ភ្នំពេញៈ អគ្គិភ័យឆាបឆេះផ្ទះស្តុកទុកគ្រឿងអគ្គិសនី និងគ្រឿងអេឡិចត្រូនិកមួយកន្លែង បង្កការភ្ញាក់ផ្អើលយ៉ាងខ្លាំងដល់បងប្អូនប្រជាពលរដ្ឋ និងសមត្ថកិច្ច ព្រមទាំងរថយន្តពន្លត់អគ្គិភ័យ ចេញជួយអន្តរាគមន៍បាញ់ពន្លត់ ខណៈដែលសម្ភារៈមួយចំនួនធំ ត្រូវបានខូចខាត និងបុរសវ័យចំណាស់ម្នាក់រងរបួស ហើយត្រូវបានបញ្ជូនតាមរថយន្តសាមុយយកទៅមន្ទីរពេទ្យ។
អគ្គិភ័យនេះ ឡើងកាលពីវេលាម៉ោងជាង៩យប់ថ្ងៃចន្ទ ទី១១ ខែមីនា ឆ្នាំ២០១៩ នៅត្រង់ចំណុចផ្ទះល្វែងលេខ២៣AB ដែលមានម្ចាស់ជាជនជាតិចិន ជួលស្តុកគ្រឿងអគ្គិសនី និងគ្រឿងអេឡិចត្រូនិក ម៉ាក KAMISAFE នៅតាមបណ្ដោយផ្លូវ៣៤៨ កែងផ្លូវលេខ១៤៣ ស្ថិតក្នុងសង្កាត់បឹងកេងកងទី៣ ខណ្ឌចំការមន រាជធានីភ្នំពេញ។
ប្រជាពលរដ្ឋឃើញហេតុការណ៍ បានប្រាប់ឲ្យភ្នាក់ងារខេមប៉ុស្តិ៍ ដឹងថា មុនពេលកើតហេតុ គាត់បានឃើញផ្សែងខ្មួលខ្មាញ់ចេញពីក្នុងផ្ទះ ដែលស្តុកគ្រឿងអគ្គិសនី និងគ្រឿងអេឡិចត្រូនិកយ៉ាងខ្លាំង ភ្លាមៗនោះអ្នកដែលបានឃើញហេតុការណ៍ បានស្រែកហៅឆោឡោ ដើម្បីឲ្យប្រជាពលរដ្ឋជួយទាក់ទងទៅសមត្ថកិច្ចមូលដ្ឋាន ដើម្បីធ្វើការសហការគ្នាជាមួយនឹងសមត្ថកិច្ចជំនាញផ្នែកពន្លត់អគ្គិភ័យ ឲ្យចុះមកធ្វើការអន្តរាគមន៍ជាបន្ទាន់ផងដែរ។
មិនបានប៉ុន្មានផង ស្រាប់តែឃើញមានរថយន្តពន្លត់អគ្គិភ័យជាច្រើនគ្រឿង បានមកដល់កន្លែងកើតហេតុជាបន្តបន្ទាប់ តែដោយសារផ្ទះកើតហេតុ បានចាក់សោរបងផង និងចាក់សោទ្វារខាងក្នុងទៀត ទើបសមត្ថកិច្ចធ្វើការកាត់ផ្ដាច់សោចូលទៅវាយបំបែកកញ្ចក់ ដើម្បីឲ្យក្រុមពន្លត់អគ្គិភ័យធ្វើការបាញ់ពន្លត់ ដោយប្រើប្រាស់រថយន្តពន្លត់អគ្គិភ័យអស់ទឹកជាច្រើនគ្រឿង ទើបរលត់ជាស្ថាពរនៅវេលាម៉ោង១១៖៣០នាទីយប់ថ្ងៃដដែល។
នៅក្នុងប្រតិបត្តិការពន្លត់អគ្គិភ័យនេះ លោក ព្រហ្ម យ៉ន នាយការិយាល័យបង្ការ និងពន្លត់អគ្គិភ័យ ដឹកនាំកម្លាំងចុះធ្វើការអន្តរាគមន៍ផ្ទាល់ ដោយប្រើរថយន្តពន្លត់អគ្គិភ័យ២៤គ្រឿង បានចេញមកជួយអន្តរាគមន៍ បាញ់ពន្លត់អស់ជាច្រើនគ្រឿង ទើបអាចទប់ស្កាត់នៃការឆេះនេះ មិនឲ្យរាលដាលទៅផ្ទះនៅជាប់គ្នានោះឡើយ។
ហេតុការណ៍នេះ ក៏បណ្តាលឲ្យមានបុរសវ័យចំណាស់ម្នាក់ បានរងរបួសរអិលដួលផ្ងាក្រោយ ខណៈគាត់ប្រមូលសម្ភារៈយកចេញមកក្រៅ ទាំងភ័យស្លន់ស្លោ ទើបធ្វើឲ្យរអិលជើងដួលផ្ងាក្រោយ នៅមុខផ្ទះរបស់គាត់ ជាប់ផ្ទះកំពុងឆេះនោះ ហើយត្រូវបានសមត្ថកិច្ចជួយគ្រាទៅកាន់កន្លែងមានសុវត្ថិភាព និងត្រូវក្រុមគ្រួសារហៅរថយន្តសង្គ្រោះបន្ទាន់គ្លីនិកឯកជនមួយគ្រឿង មកដឹកយកទៅសង្គ្រោះភ្លាមៗនៅឯមន្ទីរពេទ្យ។ ចំណែកឯសម្ភារៈមួយចំនួនធំ ដែលស្តុក នៅជាន់ខាងលើ ត្រូវបានអណ្ដាតភ្លើងឆាបឆេះខ្ទេច គ្មានសល់អ្វីឡើយ។
សមត្ថកិច្ច បានអោយដឹងថា ក្រោយកើតហេតុ គេឃើញមានជនជាតិចិនប្រុសស្រី២នាក់ ដែលជាម្ចាស់ផ្ទះនោះ បានត្រឹមតែឈរមើល និងសោកស្ដាយចំពោះសម្ភារៈ ដែលត្រូវបានអគ្គិភ័យបំផ្លាញអស់មួយចំនួនធំនោះ ហើយចិនប្រុសស្រីទាំង២នាក់នោះ ក៏ត្រូវបានសមត្ថកិច្ចធ្វើការសាកសួរ និងបំភ្លឺផងដែរ។
សមត្ថកិច្ចបន្ថែមថា ករណីអគ្គិភ័យខាងលើនេះ មិនបានបង្កអោយឆេះរាលដាលដល់ផ្ទះអ្នកជិតខាងនោះទេ គ្រាន់តែរោលផ្សែងខ្មៅតែប៉ុណ្ណោះ គឺខូតខាតតែសម្ភារៈ គ្រឿងអគ្គិសនីសម្រាប់លក់មួយចំនួនធំ ដែលនៅក្នុងផ្ទះជាន់ទី១ ដែលមានទំហំ៤ម៉ែត្រគុណ១៦ម៉ែត្រ ជាប្រភេទផ្ទះថ្មល្វែង ត្រូវឆេះខូចខាតអស់ទាំងស្រុង ចំពោះមូលហេតុ គឺបណ្តាលមកពីឆ្លងចរន្តអគ្គិសនី(ទុស្សេខ្សែភ្លើង)៕
