ភ្នំពេញៈ គួរឲ្យខ្លោចចិត្តណាស់ ឪពុកចុងតិរច្ឆានម្នាក់ ត្រូវបានសមត្ថកិច្ចខណ្ឌច្បារអំពៅចាប់វាយខ្នោះ ក្រោយលួងលោមកូនស្រី អាយុ១៣ឆ្នាំ យកទៅរំលោភបានសំរេចចំនួន៣លើក ក្នុងសំណាក់យីហោ “ដាលីន”។
ករណីរំលោភនេះ កើតឡើងកាលពីម៉ោង៤៖៣០នាទីរសៀលថ្ងៃអង្គារ៍ ទី២ ខែមេសា ឆ្នាំ២០១៩នេះ នៅចំណុចផ្ទះសំណាក់ “ដាលីន” ផ្លូវបេតុង ស្ថិតក្នុងភូមិជ្រោយបាសាក់ សង្កាត់ព្រែកប្រា ខណ្ឌច្បារអំពៅ រាជធានីភ្នំពេញ។ឪពុកចុងចិត្តខ្មៅរូបនេះ ឈ្មោះ ព្រុំ ភារម្យ ភេទប្រុស អាយុ២៧ឆ្នាំ ជនជាតិខ្មែរ មុខរបររើសអេតចាយ ស្នាក់នៅក្នុងចេតីយវត្តប្រជុំវង្ស ភូមិតាងៅកណ្តាល សង្កាត់និរោធ ខណ្ឌច្បារអំពៅ។ ចំណែកកុមារីរងគ្រោះឈ្មោះ យ.ស.ន អាយុ១៣ឆ្នាំ មុខរបររើសអេតចាយ ស្នាក់នៅជាមួយឪពុកចុង។
សមត្ថកិច្ចខណ្ឌច្បារអំពៅ បានឲ្យដឹងថា កាលពីថ្ងៃទី៣១-០៣-២០១៩ ម៉ោង១០យប់ ម្តាយកុមារីរងគ្រោះ បានចេញទៅរើសអេតចាយ បានទុកនៅជាមួយឪពុកចុង ពេលនោះឪពុកចុង នាំកុមារីរងគ្រោះទៅដេកនៅផ្ទះសំណាក់មួយ “ដាលីន” រួចចាប់រំលោភគ្រោះបានសម្រេច៣ដង បន្ទាប់មកក៏នាំកុមារីរងគ្រោះត្រលប់មកកន្លែងស្នាក់នៅវិញ ពេលនោះម្តាយឃើញកុមារីរងគ្រោះមានសភាពស្លេកស្លាំងពេក ក៏សាកសួរនាំ រួចកុមារីរងគ្រោះ ក៏និយាយរឿងហេតុខាងលើប្រាប់ស្រ្តីជាម្តាយ ទើបដឹងរឿង លុះដល់ថ្ងៃទី២-០៤-២០១៩ ម៉ោង២៖៣០នាទី ម្តាយក៏នាំកុមារីរងគ្រោះមកដាក់ ពាក្យបណ្តឹងនៅអធិការដ្ឋាននគរបាលខណ្ឌច្បារអំពៅដើម្បីអោយសមត្ថកិច្ចចាប់បុរសជាឱពុកចុងចាត់ការតាមផ្លូវច្បាប់។
ក្រោយទទួលបានពាក្យបណ្ដឹងសមត្ថកិច្ចធ្វើការស្រាវជ្រាវ ដើម្បីចាប់ជនល្មោភកាម មកដាក់ទោសទណ្ឌ រហូតដល់ម៉ោង៤៖៣០នាទីរសៀលថ្ងៃដដែល សមត្ថកិច្ចផ្នែកព្រហ្មទណ្ឌខណ្ឌច្បារអំពៅ បានសហការជាមួយនគរបាលរដ្ឋបាលប៉ុស្តិ៍ព្រែកប្រា ធ្វើការឃាត់ខ្លួនជនសង្ស័យបាននៅភូមិតាងៅកណ្តាល សង្កាត់និរោធ ខណ្ឌច្បារអំពៅ បញ្ជូនមកអធិការដ្ឋាននគរបាលខណ្ឌច្បារអំពៅ និងសាកសួរនាំ។ នៅចំពោះមុខសមត្ថកិច្ចជនសង្ស័យ បានឆ្លើយសារភាពថា ខ្លួនពិតជាបានប្រព្រឹត្តដូចការចោទប្រកាន់ពីក្មេងស្រីរងគ្រោះមែន ខណៈបច្ចុប្បន្នក៏បានប្រើប្រាស់គ្រឿងញៀនផងដែរ។ បច្ចុប្បន្នសមត្ថកិច្ចខណ្ឌច្បារអំពៅ បានកសាងសំណុំរឿង បញ្ជូលទៅតុលាការដើម្បីចាត់ការតាមច្បាប់៕
ផ្ដល់សិទ្ធិដោយ campost