ក្រោយពីឯកឧត្តម សុខ សុវណ្ណវឌ្ឍនាសាប៊ុង (វិល្លាម) ប្រធានគណបក្សខ្មែរក្រោក និងជាសមាជិកឧត្តមក្រុមប្រឹក្សាពិគ្រោះ និងផ្ដល់យោបល់ ក្នុងតួនាទីជាទីប្រឹក្សារដ្ឋាភិបាល ដែលបកអាក្រាតលោកផ្កាយ៤ ធឹម សុផា សណ្ដោងមួយពូជ២២នាក់ មកធ្វើការក្នុងអគ្គនាយកដ្ឋានសវនកម្មផ្ទៃក្នុងនេះ រហូតមកដល់នៅថ្ងៃទី១ ខែមីនានេះ ក្រសួងមហាផ្ទៃកម្ពុជា បានសម្រេចផ្ទេរភារកិច្ចមន្ត្រីចំនួន២នាក់ដែលជាប់សាច់ញាតិជាមួយនាយឧត្តមសេនីយ៍ ធឹម សុផា ទៅបម្រើការងារនៅអង្គនាយកដ្ឋានសវនកម្មផ្ទៃក្នុងវិញ ។
យោងតាមសេចក្តីប្រកាសព័ត៌មានរបស់អ្នកនាំពាក្យក្រសួងមហាផ្ទៃ បានឱ្យដឹងថា ក្រោយមានការរិះគន់ពីភាពមិនប្រក្រតីពាក់ព័ន្ធនឹងការចាត់តាំងក្រុមគ្រួសារសាច់ញាតិ នាយឧត្តមសេនីយ៍ ធឹម សុផា ឱ្យបម្រើការងារនៅអគ្គនាយកដ្ឋានសវកម្មផ្ទៃក្នុងនៃក្រសួងមហាផ្ទៃ ក្រសួងបានធ្វើការត្រួតពិនិត្យករណីនេះយ៉ាងល្អិតល្អន់ និង រកឃើញថា ក្នុងចំណោមមន្ត្រីនគរបាលជាតិចំនួន១១នាក់ ដែលត្រូវចោទប្រកាន់ខាងលើ មាន៦នាក់ ជាប់សាច់ញាតិ នាយឧត្តមសេនីយ៍ ធឹម សុផា ក្នុងនោះមាន៤នាក់ បម្រើការងារនៅអគ្គនាយកដ្ឋានសវនកម្មផ្ទៃក្នុង។
ផ្អែកលើលទ្ធផលនៃការត្រួតពិនិត្យនេះ ក្រសួងមហាផ្ទៃសម្រេចផ្ទេរភារកិច្ចមន្ត្រី២នាក់ ក្នុងចំណោម៤នាក់នោះ ឲ្យចេញទៅបម្រើការងារនៅអង្គភាពផ្សេង។ ដោយឡែកចំពោះសាច់ញាតិជាមន្ត្រីនគរបាលជាតិ២នាក់ ដែលបន្តបម្រើការងារនៅអគ្គនាយកដ្ឋានសវនកម្មផ្ទៃក្នុង ត្រូវអនុវត្តតួនាទី ភារកិច្ចរបស់ខ្លួនស្របតាមបទបញ្ញាតិ្ត ឬលក្ខន្តិកៈជាធរមាន។