ព្រះសីហនុ: សង្ស័យជនជាតិចិនម្នាក់ ត្រូវបានសមត្ថកិច្ចក្រុងព្រះសីហនុ ឃាត់ខ្លួន បន្ទាប់ពីរូបគេធ្វើសកម្មភាពចាក់ទៅលើជនជាតិចិនដូចគ្នា ២នាក់ បណ្ដាលឲ្យរងរបួសធ្ងន់។
ហេតុការណ៍ចិនចាក់ចិននេះ កើតឡើងកាលពីវេលាម៉ោងជាង៨យប់ថ្ងៃទី១៩ ខែឧសភា ឆ្នាំ២០១៩ ស្ថិតនៅកាស៊ីណូមួយកន្លែង ទល់មុខផ្លូវចូលវត្តក្រោម សង្កាត់៣ ក្រុងព្រះសីហនុ ខេត្តព្រះសីហនុ។
លោក អ៊ុល ភស្ដា អធិការក្រុងព្រះសីហនុ បានឲ្យដឹងថា ករណីជម្លោះហិង្សា ដោយជនជាតិចិន បានចាក់ទៅលើជនជាតិចិនដូចគ្នា បណ្តាលឲ្យរងរបួសធ្ងន់ មិនទាន់ដឹងផ្ដើមចេញពីមូលហេតុអ្វីឲ្យពិតប្រាកដនោះទេ។
បច្ចុប្បន្នជនសង្ស័យ ត្រូវសមត្ថកិច្ចឃាត់ខ្លួន បញ្ជូនទៅឃុំបណ្ដោះអាសន្ន ដើម្បីដោះស្រាយតាមនីតិវិធីច្បាប់។ ចំណែកជនរងគ្រោះ២នាក់ ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យបង្អែកខេត្ត(ពេទ្យចំការចេក ) ប៉ុន្តែដោយរបួសធ្ងន់ពេក ក៏បញ្ជូនបន្តទៅមន្ទីរពេទ្យរាជធានីភ្នំពេញ៕