Tuesday, May 28, 2019

រន្ធត់ណាស់! ស្លាប់២នាក់ ថៃម្នាក់ ខ្មែរម្នាក់ និងរបួសធ្ងន់ម្នាក់ ក្រោយកុងតឺន័រ បោលបុកឡិចស៊ីស បញ្ច្រាសទិសគ្នា នៅកែវផុស

ព្រះសីហនុៈ បុរស២នាក់ បានស្លាប់ភ្លាមៗ នៅកន្លែងកើតហេតុ ក្នុងនោះមានជនជាតិថៃម្នាក់ ដោយគ្រោះថ្នាក់ចរាចរណ៍រវាងរថយន្តតុងតឺន័រសណ្តោងរឺម៉ក បុកជាមួយរថយន្ត Lexus RX300 ទិសដៅបញ្រ្ចាសគ្នា កាលពីម៉ោង១១និង៣០នាទី ព្រឹកថ្ងៃទី២៧ ខែឧសភា ឆ្នាំ២០១៩ នៅចំណុចចម្ការក្រូច ភូមិកែវផុស ឃុំកែវផុស ស្រុកស្ទឹងហាវ ខេត្តព្រះសីហនុ តាមបណ្តោយផ្លូវហ៊ុនសែនកែវផុស។

គ្រោះថ្នាក់ចរាចរណ៍បង្កឡើងដោយរថយន្តកុងតឺន័រសណ្តោងរឺម៉ក ពណ៌បៃតង ពាក់ស្លាកលេខ តាកែវ 3A-1109 (តៃកុងរត់បាត់) ទិសដៅពីស្ទឹងហាវ មកកែវផុស បានបុកជាមួយរថយន្ត Lexus RX300 ស្លាកលេខ ភ្នំពេញ 2W-6115។

ជនរងគ្រោះ ដែលស្លាប់ទាំង២នាក់ មានឈ្មោះ ចេង សំណាង ជាអ្នកបើកបររថយន្ត Lexus RX300 ជនជាតិខ្មែរ អាយុ៣៣ឆ្នាំ ទីលំនៅភូមិចាំយាម ឃុំបាក់ខ្លង ស្រុកមណ្ឌលសីមា ខេត្តកោះកុង និងឈ្មោះ Somsak Puetpakwan ជនជាតិថៃ អាយុ៣៩ឆ្នាំ។ ចំណែកម្នាក់ទៀត រងរបួសធ្ងន់ ឈ្មោះ Nathaphop ជនជាតិថៃ អាយុ៦០ឆ្នាំ (ព្យាបាលនៅគ្លីនិចឧកញ៉ាម៉ុង)។

សាកសពទាំងពីរ ត្រូវបានដឹកយកទៅតម្កល់ទុកនៅវត្តកែវផុស។ ចំណែករថយន្តទាំងពីរគ្រឿង ត្រូវនគរបាលស្ទូចយកមករក្សាទុកនៅប៉ុស្តិ៍រដ្ឋបាលកែវផុស ដើម្បីកសាងសំណុំរឿងចាត់ការតាមវិធីច្បាប់តាមក្រោយ៕

Feature Ads