មណ្ឌលគិរីៈ សេចក្តីរាយការណ៍ បានឱ្យដឹងថា នាព្រឹកថ្ងៃទី១ មីនា នេះ អាជ្ញាធរខេត្តមណ្ឌលគិរី កំពុងជួបប្រជុំបន្ទាន់ជាមួយគណៈកម្មធិការគ្រប់គ្រងភ្នំដោះក្រមុំ និងបណ្តាអ្នកពាក់ព័ន្ធនានា ដើម្បីរកដំណោះស្រាយលើករណីដីនៅតំបន់ភ្នំដោះក្រមុំ ដែលរងការទន្ទ្រានពីមនុស្សមួយក្តាប់តូចមកនោះ។ គួររំលឹកថា ការប្រជុំនេះ បានធ្វើឡើង ក្រោយពីមានបទបញ្ជាពីសម្តេចតេជោ ប្រមុខរាជរដ្ឋាភិបាលកម្ពុជា ឱ្យដកហូតយកដីទាំងនោះមកគ្រប់គ្រង ជាសម្បត្តិសាធារណៈវិញ។
គួរបញ្ជាក់ទៀតថា ជនជាតិដើមភាគតិច ដែលរស់នៅក្នុងខេត្តមណ្ឌលគិរី មានការសប្បាយរីករាយជាខ្លាំង ក្រោយទទួលព័ត៌មានថា សម្តេចតេជោ ហ៊ុន សែន បានចេញបញ្ជាឲ្យអាជ្ញាធរខេត្តមណ្ឌលគិរី ត្រូវរឹបអូសដីភ្នំដោះក្រមុំ ទុកជាសម្បត្តិរដ្ឋវិញ កាលពីរសៀលថ្ងៃទី២៨ កុម្ភៈ ២០១៩ ដែលរងការទន្ទ្រានពីមនុស្សមួយក្តាប់តូច ទុកជាកម្មសិទ្ធិបុគ្គល។
លោក សី ទូច ប្រធានមន្ទីរវប្បធម៌ និងវិចិត្រសិល្បៈខេត្តមណ្ឌលគិរី បានសម្តែងក្តីត្រេកអរជាអនេកផងដែរ ក្រោយសម្តេចតេជោ ប្រមុខរាជរដ្ឋាភិបាលកម្ពុជា បានសម្រេចឲ្យអាជ្ញាធរខេត្តត្រូវដកហូតដីនៅតំបន់ភ្នំដោះក្រមុំ ទុកជាសម្បត្តិសាធារណៈនេះវិញ។
លោកប្រធានមន្ទីរបានបញ្ជាក់យ៉ាងខ្លីថា ក្នុងនាមលោកជាអ្នកគ្រប់គ្រង នឹងធ្វើការងារក្នុងផ្នែកវប្បធម៌ ពិតជាមានការសប្បាយចិត្តរកអ្វីមកបប្រៀបផ្ទឹមបានឡើយ ព្រោះតែថ្នាក់ដឹកនាំកំពូល បានយកចិត្តទុកដាក់ដល់តំបន់សក្ការៈបូជារបស់អ្នកខេត្តមណ្ឌលគិរី ជាពិសេសទីនេះជាកន្លែងប្រមូលផ្តុំបងប្អូនជនជាតិដើមទាំង៥ ក្រុងស្រុករស់នៅតំបន់នេះ សម្រាប់ប្រារព្ធពិធីបែបប្រពៃណី នឹងជាមជ្ឈមណ្ឌលទេសចរដ៏សំខាន់របស់ខេត្តមណ្ឌលគិរីផងដែរ។
ជុំវិញព័ត៌មានខាងលើនេះ កាលពីវេលាម៉ោង៧៖៤៥នាទីយប់ថ្ងៃទី២៨ ខែកុម្ភៈ លោកស្វាយ សំអ៊ាង អភិបាលខេត្តមណ្ឌលគិរី បានឲ្យដឹងដែរថា «បញ្ហាដីភ្នំដោះក្រមុំនេះ កន្លងមកយើងក៏បានខិតខំដោះហើយ ប៉ុន្តែនៅមិនទាន់ចប់សព្វគ្រប់ ដោយសារភាគីមួយចំនួន នៅតែតវ៉ានៅតែជំទាស់ ហើយនៅថ្ងៃមិញនេះ (ថ្ងៃទី២៨) ខេត្តទទួលបានបទបញ្ជាពីសម្តេចតេជោ ដូច្នេះនៅថ្ងៃទី១ មីនា នេះ គណៈអភិបាលខេត្ត នឹងមានការប្រជុំបន្ទាន់មួយ ដើម្បីចាត់ការរឿងនេះ ហើយនឹងមាននិតិវិធីដើម្បីដោះស្រាយបញ្ហានេះ ទៅតាមអ្វីដែលជាអនុសាសន៍ណែនាំរបស់សម្តេចតេជោ»៕
