ភ្នំពេញៈ យុវជនម្នាក់ កំពុងជិះម៉ូតូ Nex មួយគ្រឿង តែម្នាក់ឯង ត្រូវក្រុមជនស៊ីវិលមានគ្នាជាច្រើននាក់ អះអាងថា ជាសមត្ថកិច្ច បានស្ទាក់ឃាត់ឲ្យឈប់ រួចឆែកមើលខ្លួនប្រាណ តែមិនឃើញមានអ្វីទេ បែរជាសំឡុតគំរាមយកទៅខណ្ឌ ពិនិត្យមើលទឹកនោម ទើបយុវជនរងគ្រោះស្រែក ឡាំប៉ាឆោឡោ បង្កឲ្យមានការភ្ញាក់ផ្អើលដល់ក្រុមអ្នកសារព័ត៌មាន ចុះទៅផ្ដិតយករូបភាព ស្រាប់តែក្រុមជនស៊ីវិលនោះ អូសក្រឡាដកខ្លួនគេចចេញទៅបាត់ម្ដងម្នាក់ៗ នៅសល់តែ២នាក់ ពាក់មួកសុវត្ថិភាព ហើយក្រុមអ្នកសារព័ត៌មាន ក៏បានទៅសួរនាំ រួចក៏ប្រញាប់ឡើងជិះម៉ូតូគេចទៅបាត់តែម្ដង ដោយមិនប្រាប់ថា ជាសមត្ថកិច្ចមកពីខាងណានោះទេ។
ហេតុការណ៍នេះ បានបង្កការភ្ញាក់ផ្អើលយ៉ាងខ្លាំង កាលពីវេលាម៉ោង១០៖៣០នាទីយប់ ថ្ងៃទី២៨ ខែកុម្ភៈ ឆ្នាំ២០១៩នេះ នៅតាមបណ្ដោយមហាវិថីសហព័ន្ធរុស្សី ស្ថិតក្នុងសង្កាត់ស្រះចក ព្រំប្រទល់ខណ្ឌទួលគោក និងខណ្ឌ៧មករា រាជធានីភ្នំពេញ។
យុវជនរងគ្រោះបានរៀបរាប់ប្រាប់ថា មុនកើតហេតុ មេរបស់គាត់បានទូរស័ព្ទហៅទៅផឹក ហើយគាត់ក៏បានជិះម៉ូតូ Nex មួយគ្រឿង តែម្នាក់ឯង ពីម្ដុំផ្សារថ្មី ធ្វើដំណើរតាមបណ្ដោយមហាវិថីសហព័ន្ធរុស្សី ទិសដៅពីកើតទៅលិច លុះមកដល់ចំណុចហួសស្តុបសួរច្បារក្ដាន់២ ស្រាប់តែមានជនស៊ីវិលមួយក្រុមមានគ្នាជាច្រើននាក់ ដោយអះអាងថា ជាសមត្ថកិច្ច តែមិនដឹងថា ជាសមត្ថកិច្ចខាងណានោះទេ បានជិះប្រដេញតាមពីក្រោយ មកស្ទាក់ឃាត់គាត់អោយឈប់ម៉ូតូ ដើម្បីឆែកមើលខ្លួនប្រាណ តែមិនឃើញមានអ្វីទេ បែរជាសំឡុតគំរាមគាត់ថា យកទៅខណ្ឌ (តែមិនបានបញ្ជាក់ថា យកទៅខណ្ឌណាទេ) គ្រាន់តែនិយាយថា យកពិនិត្យមើលទឹកនោម ទើបរូបគាត់ស្រែកឡាំប៉ាថា តើគាត់ខុសអ្វីបានជាមកឆែកឆេរ មិនឃើញមានអ្វី ហើយចង់នាំយកទៅខណ្ឌពិនិត្យទឹកនោមទៀត ទើបរូបគាត់ឆោឡោបង្កឲ្យមានការភ្ញាក់ផ្អើលដល់ក្រុមអ្នកសារព័ត៌មាន ចុះទៅកន្លែងកើតហេតុផ្ដិតយករូបភាព និងធ្វើការ Live ផ្សាយផ្ទាល់ សាកសួរដំណើររឿងហេតុ។
គ្រាន់តែឃើញក្រុមអ្នកសារព័ត៌មាន ចុះមកផ្សាយផ្ទាល់ភ្លាមនោះ ស្រាប់តែក្រុមសមត្ថកិច្ចស្លៀកពាក់ស៊ីវិល មិនដឹងមកពីខាងណានោះថា ឃើញសង្ស័យទើបឃាត់ឆែកឆេរ រួចអូសក្រឡាដកខ្លួនម្ដងម្នាក់ៗ គេចចេញទៅបាត់ នៅសល់ជនស៊ីវិលតែ២នាក់ ដែលពាក់មួកសុវត្ថិភាពបាំងមុខជិត ហើយពាក់កាត តែមិនដឹងថា កាត់អ្វីនោះទេ ទើបក្រុមអ្នកសារព័ត៌មាន បានទៅសួរនាំ តែមិននិយាយអ្វីទាំងអស់ ហើយសមត្ថកិច្ចស្លៀកពាក់ស៊ីវិលនោះ បានគេចមុខហាក់បីដូចជា មានអ្វីលាក់លៀម រួចប្រញាប់ដើរចេញទៅជិះម៉ូតូ Honda Dream មួយគ្រឿង ឌុបគ្នាគេចទៅបាត់តែម្ដង សូម្បីតែប្រាប់ថា ជាសមត្ថកិច្ចមកពីខាងណា ក៏មិនព្រមប្រាប់ដែរ។
ទង្វើនេះហើយដែលប្រជាពលរដ្ឋនិយាយថា ជាសមត្ថកិច្ច ឬក្រុមចោរ ចាប់ជំរិត? ព្រោះស្ទើរតែរាល់យប់ ញឹកញាប់ណាស់ ដែលគេសង្កេតឃើញយុវជនជំទង់ៗ ដែលធ្វើដំណើរតាមបណ្ដោយផ្លូវខាងលើ និងម្ដុំផ្លូវ R6 ត្រូវក្រុមស៊ីវិលទាំងនោះ នាំគ្នាមកគៀបស៊ីយ៉ាងអនាធិបតេយ្យបែបនេះទៅវិញ ឬថ្នាក់លើបញ្ជាអោយធ្វើបែបនេះ?
យ៉ាងណាមិញ យើងមិនទាន់ដឹងថា ក្រុមស៊ីវិលដែលអះអាងថា ជាសមត្ថកិច្ចនោះ ជាសមត្ថកិច្ចខាងណានៅឡើយនោះទេ៕
