កំពង់ឆ្នាំងៈ ស្ត្រីម្នាក់ បានសម្រាលកូននៅលើសាឡាង នៅពេលដែលក្រុមគ្រួសារបានបញ្ជូនទៅសម្រាលកូននៅខេត្តសៀមរាប។
ហេតុការណ៍ភ្ញាក់ផ្អើលមួយនេះ បានកើតឡើងនៅវេលាម៉ោង៨៖៣០នាទីថ្ងៃទី៥ ខែមិថុនា ឆ្នាំ ២០១៩។
ប្រភពពីកន្លែងកើតហេតុ បានអោយដឹងថា ស្ត្រីមានផ្ទៃពោះគ្រប់ខែខាងលើ និងក្រុមគ្រួសារបាននាំគ្នាធ្វើដំណើរពីខេត្តកំពង់ឆ្នាំង ក្នុងគោលបំណងទៅសម្រាលកូននៅមន្ទីរពេទ្យខេត្តសៀមរាប ពេលជិះរថយន្តឡើងលើសាឡាង កំពុងតែធ្វើដំណើឆ្លងកាត់មកដល់ពាក់កណ្ដាលទន្លេ ក្នុងស្រុកកំពង់លែង ខេត្តកំពង់ឆ្នាំង ស្រ្តីខាងលើក៏បានឈឺពោះភ្លាមៗសម្រាលកូនតែម្ដងដោយគ្មានឆ្មបជួយបង្កើតនោះទេ គឺបានម្ដាយដែលធ្វើដំណើររួមជាមួយជួយ បង្កើតដោយផ្ទាល់ដៃ។
ប្រភពដដែល បានអោយដឹងទៀតថា ស្ត្រីមានផ្ទៃពោះឆ្លងទន្លេនេះ ឈ្មោះ ចិត្ត សំណាងកនិកាអាយុ២៨ឆ្នាំ និងម្ដាយឈ្មោះ ឡាយ លក្ខិណា ឪពុកឈ្មោះ ណាត ជាគ្រូលក់ថ្នាំខ្មែរ រស់នៅភូមិព្រៃកោះ ឃុំជ្រៃបាក់ ស្រុករលាប្អៀរខេត្តកំពង់ឆ្នាំង។
ក្រោយពេលសាឡាងដល់ច្រាំង រថយន្តក៏បាននាំយកស្ត្រីខាងលើទៅកាន់មណ្ឌលសុខភាពស្រុកកំពង់លែង ហើយក៏ត្រូវបានក្រុមគ្រូពេទ្យនៅទីនោះជួយរៀបចំសម្រួលតាមបច្ចេកទេសជំនាញសម្រាលកូនផងដែរ។
ក្នុងហេតុការណ៍ខាងលើនេះ ក្រុមគ្រូពេទ្យនៃមណ្ឌលសុខភាពទីនោះ បានបញ្ជាក់ប្រាប់ថា ស្ត្រីខាងលើនេះ មានសុខភាពល្អប្រសើរជាធម្មតាទេ ចំណែកឯទារក ទើបនិងកើតមកនេះ ក៏មានសុខភាពល្អប្រសើរដែរ។
សូមបញ្ជាក់ផងដែរថា នេះគីជាលើកទី១ហើយ ដែលមានស្ត្រីត្រូវបានសម្រាលកូននៅលើសាឡាងបែបនេះ និងមិនមានជួបបញ្ហាណាមួយជាយថាហេតុដល់ម្តាយ និងទារក ដែលទើបនិងសម្រាលនោះឡើយ៕
