ភ្នំពេញៈ តារាចម្រៀងស្រីយ៉េៗចូលចិត្តការតុបតែងខ្លួនសិចស៊ី អ្នកនាង ឆៃ លីដាឡែន កាលពីយប់មិញ បានជួបរឿងហួចចិត្តខ្លាំង នឹងភ័យស្ទើរតែព្រលឹងរត់ចេញពីខ្លួន ក្រោយពេលដែលជិះប៉ះចំអ្នកបើកបរ Passapp ចរិកស្ទាវ។ ម្យ៉ាងទៀត នាងក៏បានពោលពាក្យហាក់នៅមានអារម្មណ៍ភ័យថា ភ្លាមៗនោះព្រលឹងរបស់នាងស្ទើរមិននៅក្នុងខ្លួនសោះឡើយ។
ការបង្ហាញអារម្មណ៍ភិតភ័យរបស់តារាចម្រៀងអ្នកនាង ឆៃ លីដាឡែន ពេលនេះ បានធ្វើឡើង បន្ទាប់ពីមានការបង្ហោះនូវរូបភាព និងវិដេអូបង្ហាញពីករណីគ្រោះថ្នាក់ចរាចរណ៍មួយ ដែលបង្កឡើងរវាងអ្នកបើកបរ Pass app និងរថយន្ត បណ្តាលឲ្យរងរបួស បង្កឲ្យមានការភ្ញាក់ផ្អើលទាំងកណ្តាលយប់។
អ្នកនាង ឆៃ លីដាឡែន បានបង្ហោះភ្ជាប់ជាមួយទិដ្ឋភាពនៃគ្រោះថ្នាក់នោះថា «និយាយទៅខ្ញុំខ្លាចណាស់ រឿងជិះ Pass app នេះ មិនដូចពីមុនទេ ឡូវនេះអ្នកខ្លះបើកលឿនហើយព្រហើន ដូចយប់មិញខ្ញុំជិះ Passapp អញ្ចឹង គាត់ដាក់កាស នឹងត្រចៀកហើយឲ្យតែខឹងម៉ូតូណាជិះឈ្លើយដាក់គាត់ គឺគាត់បើកលឿនវ៉ាប្រជែង ហើយកៀរម៉ូតូនោះ ឯងអ្នកនេះជិះវិញព្រលឹងហោះទៅស៊ីអាចម៍ហើយ គួរអោយខ្លាចណាស់ សូមបងៗ Pass App មួយចំនួន សូមមេត្តាបើកបរគិតដល់អ្នកជិះផង»។
ការបញ្ចេញទស្សនៈរិះគន់របស់តារាចម្រៀងអ្នកនាង ឆៃ លីដាឡែន ខាងលើនេះដែរ បានធ្វើអ្នកគាំទ្រមួយចំនួនបង្ហាញទស្សនៈគាំទ្រ និងលើកឡើងប្រហែលគ្នានឹងនាងផងដែរ។ ខណៈមានខ្លះទៀត ក៏បានបញ្ចេញមតិដែរថា ករណីនេះមានដោយបុគ្គលនោះទេ ពោលគឺពុំមែនឲ្យតែអ្នករត់កង់បី ឬ Passapp សុទ្ធតែមានចរិកដូច្នេះឡើយ ព្រោះថា ពេលខ្លះមានតែបុគ្គល ៣ ឬ ៤នាក់ តែធ្វើឲ្យស្លុយឈ្មោះអ្នក ដែលល្អៗមួយចំនួនទៀត។
គេក៏សង្កេតឃើញថា មហាជនជាច្រើន បានសម្តែងមតិចំពោះករណី Passapp ដែលបើកបរលឿនមិនប្រុងប្រយ័ត្ន ជាពិសេស គឺចំពោះភ្ញៀវ ដែលចូលរួមធ្វើដំណើរជាមួយ ត្រូវជិះទាំងព្រលឹងចុងសក់។
គួរបញ្ជាក់ឲ្យដឹងផងដែរថា មនុស្សចំនួន៥នាក់ ជាភ្ញៀវជួលកង់បីឥណ្ឌាជិះ តែអ្នកបើកបរមិនបានប្រុងប្រយ័ត្ន ណាមួយបើកលឿនផងនោះ មិនបានចាប់អារម្មណ៍ ទើបជ្រុលទៅបុកពីក្រោយរថយន្ដសណ្ដោងកុងតឺន័រវែងមួយគ្រឿង ដែលឈប់ចតចោលលើផ្លូវនោះ បណ្ដាលឲ្យអ្នកបើកបរគាបជាប់កង់បី រងរបួសធ្ងន់ ត្រូវបានប្រជាពលរដ្ឋ និងអ្នកដំណើរនាំគ្នាជួយយកចេញមកក្រៅ និងមនុស្ស៤នាក់ទៀត រងរបួសធ្ងន់ស្រាល កាលពីយប់ថ្ងៃទី២៧ ខែកុម្ភៈ ឆ្នាំ២០១៩ តាមបណ្ដោយផ្លូវសហព័ន្ធរុស្ស៊ី ទល់មុខព្រលានយន្តហោះអន្តរជាតិភ្នំពេញ មុខភូមិចំការឪឡឹក សង្កាត់កាកាបទី១ ខណ្ឌពោធិ៍សែនជ័យ។
រថយន្ដកុងតឺន័រខាងលើ ពណ៌ស ពាក់ស្លាកលេខព្រះសីហនុ 3A-1185 ឈប់ស្របទិសលើចិញ្ចើមផ្លូវសហព័ន្ធរុស្ស៊ី។ ចំណែកម៉ូតូកង់បីឥណ្ឌា (Passapp) ពណ៌ស ពាក់ស្លាកលេខកំពង់ចាម 1U-0387 បើកបរទិសដៅពីលិចទៅកើតស្របគ្នា បុកពីក្រោយ។
ក្រោយកើតហេតុសមត្ថកិច្ចចរាចរណ៍ខណ្ឌពោធិ៍សែនជ័យ បានប្រគល់ឲ្យសមត្ថកិច្ចចរាចរណ៍រាជធានីភ្នំពេញ ដើម្បីធ្វើការវាស់វែងហើយយករថយន្តកុងតឺន័រនិង ម៉ូតូកង់បីយកទៅរក្សាទុករង់ចាំដោះស្រាយថ្ងៃក្រោយ។ ចំណែកជនរងគ្រោះត្រូវបាននាំយកទៅមន្ទីរពេទ្យ ដើម្បីជួយសង្គ្រោះ៕