ភ្នំពេញៈ ជនសង្ស័យ២នាក់ ត្រូវបានប្រជាពលរដ្ឋដេញចាប់បាន ក្រោយធ្វើសកម្មភាពឆក់កាបូបពីបុរសនារីបួននាក់បានសម្រេច ខណៈកំពុងជិះម៉ូតូឌុបគ្នាបួននាក់។
ហេតុការណ៍នេះ កើតឡើងនៅវេលាម៉ោង១៖៣០នាទីរំលងអធ្រាត្រ ឈានចូលថ្ងៃសៅរ៍ ទី២៣ ខែមិនា ឆ្នាំ២០១៩ នៅតាមបណ្តោយផ្លូវ១០៥ កែងនឹង៣១០ ស្ថិតក្នុងសង្កាត់បឹងកេងកងទី២ ខណ្ឌចំការមន រាជធានីភ្នំពេញ។
ប្រភពពីសមត្ថកិច្ច បានអោយដឹងថា ជនសង្ស័យ ដែលប្រជាពលរដ្ឋចាប់បាននោះទី១ ឈ្មោះ សុខ ផានិត ភេទប្រុស អាយុ១៥ឆ្នាំ ជនជាតិខ្មែរ មុខរបរជាអ្នករត់ម៉ូតូកង់បី នៅហាងម្លប់មេឃ រស់នៅច្រាំងបាក់ ខណ្ឌច្បារអំពៅ(ជាអ្នកអង្គុយពីក្រោយធ្វើសកម្មភាពឆក់)។ ទី២ ឈ្មោះ ហ៊ួន វាសនា ភេទប្រុស អាយុ៣១ឆ្នាំ ជនជាតិខ្មែរ មុខរបររត់ម៉ូតូឌុប ស្នាក់នៅម្តុំផ្សារតាប៉ាង មានស្រុកកំណើត នៅភូមិបង់ឯក ឃុំពាមមានជ័យ ស្រុកពាមរ ខេត្តព្រៃវែង ជាអ្នកបើក។ ដោយឡែកស្រ្តីជនរងគ្រោះ មិនបានស្គាល់អត្តសញ្ញាណទេ។
ប្រភពព័ត៌មានពីប្អូនប្រុស ដែលជាអ្នកឌុបស្រ្តីរងគ្រោះ បានប្រាប់អោយដឹងថា មុនពេលកើតហេតុ រូបគាត់បានដឹកស្រ្តីបីនាក់ ព្រមទាំងជនរងគ្រោះចេញពីម្តុំខាងក្រោយវាំង ឆ្ពោះទៅផ្ទះនៅម្តុំវត្តសន្សំកុសល លុះពេលមកដល់ចំណុចកើតហេតុ ខណៈស្រ្តីរងគ្រោះកំពុងជិះម៉ូតូស្ពាយកាបូប ស្រាប់តែលេចមុខជនសង្ស័យ២នាក់ជិះម៉ូតូម៉ាកស្កុបពី ពណ៌ស ពាក់ស្លាកលេខ ភ្នំពេញ1GW.6582 បានធ្វើសកម្មភាពឆក់កាបូបពីស្រ្តីរងគ្រោះបានសម្រេច ធ្វើឲ្យម៉ូតូដួលរងរបួតិចតួច ភ្លាមៗនោះ ក៏លើកម៉ូតូដេញតាម ហើយស្រ្តីរងគ្រោះបានស្រែកចោរៗឆក់ ប្រជាពល រដ្ឋ ដែលនៅក្បែរនោះ បានជួយដេញចាប់ ព្រមទាំងអ្នកសារព័ត៌មានជួយដេញផង រហូតដល់បុរីអង្គរភ្នំពេញ ទើបចាប់បាន រួចប្រគល់ឲ្យសមត្ថកិច្ច។
បច្ចុប្បន្នជនសង្ស័យកំពុងឃាត់ខ្លួនបណ្តោះអាសន្ននៅប៉ុស្តិ៍នគរបាលបឹងកេងកងទី២ ដើម្បីធ្វើការសាកសួរកសាងសំណុំរឿងបញ្ជូនទៅអធិការដ្ឋាននគរបាលខណ្ឌចំការមន ដើម្បីចាត់ការតាមនីតិវិធីច្បាប់៕
