពន្ធ័ ទើបប្រព្រឹត្តទៅយ៉ាង​រលូនបែបនេះ ជាក់ស្តែងបើខ្មោចក្នុងមិនអោយដៃទេ នោះខ្មោចក្រៅ ក៏មិនហ៊ានដែរ(ហើយគួរអោយសោកស្តាយបំផុតនោះ គឺឈើប្រណី​តពេញមួយរថយន្តម៉ាកយីឌុប)របស់មេឈ្មួញឈ្មោះ ណុប ឌី ហៅឆើតនោះ បានរត់គេចខ្លួន បន្ទាប់ពីបែកការនោះ គឺបន្ទាប់ពីមានការរាយការណ៍រកកម្លាំងសហការជាមួយសមត្ថកិច្ចស្រុកឱរ៉ាល់នោះ។

ប្រភពមួយទៀតបង្ហើបថា បើចង់បង្ក្រាបមែនសូមថ្នាក់លើកុំប្រាប់សមត្ថកិច្ចមូលដ្ឋានអី សុទ្ធសឹងជាបក្ខពួករបស់គេទេ ជាពិសេសសមត្ថកិច្ចស្រុកឱរ៉ាល់តែម្តង អ្នកណាៗមិនស្គាល់ឈ្មោះណុប ឌី ហៅឆើតនោះ។

បើតាមសម្តីរបស់មន្ត្រីអាវុធហត្ថនិយាយថា កម្លាំងកងរាជអាវុធហត្ថ ខេត្តកំពង់ស្ពឺ ក្រោមបញ្ជាដោយផ្ទាល់ពីលោកឧត្តមសេនីយ៍ត្រី ជូ សារុន មេបញ្ជាការកងរាជអាវុធហត្ថខេត្ត សហការជាមួយជំនាញខណ្ឌរដ្ឋបាលព្រៃឈើកំពង់ស្ពឺ បានចុះបង្ក្រាបបទល្មើសព្រៃឈើ​ ដូចមានខាងក្រោម ៖១-ឈើ​ធ្នង់ ឈើ​សុក្រំ ឈើ​ម្រេញ សរុបបឋមមានប្រមាណចន្លោះពី៣ទៅ៤ម៉ែត្រគូប ដោយមេឃយប់ទៅហើយ បានដាក់កម្លាំងយាមកាមយ៉ាងយកចិត្តទុកដាក់បំផុតខ្លាចក្រែងមេឈ្មួញឈ្មោះ ណុប ឌី​ ហៅឆើតរូបនោះបញ្ជាកូនចៅមករំដោះយកឈើទាំងនោះរត់ចូលក្នុងព្រៃបាត់។

បច្ចុប្បន្នកម្លាំងជំនាញកំពុងដឹកជញ្ជូនយកទៅរក្សាទុកនៅខណ្ឌរដ្ឋបាលព្រៃឈើ​កំពង់ស្ពឺ ដើ​ម្បី​ចាត់ការតាមច្បាប់រដ្ឋបាលព្រៃឈើ៕

ផ្ដល់សិទ្ធិដោយ៖ campost.news