ភ្នំពេញៈ ថៅកែឃ្លាំងទិញ លក់ បង់រំលស់រថយន្តយីហោ “សេង ហ៊ួត” ត្រូវបានកម្លាំងនគរបាលក្រសួងមហាផ្ទៃ ឃាត់ខ្លួន ដោយទុករយៈពេល៤៨ម៉ោង ដើម្បីធ្វើការដោះស្រាយ ជាមួយអតិថិជន ពាក់ព័ន្ធករណីឆបោកលុយជាង៣លានដុល្លារ ដែលអតិថិជនទិញរថយន្ត បង់រំលស់ពីហាងលក់រថយន្តខាងលើនេះ។
ឃ្លាំងលក់រថយន្ត “សេង ហ៊ួត” មានម្ចាស់ឈ្មោះ សេង សុភ័ក្រ មានទីតាំងនៅតាមបណ្ដោយ ផ្លូវវេងស្រេង ក្នុងសង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ បានជួលរថយន្តពីកា រ៉ាស់ផ្សេងៗ យកមកបង់រំលស់ជូនអតិថិជន។
សូមបញ្ជាក់ថា មានការភ្ញាក់ផ្អើលទាំងកណ្ដាលថ្ងៃ នៅវេលាម៉ោង១១៖១០នាទីថ្ងៃត្រង់ ទី២១ ខែមេសា ឆ្នាំ២០១៩ ស្ថិតនៅហាងម៉ាស្ទ័រ ស៊ូគីស៊ុប ទល់មុខកងរាជអាវុធហត្ថលើផ្ទៃប្រទេស តាមបណ្ដោយផ្លូវ២៨៩ ក្នុងសង្កាត់បឹងកក់១ ខណ្ឌទួលគោក រាជធានីភ្នំពេញ ក្រោយពីពលរដ្ឋដែលជាអតិថិជនរងគ្រោះ បានប្រទះឃើញលោក សេង សុភ័ក្រ (ថៅកែឃ្លាំង“សេង ហ៊ួត” ) នាំប្រពន្ធចូលហាង ម៉ាស្ទ័រ ស៊ូគីស៊ុប ហ្គោល រួចបាននាំខ្លួនប្រគល់ឲ្យប៉ូលិសក្រសួងមហាផ្ទៃតែម្ដង។
នៅថ្ងៃនោះដែរ ប្រជាពលរដ្ឋរងគ្រោះជាង១០០នាក់ ដែលចាញ់បោកម្ចាស់ឃ្លាំង “សេង ហួត” នេះ បាននាំគ្នាតវ៉ានៅមុខក្រសួងមហាផ្ទៃ ដើម្បីឱ្យថ្នាក់ដឹកនាំនៃក្រសួងដ៏មានអំណាចមួយ នេះជួយដោះស្រាយពួកគាត់។
តាមប្រភពពីពលរដ្ឋរងគ្រោះ បានប្រាប់ឲ្យដឹងថា លោក សេង សុភ័ក្រ មានការ៉ាស់ លក់ ទិញ និងបង់រំលស់រថយន្តយីហោ “សេង ហ៊ួត” ទីតាំង ផ្លូវវេងស្រេង ភូមិជ្រៃកោង សង្កាត់ចោមចៅ ១ ខណ្ឌពោធិ៍សែនជ័យ បានបង់រំលស់រថយន្តសេរីទំនើបៗគ្រប់ប្រភេទជូនអតិថិជន ដែលសុទ្ធតែរថយន្តជួលពីការ៉ាស់ផ្សេងៗ ផ្អែកទៅលើថា ឡានដាច់ GPS សូមម្ចាស់រថយន្ត ដែល បង់រំលស់យកត GPS ជាថ្មី នៅការ៉ាស់របស់គាត់ ពេលពួកគាត់(ជនរងគ្រោះ) យកមកដល់ការ៉ាស់ ខាងការ៉ាស់បានបើករថយន្តទៅត GPS បាត់ ជាបន្តបន្ទាប់ អស់ជាច្រើនគ្រឿង រហូតមកដល់សព្វថ្ងៃ។
ប្រភពពីពលរដ្ឋរងគ្រោះម្នាក់ សូមមិនបញ្ចេញឈ្មោះ បានដឹងថា គាត់ក៏ត្រូវលោក សេង សុភ័ក្រ ឆបោកដែរ ដោយគាត់បានយករថយន្តព្រូសរបស់គាត់មកដូរសេរី យកហាយឡែនឌ័រវិញ ដោយថែមលុយ ហើយចាំពីរទៅបីថ្ងៃ ទើបមកដល់ ប៉ុន្តែបាត់រហូតមកដល់ថ្ងៃនេះ។
ក្រោយពីប្រទះឃើញលោក សេង សុភ័ក្រ និងភរិយា នៅហាងម៉ាស្ទ័រ ស៊ូ គី ស៊ុប ក៏បាន តេ ហៅគ្នា ដែលជាជនរងគ្រោះទាំងអស់ មកព័ទ្ធហាង ហើយអញ្ជើញលោក សេង សុភ័ក្រ ទៅក្រសួងមហាផ្ទៃ ដើម្បីធ្វើដោះស្រាយគ្នាតាមផ្លូវច្បាប់៕