√ បងប្រុស កញ្ញា ប៉េនីយ៉ាំង ត្រូវតារាសម្តែង លី ឡាវីន និងបក្ខពួក ព្រួតគ្នាវាយបែកក្បាល ក្នុងហាងចិន រួចបើករថយន្តគេចបាត់

ភ្នំពេញៈ បងប្រុសតារាសម្តែង ប៉េនីយ៉ាំង ត្រូវបានតារាសម្តែងស្រី លី ឡាវីន ហៅបក្ខពួកមកត្រួតគ្នាវាយ ក្នុងហាងអាហារបែបចិនមួយកន្លែង បណ្តាលឲ្យរបួសក្បាល រួចជនបង្កបាននាំគ្នាឡើងរថយន្ត Ranger Rover បើកគេចចេញពីកន្លែងកើតហេតុបាត់។

ហេតុការណ៍នេះ បានបង្កការភ្ញាក់ផ្អើលយ៉ាងខ្លាំងកាលពីវេលាម៉ោង៨៖១០នាទីយប់ថ្ងៃទី១៥ ខែមីនា ឆ្នាំ២០១៩ នៅត្រង់ចំណុចហាងផឹកស៊ីមួយកន្លែង យីហោ "សាច់អាំងបែបចិន" មានទីតាំងនៅជាប់រោងចក្របារី នៅលើផ្លូវជាតិលេខ២ ភូមិព្រែកតានូ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ។

ប្រភពព័ត៌មានពីអ្នកឃើញហេតុការណ៍ បានរៀបរាប់ប្រាប់ភ្នាក់ងារ ខេមប៉ុស្តិ៍ ឲ្យដឹងថា មុនពេលកើតហេតុ គេឃើញបុរស២នាក់ ជិះម៉ូតូមួយគ្រឿងឌុបគ្នា បានចូលផឹកស៊ីនៅក្នុងហាងកើតហេតុខាងលើ ដោយអង្គុយតុខាងក្នុង ក្រោយមកក៏ឃើញមានបុរស២នាក់ និងនារីរូបស្រស់ម្នាក់ទៀត ដែលគេស្គាល់ច្បាស់ថា កញ្ញា លី ឡាវិន ជាតារាសម្តែងម្នាក់ (ថតចម្រៀងកាយវិកាយ) បានបើករថយន្តស៊េរីទំនើបមួយគ្រឿង ម៉ាក Ragne Rover ដឹកគ្នាមកញាំអាហារនៅក្នុងហាងកើតហេតុនោះដែរ ដោយអង្គុយតុខាងមុខហាង នៅជាប់កន្លែងអាំងសាច់។

ប្រភពដដែលបន្តថា ក្រោយមកមិនដឹងថា មានរឿងអី្វទេ ស្រាប់តែមានបុរសម្នាក់ទៀត ពាក់ម៉ាសបិទមុខ (មិនស្គាល់អត្តសញ្ញាណ) ជិះម៉ូតូមិនចាំម៉ាកមួយគ្រឿង រួចមកនិយាយជាមួយកញ្ញា លី ឡាវីន និងបុរស២នាក់នោះ ក្រោយមកស្រាប់តែបុរស ដែលពាក់ម៉ាសនោះ បានកាន់មួកសុវត្ថិភាពមួយ ដើរសំដៅចូលទៅក្នុងហាង រួចធ្វើសកម្មភាពវាយក្បាលបុរសម្នាក់ដែលកំពុងចុចទូរស័ព្ទពីក្រោយ បែកមួកការពារខ្ទេច បណ្ដាលឲ្យបែកក្បាលចេញឈាម ហើយបុរសរងគ្រោះ ក៏ស្ទុះងើបមកប្រតាយប្រតប់ជាមួយបុរស ដែលពាក់ម៉ាសនោះ ហើយធ្លាក់ទូរស័ព្ទទៅលើតុ ភ្លាមនោះឃើញកញ្ញា លី ឡាវីន បានទាញកៅអីដែកមកវាយចំក្បាលបុរសរងគ្រោះថែមមួយកៅអីទៀត បណ្ដាលឲ្យបែកក្បាលហូរឈាមតែម្ដង ទើបបុរសរងគ្រោះស្ទុះរត់ចូលក្នុងបន្ទប់ទឹក បង្កឲ្យមានការភ្ញាក់ផ្អើលពេញក្នុងហាងអាហារចិនខាងលើនោះ ភ្លាមនោះភាគីកញ្ញា លី ឡាវីន និងបុរសពីរបីនាក់ទៀត នាំគ្នាឡើងលើរថយន្ត Ranger Rover បើកគេចចេញពីកន្លែងកើតហេតុបាត់ ។

ក្រោយមកសមត្ថកិច្ច បានចុះមកអន្តរាគមន៍ភ្លាមៗដែរ នឹងនាំយកជនរងគ្រោះទៅប៉ុស្តិ៍ ដើម្បីធ្វើការសាកសួរ និងដាក់ពាក្យបណ្ដឹងទៅតាមផ្លូវច្បាប់។

ជនរងគ្រោះ ឈ្មោះ ប្រាក់ ហាវ អាយុ៣០ឆ្នាំ មុខធ្វើការ ស្នាក់នៅខណ្ឌច្បារអំពៅ បានរៀបរាប់ប្រាប់សមត្ថកិច្ចថា នៅវេលាម៉ោង៧៖៣០នាទីយប់ថ្ងៃកើតហេតុ រូបគាត់បានជិះម៉ូតូជាមួយមិត្តភក្តិម្នាក់ទៀតឈ្មោះ ពេជ្រ មកហូបអាហារ និងផឹកស្រាជាមួយគ្នា នៅក្នុងហាងអាហារបែបចិន នៅជិតរោងចក្របារី ភូមិព្រែកតានូ សង្កាត់ចាក់អង្រែលើ ខណ្ឌមានជ័យ។

ជនរងគ្រោះបន្តថា ខណៈកំពុងអង្គុយផឹកស្រានៅតុខាងក្នុងហាង មានមនុស្សប្រុស២នាក់ និងមនុស្សស្រីម្នាក់ឈ្មោះ លី ឡាវីន ដែលរូបគេធ្លាប់ស្គាល់ ជាតារាសម្ដែងកាយវិកាចូលមកហាងផឹកស៊ីហាងនេះដែរ តែអង្គុយនៅខាងមុខហាង ខណៈអង្គុយផឹកស្រា២នាក់មិត្តភក្តិ ស្រាប់តែអ្នកទាំង៣នាក់នោះដើរសំដៅមកតុគាត់ រួចមនុស្សប្រុសម្នាក់ បានយកមួកសុវត្ថិភាពវាយមកលើគាត់ពីក្រោយចំក្បាល បែកមួកការពារ និងបែកក្បាល ហើយយកទូរស័ព្ទ iphone x គាត់ រួចឡើងរថយន្ត បើកចេញទៅបាត់។

ក្រោយកើតហេតុ ជនរងគ្រោះបានទៅដាក់ពាក្យបណ្ដឹងនៅស្នាក់ការប៉ុស្តិ៍នគរបាលចាក់អង្រែលើ ដើម្បីឲ្យសមត្ថកិច្ចហៅភាគីបង្កមកធ្វើការដោះស្រាយតាមច្បាប់។ ជុំវិញរឿងនេះដែរ ភ្នាក់ងារសារព័ត៌មានខេមប៉ុស្តិ៍ នៅមិនទាន់ទទួលបានការបំភ្លឺពីភាគីតារាសម្តែង លី ឡាវីន នៅឡើយទេ ពាក់ព័ន្ធនិងករណីនេះ៕