ភ្នំពេញ ៖ គ្រោះថ្នាក់ចរាចរជាឃាត.ក លេខមួយ សម្លាប់ជីវិតពលរដ្ឋខ្មែរស្លូតត្រង់...! សួរថាមកពីមូលហេតុអ្វីបានជាទប់ស្កាត់មិនបាន.....???? ជាក់ស្ដែង បុរសម្នាក់ដោយសារតែនឹករលឹកប្រពន្ធពេក ក៏ធ្វើដំណើរចេញពីខេត្តព្រៃវែង ដើម្បីមកជួបមុខប្រពន្ធ នៅឯក្រុងភ្នំពេញ តែបានពាក់កណ្ដាលផ្លូវ បែរជាជួបគ្រោះថ្នាក់ចរាចរណ៍ បណ្ដាលឲ្យស្លាប់បាត់បង់ជីវិតយ៉ាងអាណោចអាធម័បែបនេះ។
ហេតុការណ៍គ្រោះថ្នាក់ចរាចរណ៍ដ៏រន្ធត់នេះ បានកើតឡើងកាលពីវេលាម៉ោង០៨:២០នាទីយប់ ថ្ងៃសៅរ៍ ទី១៦ ខែមីនា ឆ្នាំ២០១៩ នៅចំណុចមុខផ្ទះសំណាក់មួយកន្លែង យីហោ "សម្បត្តិមានលាភ" ស្ថិតនៅតាមបណ្តោយផ្លូវជាតិលេខ១ ក្នុងសង្កាត់និរោធ ខណ្ឌច្បារអំពៅ រាជធានីភ្នំពេញ។
ជនរងគ្រោះឈ្មោះ ភួង សៅ ភេទប្រុស អាយុ២៩ឆ្នាំ មុខរបរមេកាសំណង់ មានស្រុកកំណើត នៅស្រុកស្អាង ខេត្តកណ្តាល។
តាមប្រភពព័ត៌មានបានឲ្យដឹងថា មុនពេលកើតហេតុគបានឃើញបុរសម្នាក់ ជិះម៉ូតូ ហុងដាឌ្រីមសង់ ពណ៌ខ្មៅ ពាក់ស្លាកលេខភ្នំពេញ 1FF 3698 ធ្វើដំណើរតាមបណ្តោយផ្លូវជាតិលេខ១ ក្នុងទិសដៅពីកើតទៅលិចខណះមកដល់ចំណុចកើតហេតុក៏បានវ៉ាជែង កង់បី PassApp មួយគ្រឿង ដែលធ្វើដំណើរស្របទិសគ្នា ជាមួយរថយន្តកុងតឺន័រ ពណ៌លឿង ពាក់ស្លាកលេខភ្នំពេញ 3D-4607 តែបែរជាវ៉ាមិនផុត ក៏ទាក់ដៃចង្កូត បណ្តាលឲ្យដួលចូលក្រោមកង់រថយន្តកិនស្លាប់ភ្លាមៗ ហើយរថយន្តបានបើកបានប្រហែល១០០ម៉ែត្រទើបឈប់ ប្លុងរថយន្តចោល ហើយតៃកុងចុះរត់គេចបាត់ស្រមោល។
បើតាមសម្ដីប្រពន្ធជនរងគ្រោះបានឲ្យរៀបរាប់ទាំងទឹកភ្នែកនិងអារម្មណ៍ក្ដុកក្ដួលថា ប្តីរបស់គាត់ បានធ្វើការនៅខេត្តព្រៃវែង ចំណែកគាត់ធ្វើការនៅភ្នំពេញ ម្តុំការណាឌីយ៉ា ផ្លូវវេងស្រេង ដោយសារតែនឹករលឹកគ្នាពេក ទើបប្តីសុំគាត់មកលេងនៅផ្ទះជួល តែមិនទាន់បានជួបមុខគ្នាផង បែរជាប្ដីគាត់ជួបគ្រោះថ្នាក់ចរាចរណ៍ បណ្ដាលឲ្យស្លាប់បាត់បងជីវិតចោលប្រពន្ធ ទុកអោយគាត់នៅមេម៉ាយបែបនេះ។
ក្រោយកើតហេតុ សមត្ថកិច្ចមូលដ្ឋានបានចុះមកដល់ចំណុចកើតហេតុ សហការជាមួយសមត្ថកិច្ចផ្នែកវាស់វែងក្រុង ចុះមកវាស់វែង និងយករថយន្តនិងម៉ូតូ ទៅរក្សាទុកបណ្ដោះអាសន្ន នៅការិយាល័យចរាចរណ៍ជើងគោក នៃស្នងការនគរបាលរាជធានីភ្នំពេញ ដើម្បីរងចាំម្ចាស់រថយន្តចូលខ្លួនដោះស្រាយ តាមច្បាប់។
ចំណែកសពត្រូវបានសមត្ថកិច្ចធ្វើកំណត់ហេតុ ប្រគល់ជូនក្រុមគ្រួសារ យកទៅធ្វើបុណ្យតាមប្រពៃណី នៅស្រុកកំណើត៕