√ ស្រវឹងស្រាជោកជាំ បើករថយន្តទាំងដោះអាវ ក្នុងល្បឿនលឿន ជ្រុលទៅបុកខឿនពុះចែកទ្រូងផ្លូវ ខូចខាតរថយន្តយ៉ាងដំណំ

ភ្នំពេញៈ បុរសម្នាក់ ស្រវឹងស្រាជោកជាំ បើករថយន្តព្រូសទាំងដោះអាវ ក្នុងល្បឿនលឿន មកដល់ផ្លូវកោងគល់ស្ពានព្រះមុនីវង្ស(ស្ពានច្បារអំពៅ) ជ្រុលឡើងលើខឿនពុះចែកទ្រូងផ្លូវ បណ្តាលឲ្យរថយន្ត រងការខូចខាតយ៉ាងដំណំ ភ្លាមៗនោះ ត្រូវបានបងប្អូនក្រុមអ្នករត់ម៉ូតូឌុប ជួយ រុញចុះពីលើខឿន រួចប្រញាប់បន្តដំណើរទាំងបែកកង់ ដើម្បីគេចចេញពីកន្លែងកើតហេតុ រួចទៅឈប់នៅក្រោមស្ពានអាកាសក្បាលថ្នល់។

គ្រោះថ្នាក់ចរាចរណ៍នេះ បានកើតមានឡើង នៅវេលាម៉ោង១៖៣៥នាទីយប់រំលងអធ្រាត្រ ឈានចូលថ្ងៃចន្ទ ទី២៥ ខែមីនា ឆ្នាំ២០១៩ នៅត្រង់ចំណុចស្ពានព្រះមុនីវង្សថ្មី (ស្ពានច្បារអំពៅ) តាមបណ្តោយផ្លូវជាតិលេខ១ ព្រំប្រទល់ សង្កាត់ច្បារអំពៅទី១ និង សង្កាត់ច្បារអំពៅ ២ ខណ្ឌច្បារអំពៅ រាជធានីភ្នំពេញ។

ប្រភពព័ត៌មានពីកន្លែងកើតហេតុ បានរៀបរាប់ប្រាប់ឲ្យដឹងថា មុនពេលកើតហេតុ គេឃើញរថយន្តមួយគ្រឿង ម៉ាក TOYOTA PRIUS ពណ៌ត្រាវ ពាក់ស្លាកលេខភ្នំពេញ 2AY-0903 បើកបរដោយបុរសម្នាក់ ក្នុងស្ថានភាពស្រវឹង ហើយបើករថយន្តទាំងដោះអាវ បានធ្វើដំណើរចុះពីស្ពានព្រះមុនីវង្ស ក្នុងទិសដៅពីលិចមកកើត លុះមកដល់ចំណុចផ្លូវកោងគល់ស្ពានព្រះមុនីវង្ស ស្រាប់តែរថយន្តបានជ្រុលចង្កូតឡើងលើខឿនផ្លូវចែកផ្លូវ បណ្តាលឲ្យរថយន្ត រងការខូចខាតយ៉ាងដំណំ និងធ្លាក់កាងផ្នែកខាងក្រោយ ព្រមទាំងបែកកង់មុខខាងស្តាំផងដែរ។

ភ្លាមៗនោះម្ចាស់រថយន្តបង្ក បានប្រាប់ឲ្យបងអ្នករត់ម៉ូតូឌុបនៅកន្លែងកើតហេតុ ជួយរុញរំកិលចុះពីលើខឿន ហើយបើកបានបើកទៅទាំងបែកកង់ បន្ដដំណើរឡើងស្ពានព្រះមុនីវង្ស(ចាស់) ទៅឈប់នៅក្រោមស្ពានអាកាសក្បាលថ្នល់ ដើម្បីគេចចេញពីកន្លែងកើតហេតុសិន។

ក្រោយកើតហេតុ សមត្ថកិច្ចដែលប្រចាំការនៅផ្លូវជាតិលេខ១ កែងផ្លូវ៣៦៩ (គល់ស្ពានច្បារអំពៅ) ដែលនៅក្បែរកន្លែងកើតហេតុមិនព្រមចេញអន្តរាគមន៍នោះទេ បានត្រឹមតែឈរមើល រថយន្ត បើកចេញទៅធ្វើព្រងើយ៕