ភ្នំពេញៈ មន្ត្រីនគរបាលស្រុកជើងព្រៃម្នាក់ បានយកកាំភ្លើងអាកាកាត់ស្វាយ បាញ់សម្លាប់ខ្លួនឯង បង្កឲ្យមានការភ្ញាក់ផ្អើលកាលពីវេលាម៉ោង១២ថ្ងៃត្រង់ ទី៤ ខែមីនា ឆ្នាំ២០១៩ ស្ថិតក្នុងប៉ុស្តិ៍នគរបាលរដ្ឋបាលឃុំព្រៃចារ ស្រុកជើងព្រៃ។
មន្រ្តីនគរបាល ដែលបាញ់សម្លាប់ខ្លួនឯងនោះ ឈ្មោះ ស៊ុន ចាន់ពិសី ភេទប្រុស អាយុ២៩ឆ្នាំ ឋានន្តរស័ក្តិអនុសេនីយទោ ជាមន្ត្រីនគរបាលរដ្ឋបាលឃុំព្រៃចារ នៃអធិការដ្ឋាននគរបាលស្រុកជើងព្រៃ បានយកអាវុធអាកាកាត់ស្វាយនៅក្នុងប៉ុស្តិ៍ បាញ់សម្លាប់ខ្លួនឯងចំនួន១គ្រាប់ចំលើស្នៀតផ្កាខាងស្តាំ បណ្តាលឲ្យស្លាប់នៅក្នុងបន្ទប់ធ្វើការរបស់ខ្លួនភ្លាមៗ ដោយសារមានជំងឺប្រចាំកាយក្នុងខ្លួន។
សាកសពក្រោយពីការពិនិត្យរបស់ក្រុមជំនាញការងារនគរបាលព្រហ្មទណ្ឌ ជំនាញបច្ចេកទេសស្រុក និងខេត្ត បញ្ជាក់ថា លោក ស៊ុន ចាន់ពីសី បានបើកទូយកអាវុធបាញ់សម្លាប់ខ្លួនឯងពិតប្រាកដមែន។ ពិនិត្យចប់ សាកសពបានប្រគល់ឲ្យក្រុមគ្រួសារយក ទៅធ្វើបុណ្យតាមប្រពៃណី៕