ព្រះសីហនុៈ ក្រុមការងារមន្រ្តីសាលាក្រុងព្រះសីហនុ នាព្រឹកថ្ងៃទី២២ ខែមីនា ឆ្នាំ២០១៩ នៅតែចុះអប់រំម្ចាស់ការដ្ឋាន ដែលដាក់សម្ភារៈសំណង់មកលើចំណីផ្លូវមួយកន្លែង នៅតាមបណ្តោយផ្លូវសេតេ ស្ថិតក្នុងភូមិ២ សង្កាត់២ ក្រុងព្រះសីហនុ ខេត្តព្រះសីហនុ។
ការណែនាំឲ្យដាក់សម្ភារៈសំណង់ចូលទៅក្នុងការដ្ឋាន មិនអោយដាក់លយចេញមកលើចំណីផ្លូវនេះ គឺតាមសេចក្តីប្រកាសរបស់(សជណ) របស់រដ្ឋបាលខេត្តព្រះសីហនុ ក្នុងករណីមិនស្តាប់ អាជ្ញាធរ នឹងអនុវត្តន៍តាមច្បាប់។
ប្រជាពលរដ្ឋនៅខេត្តព្រះសីហនុ បានអបអសាទរ និងគាំទ្រយ៉ាងខ្លាំងទៅលើចំណាត់ការ របស់លោក អ៊ី សុខឡេង អភិបាលក្រុងព្រះសីហនុ ដែលតែងតែអោយមន្ត្រីរដ្ឋបាលក្រុងណែនាំអប់រំម្ចាស់សំណង់ ដែលសាងសង់ផ្ទះ និងសណ្ឋាគាធំៗ ដាក់សម្ភារៈសំណង់រំលោភលើចិញ្ចើមផ្លូវ និងចុះរុះរើ និងបាញ់ថ្នាំ ណែនាំឲ្យម្ចាស់សំណង់រុះរើ ដោយខ្លួនឯងទៀតផង។
ក្នុងនោះលោក អ៊ី សុខឡេង អភិបាលក្រុងព្រះសីហនុ បានដាក់ចំណាត់ការ បង្កើតបញ្ជាការពារ ដាក់កម្លាំងប្រចាំការពេលយប់ ដើម្បីឃ្លាំមើល ម្ចាស់ការដ្ឋាន និងអ្នកស៊ីឈ្នួលដឹកកាកសំណល់ការដ្ឋាន លួចដឹកកាកសំណល់ការដ្ឋាន ចាក់ចោលតាមចិញ្ចើមផ្លូវសាធារណៈ ពេលយប់ទៀតផង៕
