ត្បូងឃ្មុំៈ លោក ទន់ ចាន់ធី ដែលទើបនឹងប្រកាសចូលកាន់តំណែងជាប្រធានសាខាគយខេត្ត ត្បូងឃ្មុំ កាលពីថ្ងៃទី១៥ ខែមីនា ឆ្នាំ២០១៩ ត្រូវបានមន្ត្រីគយ និងភ្នាក់ងារគយខេត្តត្បូងឃ្មុំមួយចំនួន បានលួចបង្ហើបឱ្យដឹងថា កំពុងប្រើតួនាទី និងអំណាចរបស់ខ្លួន ធ្វើអ្វីៗតាមអំពើចិត្ត។
ប្រភពដដែល បានឱ្យដឹងទៀតថា ប្រហែលលោក ទន់ ចាន់ធី ចំណាយដើមទុនយ៉ាងច្រើន ក្នុងការទទួលបានតំណែងជាប្រធានសាខាគយខេត្តត្បូងឃ្មុំ ទើបខំប្រឹងស្រង់ដើមយ៉ាង តក់ក្រហល់ ដោយគ្មានខ្លាចក្រែងអ្វីទាំងអស់ ហើយមិនខ្វល់ពីការរិះគន់នោះទេ។ ដូច្នេះហើយ ទើបមានសេចក្ដីអំពាវនាវឱ្យលោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ក៏ដូចជា លោក គុណ ញឹម អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា ចាត់វិធានការ ទប់ស្កាត់ទង្វើមិនប្រក្រតីរបស់លោក ទន់ ចាន់ធី ខ្លះផង ដើម្បីឱ្យស្របតាមវិធានការកែទម្រង់ ស៊ីជម្រៅក្នុងស្ថាប័នគយ។
ប្រភពដែលស្និទ្ធនឹងលោក ទន់ ចាន់ធី បានទម្លាយឲ្យដឹងថា កាលនៅធ្វើជាអនុប្រធានសាខាគយខេត្តកោះកុង លោក ទន់ ចាន់ធី មានជំនាញខាងប្រព្រឹត្តអំពើពុករលួយ តាមច្រើនរូបភាព ដោយមានការឃុបឃិតពីសំណាក់លោក សំ កុសល ប្រធានសាខាគយខេត្តកោះកុងផងដែរ ។ ដោយសារមានជំនាញខាងប្រព្រឹត្តអំពើពុករលួយនោះហើយ ទើបលោក ទន់ ចាន់ធី មាន ដើមទុន ដើម្បីទទួលបានតំណែងជាប្រធានសាខាគយខេត្តត្បូងឃ្មុំយ៉ាងសុខស្រួល ។
ប្រភពជិតស្និទ្ធដដែល បន្តថា ក្រោយប្រកាសចូលកាន់តំណែងប្រធានសាខាគយខេត្តត្បូងឃ្មុំ កាលពីព្រឹកថ្ងៃទី១៥ ខែមីនា ឆ្នាំ២០១៩ លោក ទន់ ចាន់ធី មិនទាន់ចាត់វិធានការ ទប់ស្កាត់ ករណីឈ្មួញនាំចូលទំនិញគេចពន្ធ ទំនិញបង់ពន្ធមិនគ្រប់ និងទំនិញខុសច្បាប់ តាមច្រកព្រំដែន ក្នុងស្រុកពញាក្រែក និងស្រុកមេមត់ ខេត្តត្បូងឃ្មុំ នៅឡើយទេ។
ដោយឡែកប្រភពពីសមត្ថកិច្ចពាក់ព័ន្ធ តាមច្រកព្រំដែន ក្នុងស្រុកមេមត់ និងស្រុកពញាក្រែក ខេត្តត្បូងឃ្មុំ បានបង្ហើបឱ្យដឹងថា រយៈពេល១២ថ្ងៃ នៃការចូលកាន់តំណែងជាប្រធានសាខាគយខេត្តត្បូងឃ្មុំរបស់លោក ទន់ ចាន់ធី គឺលោកមិនទាន់ចាត់វិធានការ ទប់ស្កាត់ អំពើពុករលួយ និងទង្វើមិនប្រក្រតីរបស់មេគយប្រចាំច្រកព្រំដែន ក្នុងស្រុកមេមត់ និងស្រុក ពញាក្រែក នៅឡើយទេ។ ផ្ទុយទៅវិញ លោក ទន់ ចាន់ធី នៅតែបណ្ដោយឱ្យមេគយតាមច្រកទ្វារអន្តរជាតិ និងច្រកព្រំដែន ក្នុងស្រុកពញាក្រែក និងស្រុកមេមត់ ឃុបឃិតឱ្យឈ្មួញនាំចូលទំនិញគេចពន្ធ និងទំនិញ បង់ពន្ធមិនគ្រប់ យ៉ាងពេញបន្ទុកដដែល។
ប្រភពបានឱ្យដឹងទៀតថា ឈ្មួញធំៗ នៅតែបន្តនាំចូលទំនិញគេចពន្ធ ទំនិញបង់ពន្ធមិនគ្រប់ និងទំនិញខុសច្បាប់យ៉ាងរលូន ហើយឈ្មួញទាំងនោះ កំពុងភ្ជាប់ទំនាក់ទំនងយ៉ាងជិតស្និទ្ធ ជាមួយលោកប្រធានសាខាគយខេត្តត្បូងឃ្មុំ ដើម្បីឱ្យមុខជំនួញរបស់ពួកគេ ប្រព្រឹត្តទៅដោយ រលូន៕
ផ្ដល់សិទ្ធិដោយ៖ campost.news