កណ្តាលៈ យុវជនម្នាក់ ទើបតែចេញពីផឹកសើក្នុងក្លឹប បានបើករថយន្ត Mazda ស៊េរីទំនើប ក្នុងល្បឿនយ៉ាងលឿន ខ្វះការប្រុងប្រយ័ត្ន មកដល់ចំណុចផ្លូវកោង មិនបន្ថយល្បឿន និងជាន់ហ្វ្រាំងមិនទាន់ ក៏ជ្រុលទៅបុករ៉ឺម៉កម៉ូតូ ដែលចតនៅចញ្ចើមផ្លូវ ខណៈម្ចាស់កំពុងសម្រាកពីលើ បណ្ដាលឲ្យរងរបួសធ្ងន់ ហើយរថយន្តវិលទៅបុករះតុកៅអីថ្ម ដែលដាក់តាំងលក់នៅក្បែរនោះ បណ្ដាលឲ្យខូចខាតបាក់ខ្ទេចអស់មួយចំនួនផងដែរ។
គ្រោះថ្នាក់ចរាចរណ៍ខាងលើនេះ បានបង្កការភ្ញាក់ផ្អើលដល់អាជីវករផ្សារតាខ្មៅថ្មី កាលពីវេលាម៉ោង៣៖៥០នាទីទៀបភ្លឺឈានចូលថ្ងៃអង្គារ៍ ទី១៤ ខែឧសភា ឆ្នាំ២០១៩ តាមបណ្ដោយផ្លូវជាតិលេខ២ ខាងលិចផ្សារតាខ្មៅថ្មី ភូមិដើមមៀន សង្កាត់ដើមមៀន ក្រុងតាខ្មៅ ខេត្តកណ្ដាល។
តាមសម្ដីបងស្រី ដែលជាប្រពន្ធម្ចាស់រ៉ឺម៉កម៉ូតូ ដែលរបួសធ្ងន់ បានរៀបរាប់ប្រាប់ឲ្យដឹងថា មុនពេលកើតហេតុ ប្ដីគាត់បានបើករ៉ឺម៉កចតលើចញ្ចើមផ្លូវ ហើយក៏សម្រាកលើរ៉ឺម៉កនោះ រហូតមកដល់ម៉ោងកើតហេតុខាងលើ ស្រាប់តែមានរថយន្តមួយគ្រឿង ម៉ាក Mazda ពណ៌ប្រផះ (គ្មានស្លាកលេខ) បើកបរដោយយុវជនម្នាក់ ដែលស្រវឹងស្រាខាងលើ បានធ្វើដំណើរតាមបណ្ដោយផ្លូវជាតិលេខ២ ទិសដៅពីជើងទៅត្បូង ក្នុងល្បឿនយ៉ាងលឿនដូចហោះ ខ្វះការប្រុងប្រយ័ត្ន មកដល់ចំណុចផ្លូវកោងខ្លាំង មិនបន្ថយល្បឿន ហើយបួងចង្កូតមិនទាន់ទៀតនោះ ទើបជ្រុលមកខាងឆ្វេងទៅបុករ៉ឺម៉កម៉ូតូ បណ្ដាលឲ្យប្ដីគាត់រងរបួសធ្ងន់ ចំណែករថយន្តវិលទៅបោកផ្ទប់តុកៅអីថ្ម ដែលដាក់តាំងលក់ រងការខូចខាតបាក់ខ្ទេចអស់មួយចំនួនផងដែរ។
ក្រោយកើតហេតុ អ្នកបើករថយន្តបង្ក មិនបានរត់គេចទៅណានោះទេ ដោយយល់ព្រមទទួលខុសត្រូវ និងជួយនាំបុរសរងគ្រោះ ទៅកាន់មន្ទីរពេទ្យបង្អែកជ័យជំនះ ដើម្បីសង្គ្រោះ និងដោះស្រាយថ្លៃព្យាបាលទាំងស្រុងដល់អ្នករបួសផងដែរ ដើម្បីបញ្ចប់រឿងផងដែរ ចំណែកឯការខូចខាតសម្ភារៈ តុកៅអីនៅកន្លែងកើតហេតុ ជនបង្កក៏និយាយថា ព្រមសងថ្លៃខូចខាតទាំងស្រុងដល់ម្ចាស់រងគ្រោះផងដែរ៕
ផ្ដល់សិទ្ធិដោយ campost.news