ភ្នំពេញៈ យុវជន២នាក់ ជិះកង់បីឥណ្ឌា(Pass App) ចេញពីក្លិបរ៉េន Rain លុះមកដល់ពាក់កណ្ដាលផ្លូវ ស្រាប់តែក្មេងស្ទាវមួយក្រុម មានគ្នាប្រហែលជិត១០ម៉ូតូ ប្រដាប់ដោយដុំថ្ម និងខ្សែក្រវ៉ាត់ ជិះមកតាមពីក្រោយ មកធ្វើសកម្មភាពគប់ទៅលើយុវជនទាំង២នាក់នោះ បណ្ដាលឲ្យយុវជនម្នាក់ ត្រូវចំថ្គាមមួយដុំថ្ម សន្លប់ស្ដូកស្ដឹងលើកង់បី ហើយម្ចាស់កង់បី និងយុវជនម្នាក់ទៀត ស្ទុះរត់ចូលផ្ទះលក់ចាប់ហួយ រួចដេញតាមវាយគប់ដល់មុខផ្ទះ បណ្ដាលឲ្យត្រូវម្នាក់មួយដុំថ្ម និងត្រូវស្រី្តម្ចាស់ផ្ទះរងរបួសទៀត ហើយរត់ចេញមកវិញនាំគ្នាលួចយកទូរស័ព្ទនៅលើកង់បី និងយកទាំងសាំងទៅ៤ដបទៀត រួចជិះគេចខ្លួនបាត់ដោយសុវត្តិភាព បង្កការភ្ញាក់ផ្អើលដល់កម្លាំងល្បាតប៉ុស្តិ៍ចាក់អង្រែក្រោម ចុះអន្តរាគមន៍ផងដែរ។
ករណីហិង្សាឆ្លៀតលួចយកទ្រព្យសម្បត្តិនេះ បង្កឲ្យមានការភ្ញាក់ផ្អើលឡើងកាលពីវេលាម៉ោង១៖៣០នាទីរំលងអធ្រាត្រ ឈានចូលថ្ងៃពុធ ទី៦ ខែកុម្ភៈ ឆ្នាំ២០១៩ ត្រង់ចំណុចមុខផ្ទះលក់ចាប់ហួយមួយកន្លែង ទល់មុខរោងចក្រ ជិនមីយ៉ុង ស្ថិតតាមផ្លូវជាតិលេខ២ ភូមិព្រែកតាឡុង២ សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ។
បើសម្ដីយុវជនរងគ្រោះទាំង២នាក់ បានរៀបរាប់ប្រាប់ថា នៅមុនពេលកើតហេតុ ពួកគេទាំង២នាក់ បានចូលក្លិបមួយឈ្មោះថា “រ៉េនក្លិប RAIN CLUB” នៅចាក់អង្រែក្រោម ដែលមានចម្ងាយប្រហែល១គីឡូម៉ែត្រ ពីចំណុចកើតហេតុខាងលើ ហើយបានហៅស្រាបៀរមកផឹក រាំលេងកម្សាន្ត ដោយមិនបានប៉ះពាល់អ្នកណានោះទេ។
យុវជនខាងលើបន្តថា បន្ទាប់ពីផឹកនិងរាំកម្សាន្តរហូតអស់ស្រា ពួកគេក៏បបួលគ្នា ត្រលប់ទៅផ្ទះវិញ ដោយហៅកង់បីឥណ្ឌា(Passapp) មួយគ្រឿង ពណ៌លឿង ពាក់ស្លាកលេខ ភ្នំពេញ 1AC-0257 ដែលនៅចាំដឹកអ្នកដំណើរនៅខាងមុខក្លិបនោះស្រាប់ រួចក៏ឡើងជិះចេញទៅ ដោយធ្វើដំណើរតាមបណ្ដោយផ្លូវជាតិលេខ២ ទិសដៅពីជើងទៅត្បូង។
លុះពេលដើរមកជិតដល់ចំណុចកើតហេតុនោះ ស្រាប់តែឃើញក្មេងស្ទាវមួយក្រុម មានគ្នាច្រើន ជិះម៉ូតូជិត១០គ្រឿង ជិះតាមមកពីក្រោយ រួចងាកមើលពួកគាត់ ហើយក៏ជិះទៅបាត់អស់ទៅ ទើបអ្នកបើកកង់បី បន្តដំណើរទៅមុខបានបន្តិចក៏អែបស្ដាំដៃឈប់មុខផ្ទះលក់ចាប់ហួយកើតហេតុខាងលើ ស្រាប់តែបន្តិចក្រោយមក ក្រុមក្មេងស្ទាវទាំងនោះ ត្រលប់មកវិញ ប្រដាប់ដោយខ្សែក្រវ៉ាត់ និងដុំថ្ម ដុំឥដ្ឋ គ្រប់ៗគ្នា រួចជិះមកគប់សំដៅលើកង់បីនោះតែម្ដង បណ្ដាលឲ្យកង់បីបែកកញ្ចក់ខាងមុខ និងខាងក្រោយខ្ទេច និងយុវជនម្នាក់ត្រូវមួយដុំថ្ម ចំថ្គាមរងរបួសសន្លប់ស្ដូកស្ដឹងលើកង់បី ហើយម្ចាស់កង់បីនិងយុវជនម្នាក់ទៀត ស្ទុះរត់ចូលផ្ទះលក់ចាប់ហួយ រួចដេញតាមវាយគប់ដល់មុខផ្ទះ បណ្ដាលឲ្យត្រូវម្នាក់មួយដុំថ្ម និងត្រូវស្រី្តម្ចាស់ផ្ទះរងរបួសជើងខាងឆ្វេងផងដែរ។
លុះពេលក្រុមក្មេងស្ទាវទាំងនោះរត់ចេញមកវិញ បានលួចយកទូរស័ព្ទមួយគ្រឿងដែលដោតសាកថ្ម នៅជាប់ដៃចង្កូតលើកង់បី និងយកទាំងសាំងទៅ៤ដបទៀត រួចជិះគេចខ្លួនបាត់អស់ពីកន្លែងកើតហេតុ ធ្វើឲ្យស្ត្រីម្ចាស់ផ្ទះលក់ចាប់ហួយឡាំប៉ាអោយអ្នកបើកកង់បី និងជនរងគ្រោះទាំង២នាក់នោះ ជួយចេញថ្លៃលាងរបួសអោយផង បង្កការផ្អើលដល់កម្លាំងល្បាតប៉ុស្តិ៍នគរបាលចាក់អង្រែក្រោម ចុះអន្តរាគមន៍ភ្លាមៗផងដែរ។
ក្រោយពីកើតហេតុ ជនរងគ្រោះទាំង៣នាក់នោះ មិនដាក់ពាក្យបណ្ដឹងអ្វីទេ ដោយសុំទុកទូរស័ព្ទនៅម្ចាស់ផ្ទះសិន ចាំស្អែកចាំយកលុយមកសង រួចក៏ឡើងជិះកង់បីដដែលនោះចេញទៅ និងសុំឲ្យកម្លាំងល្បាត ជួយជូនឲ្យផុតពីមូលដ្ឋាន ដោយសុវត្តិភាព ហើយត្រលប់មកល្បាតតាមភូមិសាស្ត្រដដែល។
សូមបញ្ជាក់ថា ចំពោះក្លិបកំសាន្តរ៉េន(Rain) កន្លងទៅក៏មាន បុរសម្នាក់ បានស្នើសុំដល់អាជ្ញាធរសង្កាត់ចាក់អង្រែក្រោម និងខណ្ឌមានជ័យ សុំឲ្យចុះទៅពិនិត្យក្លឹបឌីស្កូរ៉េន (Rain Club) ដែលបង្កឲ្យប៉ះពាល់យ៉ាងខ្លាំងជុំវិញ បរិស្ថានក្នុងការរស់នៅមិនអាចទ្រាំបាន ក្នុងមូលហេតុដែលថា ភ្ញៀវដែលបានចូលរាំលេងកម្សាន្តនៅក្នុងក្លឹបនេះ បានជុះនោមដាក់លើផ្លូវ ជញ្ជាំង និងរបងផ្ទះព្រមទាំងបន្ទោបង់ ជាពិសេសបង្កជាសំឡេងហ៊ោកញ្រៀវ បំពងសំឡេងចេញមកក្រៅ រហូតដល់ម៉ោង៣ភ្លឺ មិនអាចដេកពួនបានឡើយ។
ខណៈដែលលោក ពេជ្រ កែវមុនី អភិបាលខណ្ឌមានជ័យ ក៏បានចុះទៅពិនិត្យជាក់ស្តែង ឃើញថាក្លឹបពិតជាមានការរំខាន និងគ្មានសុវតិ្ថភាពនោះទេ ។ លោកថា លោកបានធ្វើការណែនាំដល់ថៅកែក្លឹប ឲ្យធ្វើការកែសម្រួលឡើងវិញជាបន្ទាន់ ដោយតម្រូវឲ្យម្ចាស់ទីតាំងក្លឹបនេះ កែសម្រួលច្រកសុវតិ្ថភាពឲ្យបានចំនួនពីរទ្វារ និងដាក់អំពូលភ្លើងស្វ័យប្រវត្តិ (Auto) ។ លោកថា ធ្វើបែបនេះ គឺចៀងវាងបើមានបញ្ហាអគ្គិភ័យកើតឡើង គឺមានទ្វារសុវតិ្ថភាព សម្រាប់ចេញ និងអំពូលភ្លើងស្វ័យប្រវត្តិនោះជួយបំភ្លឺផងដែរ៕