ភ្នំពេញៈ បុរសម្នាក់ ធ្លាប់ប្រើប្រាស់គ្រឿងញៀន និងធ្លាប់ប្រើអំពើហិង្សាក្នុងគ្រួសារជាញឹកជាប់ ជាពិសេសដើរបង្ករឿងជាមួយអ្នកជិតខាង ដែលជាអ្នកលក់ដូរដូចគ្នាផងនោះ ពេលស្រវឹងបានដើរទៅវាយយុវជនម្នាក់ កំពុងហូបមីហិរ ហើយយុវជននោះ ក៏រត់ឡើងជិះម៉ូតូទៅបាត់មួយសន្ទុះ បែរជាហៅបក្ខពួកមកវិញ ប្រដាប់ដោយដំបង ដាវ និងបំពង់ទីប ព្រួតវាយបុរសនោះ បណ្ដាលឲ្យដេកស្លាប់ ក្នុងថ្លុកឈាមតែម្ដង។
ហេតុការណ៍នេះ បានបង្កការភ្ញាក់ផ្អើលយ៉ាងខ្លាំង កាលពីវេលាម៉ោង៣៖៣០នាទីរសៀលថ្ងៃអង្គារ ទី១២ ខែមីនា ឆ្នាំ២០១៩ នៅចំណុចមុខផ្ទះជនរងគ្រោះ ភូមិស្វាយជ្រុំ ឃុំព្រែកដំបង ស្រុកមុខកំពូល ខេត្តកណ្តាល។
ជនរងគ្រោះឈ្មោះ ក្រង ចំរើន ភេទប្រុស អាយុ៣៨ឆ្នាំ មុខរបរ លក់ដូរ មានទីលំនៅភូមិ-ឃុំកើតហេតុ(ស្លាប់)។ ជនសង្ស័យមិនស្គាល់អត្តសញ្ញាណ ២នាក់ និងបក្ខពួក ។
សមត្ថកិច្ច បានឲ្យដឹងថា កន្លងមកជនរងគ្រោះធ្លាប់ប្រើប្រាស់គ្រឿងញៀន និងបានប្រើអំពើហិង្សាក្នុងគ្រួសារជាញឹកជាប់ ជាពិសេសដើរបង្ករឿងជាមួយអ្នកជិតខាង ដែលជាអ្នកលក់ដូរដូចគ្នា។ លុះដល់ថ្ងៃកើតហេតុជនសង្ស័យចំនួន២នាក់ បានជិះម៉ូតូ១គ្រឿង ម៉ាកវ៉េវ ពណ៌ខ្មៅ(មិនចាំស្លាកលេខ) បានមកហូបមីហិរជាប់ផ្ទះជនរងគ្រោះ នៅទីតាំងកើតហេតុខាងលើ ស្រាប់តែពេលកំពុងហូប ជនរងគ្រោះមានសភាពស្រវឹង បានទៅរករឿង និងវាយជនសង្ស័យមុន ទើបជនសង្ស័យខឹងបានជិះម៉ូតូចេញបាត់ទៅ បានប្រហែលដប់ប្រាំនាទី បាននាំបក្ខពួកប្រហែលប្រាំនាក់ ជិះម៉ូតូ៣គ្រឿង ប្រដាប់ដោយអាវុធមាន (ដាវ ដំបង និង ដែកបំពង់ទីប) មកព្រួតវាយជនរងគ្រោះ បណ្ដាលឲ្យដេកស្លាប់ក្នុងថ្លុកឈាមតែម្ដង។ ចំណែកក្រុមជនសង្ស័យបាននាំគ្នាជិះរត់បាត់ស្រមោលអស់ ទើបអ្នកឃើញហេតុការណ៍ប្រាប់សមត្ថកិច្ច ចុះមកកន្លែងកើតហេតុ សហការជាមួយសមត្ថកិច្ចជំនាញ ចុះធ្វើកោសល្យវិច័យផងដែរ។
បច្ចុប្បន្នកម្លាំងសមត្ថកច្ចជំនាញព្រហ្មទណ្ឌកំរិតធ្ងន់ បានសហការជាមួយស្រុក និងកម្លាំងប៉ុស្តិ៍ព្រែកដំបង ដើម្បីធ្វើការស្រាវជ្រាវបន្ត៕
