ភ្នំពេញៈ បំផ្លាញចោលទឹកសុទ្ធ Evian ក្លែងក្លាយ ថ្នាំពេទ្យ និងផលិតផលគ្រឿងឧបភោគ បរិភោគ ជាច្រើនផ្សេងទៀត សរុបជាង៧០តោន នៅព្រឹកថ្ងៃទី១២ ខែមីនា ឆ្នាំ២០១៩នេះ ក្រោមអធិបតីភាពសម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ។
មន្ដ្រីជំនាញបញ្ជាក់ថា ទឹកសុទ្ធ Evian ក្លែងក្លាយជាច្រើនពាន់កេសនេះ ត្រូវបានឈ្មួញលួចផលិតនៅក្នុងប្រទេសកម្ពុជា តែត្រូវបានគណៈកម្មាធិការប្រយុទ្ធប្រឆាំងផលិតផលក្លែងក្លាយ ធ្វើការបង្ក្រាបបានកាលពីថ្មីៗកន្លងទៅ ហើយនៅពេលដែលមន្ត្រីជំនាញយកទឹក Evian នេះទៅធ្វើការពិសោធន៍ បានរកឃើញថា មានមេរោគនៅក្នុងទឹកនោះ។
ពិធីកម្ទេចចោលផលិតផលក្លែងក្លាយខុសច្បាប់ទាំងនេះ ត្រូវអនុវត្តតាមការបង្គាប់របស់តុលាការ ដែលនឹងធ្វើឡើងនៅទីលានដីទំនេរ តាមបណ្តោយមហាវិថីសម្តេចតេជោ (ហៅផ្លូវ ៦០ម៉ែត្រ) ក្នុងសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ។
សេចក្តីប្រកាសព័ត៌មាន របស់គណៈកម្មាធិការប្រយុទ្ធប្រឆាំងផលិតផលក្លែងក្លាយ ដែលបង្កគ្រោះថ្នាក់មានហានិភ័យខ្ពស់ដល់សុខភាព និងសុវត្ថិភាពសង្គម ដឹកនាំដោយលោកនាយឧត្តមសេនីយ៍ មៀច សុផាន់ណា បានបង្ហាញថា ផលិតផលក្លែងក្លាយខុសច្បាប់ ចំនួន៧០តោន ដែលនឹងកិនកម្ទេចនាព្រឹកថ្ងៃទី១២ ខែមីនាស្អែកនេះ ត្រូវបានបង្ក្រាបរឹបអូសពីជនល្មើស ដែលចរាចរ ស្តុកទុក ផលិត និងចែកចាយនាពេលកន្លងមក។
សូមរម្លឹកថា កន្លងមក យ៉ាងហោចណាស់ មាន៣លើករួចមកហើយ ដែលគណៈកម្មាធិការប្រយុទ្ធប្រឆាំងផលិតផលក្លែងក្លាយ ដែលបង្កគ្រោះថ្នាក់មានហានិភ័យខ្ពស់ដល់សុខភាព និងសុវត្ថិភាពសង្គម បានរៀបចំពិធីកិនកម្ទេចផលិតផលក្លែងក្លាយខុសច្បាប់ ក្រោមអធិបតីភាពដ៏ខ្ពង់ខ្ពស់របស់សម្តេចក្រឡាហោម ស ខេង។
ពិធីកម្ទេចផលិតផលខូចគុណភាព និងខុសច្បាប់ទាំងនោះ រួមមាន៖ កាលពីថ្ងៃទី៣ ខែតុលា ឆ្នាំ២០១៧ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអញ្ជើញជាអធិបតីដ៏ខ្ពង់ខ្ពស់ក្នុងពិធីកម្ទេចផលិតផលគ្រឿងសម្អាង ក្លែងក្លាយ ខុសច្បាប់ ចំនួន៨១ តោន នៅទីលានចាក់សំរាម ស្ថិតនៅសង្កាត់ជើងឯក ខណ្ឌដង្កោ រាជធានីភ្នំពេញ។
កាលពីថ្ងៃទី៣ ខែមេសា ឆ្នាំ២០១៨ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអញ្ជើញជាអធិបតី ក្នុងពិធីកម្ទេចផលិតផលក្លែងក្លាយខុសច្បាប់ ចំនួនប្រមាណជាង១១០តោន នៅបរិវេណជាប់នឹងសាលាសង្កាត់បឹងជើងឯក ខណ្ឌដង្កោ រាជធានីភ្នំពេញ។
កាលពីព្រឹកថ្ងៃទី១៤ ខែមិថុនា ឆ្នាំ២០១៨ សម្តេចក្រឡាហោម ស ខេង បានអញ្ជើញជាអធិបតីភាពដ៏ខ្ពង់ខ្ពស់ក្នុងពិធីកម្ទេចផលិតផលចំណីអាហារក្លែងក្លាយ ហួសកាលបរិច្ឆេទ និងខុសច្បាប់ ដែលបង្កឲ្យប៉ះពាល់ដល់សុខភាពយ៉ាងធ្ងន់ធ្ងរ ចំនួនជាង១០០តោន។ ពិធីកម្ទេចចោលផលិតផលទាំងនេះ បានធ្វើឡើង នៅភូមិថ្មីពីងពុង ឃុំដំណាក់រាំង ស្រុកឧដុង្គ ខេត្តកំពង់ស្ពឺ។
សូមបញ្ជាក់ថា ផលិតផល និងចំណីអាហារខូចគុណភាព ដែលត្រូវបានកម្ទេចចោលរាប់រយតោនទាំងនោះ មានផ្ទុកសារធាតុគីមី ប៉ះពាល់ដល់សុខភាពប្រជាពលរដ្ឋ ដែលឧក្រិដ្ឋជន បានចរាចរ ចែកចាយ និងផលិត ដូចជា បារី សុរា ឱសថក្លែងក្លាយ គ្រឿងសម្អាងក្លែងក្លាយ ទឹកសុទ្ធក្លែងក្លាយ ផលិតផលពីសាច់សត្វដោយខុសច្បាប់ ផលិតផលទឹកស៊ីអ៊ីវ ទឹកសៀង ទឹកម្ទេស ទឹកខ្មេះ ប្រេងខ្យង ជាដើម៕