ភ្នំពេញៈ គ្រោះថ្នាក់ចរាចរណ៍មួយ បានកើតឡើង ខណៈដែលផ្លូវបិទម្ខាង ដោយតម្រូវអោយអ្នកបើកបរយានយន្តទាំងអស់ ធ្វើដំណើរលើផ្លូវម្ខាងរួមគ្នា បែរជាបុរសម្នាក់ ទើបចេញពីផឹកស៊ីស្រវឹង បើកម៉ូតូ Smash មួយគ្រឿង ក្នុងល្បឿនលឿន ទៅបុករថយន្ត TOYOTA PRIUS ពាក់ស្លាកលេខ 2AH-4134 របស់ឌីជេ HERO ពេញទំហឹង បណ្ដាលឲ្យដួលរបួសខ្លួនឯង ខូចខាតម៉ូតូយ៉ាងដំណំ រីឯរថយន្តខ្ទេចស្តុបខាងស្ដាំយ៉ាងដំណំផងដែរ។គ្រោះថ្នាក់ចរាចរណរនេះ បង្កការភ្ញាក់ផ្អើលដល់កម្លាំងល្បាតប៉ុស្តិ៍ចាក់អង្រែក្រោម ចុះមកអន្តរាគមន៍ កាលពីវេលាម៉ោង១២:២០នាទីរំលងអធ្រាត្រឈានចូលថ្ងៃសុក្រ ទី១៥ ខែមីនា ឆ្នាំ២០១៩ នៅត្រង់ចំណុចមុខសាលាអន្តរជាតិញ៉ូតុនធីឡាយ ស្ថិតលើកំណាត់ផ្លូវជាតិលេខ២ ភូមិទួលរកា១ សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ។
អ្នកឃើញហេតុការណ៍ បានរៀបរាប់ភ្នាក់ងារខេមប៉ុស្តិ៍ ឲ្យដឹងថា មុនពេលកើតហេតុ គេឃើញរថយន្តមួយគ្រឿង ម៉ាក TOYOTA PRIUS ពណ៌ស ពាក់ស្លាកលេខភ្នំពេញ 2AH-4134 ដែលគេស្គាល់ច្បាស់ថា ជារបស់ឌីជេ HERO បើកបរដោយបុរស២នាក់ ធ្វើដំណើរតាមបណ្ដោយផ្លូវជាតិលេខ២ ទិសដៅពីជើងទៅត្បូង លុះមកដល់ចំណុចមុខសាលាអន្តរជាតិញ៉ូតុនធីឡាយ ខណៈដែលខាងមន្ទីរសាធារណការ រាជធានីភ្នំពេញ កំពុងជួសជុលប្រព័ន្ធលូតាមបណ្ដោយផ្លូវជាតិលេខ២ ទើបផ្លូវបិទម្ខាង នៅខាងស្ដាំដៃ ចាប់ពីជិតសាលាសង្កាត់ចាក់អង្រែក្រោម រហូតដល់មុខសាលាអន្តរជាតិញ៉ូតុនធីឡាយ តម្រូវអោយអ្នកបើកបរយានយន្តទាំងអស់ ធ្វើដំណើរលើផ្លូវម្ខាងរួមគ្នាដូចគន្លងចរាចរណ៍ធម្មតា ស្រាប់តែមានបុរសម្នាក់ ទើបចេញពីផឹកស៊ីស្រវឹង បើកម៉ូតូ Smash REVO ស៊េរីចាស់មួយគ្រឿង ពណ៌ខ្មៅ ពាក់ស្លាកលេខភ្នំពេញ 1AI-2487 ធ្វើដំណើរតាមបណ្ដោយផ្លូវជាតិលេខ២ ទិសដៅពីត្បូងមកជើងវិញ ក្នុងល្បឿនយ៉ាងលឿន ដោយខ្វះការប្រុងប្រយ័ត្ន ក៏ជ្រុលទៅបុករថយន្ត TOYOTA PRIUS របស់ឌីជេ HERO ពេញទំហឹងចំពីចំហៀងខាងមុខផ្នែកខាងស្ដាំ បណ្ដាលឲ្យដួលខ្ទាតជិត១០ម៉ែត្រ រងរបួសខ្លួនឯង រលាត់ដៃរលាត់ជើង ខូចខាតម៉ូតូផ្នែកខាងមុខយ៉ាងដំណំ រីឯរថយន្តខ្ទេចស្តុបខាងស្ដាំយ៉ាងដំណំ។
បន្តិចក្រោយមក គេឃើញកម្លាំងល្បាតប៉ុស្តិ៍ចាក់អង្រែក្រោម ចុះមកដល់កន្លែងកើតហេតុ រួចបាញ់គំនូសលើកម៉ូតូអែបខាងសិន ចំណែករថយន្តមិនដឹងមានបញ្ហាអ្វីនោះទេ កាច់សោបញ្ឆេះមិនបាន ទើបទុកចោលកណ្ដាលផ្លូវ រួចសមត្ថកិច្ចអោយភាគីម្ចាស់ទាំងសងខាង ធ្វើការដោះស្រាយគ្នាមួយជំហានសិន ដោយភាគីខាងម៉ូតូបានទទួលស្គាល់កំហុស និងបានលើកដៃសំពះសុំទោស និងពុំមានលទ្ធភាព ជួសជុលរថយន្តឲ្យនោះទេ ទើបឃើញវត្តមានរបស់ឌីជេ HERO ចុះពីលើរថយន្តមួយគ្រឿង ម៉ាក Highlander មកដោះស្រាយជាមួយអ្នកបើកបរម៉ូតូនោះ ដោយមានចិត្តមេត្តា និងយោគយល់ ព្រោះជាក់ស្ដែង ការខូចខាតបន្តិចបន្តួចទេ គាត់ក៏មិនអាចទៅជំរិតទាមទារអោយសងវែងឆ្ងាយនោះទេ តែឌីជេ HERO គ្រាន់តែអប់រំបុរសម្ចាស់ម៉ូតូដែលស្រវឹងហើយបើកបរនោះ អោយចេះគោរពច្បាប់ចរាចរណ៍ កុំបើកបរលឿនពេក ពាក់មួកសុវត្ថិភាពឲ្យបានត្រឹមត្រូវផង នេះសំណាងហើយបុករថយន្តរបស់គាត់ តែបើប៉ះរថយន្តគេផ្សេងវិញ ប្រហែលជាពិបាកដោះស្រាយបន្តិចហើយ។
ក្រោយកើតហេតុ បន្ទាប់ពីណែនាំអប់រំហើយ ឌីជេ HERO ក៏យល់ព្រមបញ្ចប់រឿងត្រឹមនេះ និងអនុញ្ញាតអោយបុរសនោះទៅរកពេទ្យលាងរបួស ហើយក៏អរគុណសមត្ថកិច្ច ដែលបានចុះមកជួយសម្រួលចរាចរណ៍ កុំអោយមានការកកស្ទះផងដែរ៕
