ស្វាយរៀងៈ ក្មេងស្រី២នាក់ និងក្មេងប្រុសម្នាក់ នាំជិះទូកទៅរាវរកគ្រំ ក្នុងព្រែកដូនស ហើយលិចទូក បណ្តាលឲ្យលង់ទឹកស្លាប់ទាំង៣នាក់ យ៉ាងអាណោចអាធ័មបំផុត។
ហេតុការណ៍នេះ បានកើតឡើងកាលពីនៅវេលាម៉ោង៨ព្រឹកថ្ងៃទី២៨ ខែមីនា ឆ្នាំ២០១៩ នៅព្រែកដូនស ស្ថិតក្នុងភូមិដូនស ឃុំដូនស ស្រុកស្វាយជ្រំ ខេត្តស្វាយរៀង។
សមត្ថកិច្ច បានអោយដឹងថា ក្មេងរងគ្រោះទាំងបីនាក់ ទី១.ឈ្មោះ ជុន ស្រីនាង ភេទស្រី អាយុ១៤ឆ្នាំ ២.ឈ្មោះ ជុន ស្រីនីត ភេទស្រី អាយុ ១២ឆ្នាំ និង៣.ឈ្មោះ លី ធារ៉ា ភេទប្រុស អាយុ១២ឆ្នាំ អ្នកទាំងបី ជាសិស្សសាលាបឋមសិក្សាល្ងើន រស់នៅភូមិឃុំកើតហេតុខាងលើ។
ក្រោយពីសមត្ថកិច្ចទទួលបានព័ត៌មានភ្លាម សមត្ថកិច្ចបានទៅដល់កន្លែងកើតហេតុ និងធ្វើកោសល្យវិច័យ រួចបានប្រគល់ជូនឪពុកម្តាយ យកទៅធ្វើបុណ្យតាមប្រពៃណី។
សូមបញ្ជាក់ ៖ ឪពុកម្ដាយក្មេងរងគ្រោះទាំង៣នាក់ខាងលើនេះ មានជីវភាពខ្វះខាត៕
