ភ្នំពេញៈ តាមការគ្រោងទុកនៅម៉ោង៨ព្រឹក ថ្ងៃទី១២ ខែមីនា ឆ្នាំ២០១៩នេះ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នឹងអញ្ជើញជាអធិបតីភាព ក្នុងពិធីកម្ទេចចោលផលិតផលក្លែងក្លាយ ខុសច្បាប់ ចំនួន ៧០តោន។
ពិធីកម្ទេចចោលផលិតផលក្លែងក្លាយ ខុសច្បាប់ទាំងនេះ ត្រូវអនុវត្តតាមការបង្គាប់របស់តុលាការ ដែលនឹងធ្វើឡើងនៅទីលានដីទំនេរ តាមបណ្តោយមហាវិថីសម្តេចតេជោ (ហៅផ្លូវ ៦០ម៉ែត្រ) ក្នុងសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ។
សេចក្តីប្រកាសព័ត៌មាន របស់គណៈកម្មាធិការប្រយុទ្ធប្រឆាំងផលិតផលក្លែងក្លាយ ដែលបង្កគ្រោះថ្នាក់មានហានិភ័យខ្ពស់ដល់សុខភាព និងសុវត្ថិភាពសង្គម ដឹកនាំដោយនាយឧត្តមសេនីយ៍ មៀច សុផាន់ណា បង្ហាញថា ផលិតផលក្លែងក្លាយ ខុសច្បាប់ ចំនួន ៧០តោន ដែលនឹងកិនកម្ទេចនាព្រឹកថ្ងៃទី១២មីនាស្អែកនេះ ត្រូវបានបង្ក្រាបរឹបអូសពីជនល្មើស ដែលចរាចរ ស្តុកទុក ផលិត និងចែកចាយនាពេលកន្លងមក។
សូមរំឭកថា កន្លងមក យ៉ាងហោចណាស់ មាន ៣លើករួចមកហើយ ដែលគណៈកម្មាធិការប្រយុទ្ធប្រឆាំងផលិតផលក្លែងក្លាយ ដែលបង្កគ្រោះថ្នាក់មានហានិភ័យខ្ពស់ដល់សុខភាព និងសុវត្ថិភាពសង្គម បានរៀបចំពិធីកិនកម្ទេចផលិតផលក្លែងក្លាយខុសច្បាប់ ក្រោមអធិបតីភាពដ៏ខ្ពង់ខ្ពស់របស់សម្តេចក្រឡាហោម ស ខេង។
ពិធីកម្ទេចផលិតផលខូចគុណភាព និងខុសច្បាប់ទាំងនោះ រួមមាន៖ កាលពីថ្ងៃទី០៣ ខែតុលា ឆ្នាំ២០១៧ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអញ្ជើញជាអធិបតីដ៏ខ្ពង់ខ្ពស់ក្នុងពិធីកម្ទេចផលិតផលគ្រឿងសម្អាង ក្លែងក្លាយ ខុសច្បាប់ ចំនួន ៨១ តោន នៅទីលានចាក់សំរាម ស្ថិតនៅសង្កាត់ជើងឯក ខណ្ឌដង្កោ រាជធានីភ្នំពេញ។
កាលពីថ្ងៃទី០៣ ខែមេសា ឆ្នាំ២០១៨ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអញ្ជើញជាអធិបតី ក្នុងពិធីកម្ទេចផលិតផលក្លែងក្លាយខុសច្បាប់ ចំនួនប្រមាណជាង ១១០តោន នៅបរិវេណជាប់នឹងសាលាសង្កាត់បឹងជើងឯក ខណ្ឌដង្កោ រាជធានីភ្នំពេញ។
កាលពីព្រឹកថ្ងៃទី១៤ ខែមិថុនា ឆ្នាំ២០១៨ សម្តេចក្រឡាហោម ស ខេង បានអញ្ជើញជាអធិបតីភាពដ៏ខ្ពង់ខ្ពស់ក្នុងពិធីកម្ទេចផលិតផលចំណីអាហារក្លែងក្លាយ ហួសកាលបរិច្ឆេទ និងខុសច្បាប់ ដែលបង្កឲ្យប៉ះពាល់ដល់សុខភាពយ៉ាងធ្ងន់ធ្ងរ ចំនួនជាង ១០០តោន។ ពិធីកម្ទេចចោលផលិតផលទាំងនេះ បានធ្វើឡើង នៅភូមិថ្មីពីងពុង ឃុំដំណាក់រាំង ស្រុកឧដុង្គ ខេត្តកំពង់ស្ពឺ។
សូមបញ្ជាក់ថា ផលិតផល និងចំណីអាហារខូចគុណភាព ដែលត្រូវបានកម្ទេចចោលរាប់រយតោនទាំងនោះ មានផ្ទុកសារធាតុគីមី ប៉ះពាល់ដល់សុខភាពប្រជាពលរដ្ឋ ដែលឧក្រិដ្ឋជន បានចរាចរ ចែកចាយ និងផលិត ដូចជា បារី សុរា ឱសថក្លែងក្លាយ គ្រឿងសម្អាងក្លែងក្លាយ ផលិតផលពីសាច់សត្វដោយខុសច្បាប់ ផលិតផលទឹកស៊ីអ៊ីវ ទឹកសៀង ទឹកម្ទេស ទឹកខ្មេះ ប្រេងខ្យង ជាដើម៕
