ភ្នំពេញៈ មានហេតុការណ៍ភ្ញាក់ផ្អើលមួយ កើតឡើងកាលពីវេលាម៉ោង៨យប់ថ្ងែទី១៤ ខែមិថុនា ឆ្នាំ២០១៩ ប្ដីប្រពន្ធ២នាក់ បានទុករថយន្តដោយបញ្ឆះចោល និងមានកូនតូច២នាក់ ហើយត្រូវបានចោរលួចបើកទៅបាត់ ដោយនាំងទាំងកូន២នាក់នោះទៅផងដែរ ធ្វើអោយស្រ្ដីជាម្ដាយស្រែកទ្រហោយំ ដួលសន្លប់ជាច្រើនដង ផ្អើលដល់សមត្ថកិច្ច។ ករណីនេះ កើតឡើងក្នុងសង្កាត់អូរឡាំពិក ខណ្ឌចំការមន រាជធានីភ្នំពេញ។
តាមប្រភពព័ត៌មានពីក្រុមគ្រួសារជនរងគ្រោះ បានប្រាប់អង្គភាពសារព័ត៌មាន CAM POST ឲ្យដឹងថា មុនពេលកើតហេតុ ស្ត្រីជាម្ដាយឈ្មោះ ពៅ បុប្ផា អាយុ៣៨ឆ្នាំ និងប្ដីឈ្មោះ ណុប ពិសី អាយុ៣៨ឆ្នាំ បានជិះរថយន្តរថយន្តម៉ាកហាយឡែនឌ័រ ពណ៌ទឹកប្រាក់ ពាក់ស្លាកលេខ ភ្នំពេញ2S-4126 មកទិញប្រហិតនៅកន្លែងហេតុ ហើយបានទុកកូនតូច អាយុពីរខែ និងបងម្នាក់ទៀត អាយុ១១ឆ្នាំ រួចក៏បញ្ឆេះរថយន្តទុកកូនឲ្យដេកនៅក្នុងនោះ មួយសន្ទុះក្រោយមក មានជនសង្ស័យ២នាក់ ដើរក្រឡឹងរថយន្ត២ទៅ៣ជុំ រួចធ្វើសកម្មភាពលួចបើករថយន្តទៅបាត់ ធ្វើអោយម្ដាយឪពុកភ័យស្លន់ស្លោទ្រហោយំ រាយការណ៍ប្រាប់សមត្ថកិច្ច ដេញស្ទាក់ចាប់បានរថយន្តចំណុចក្បាលថ្នល់ ចំណែកលោកចោរទាំង២នាក់ បានរត់គេចខ្លួនបាត់ស្រមោល។
ប្រភព បានបន្តទៀតថា ក្រុមជនសង្ស័យបានធ្វើសកម្មភាពពីកន្លែងមួយទៅកន្លែងមួយ ដោយប្ដូរតៃកុងរថយន្តចំនួន៤លើក ស្មើនឹង៤នាក់ ។ បន្ទាប់មកសមត្ថកិច្ច ក៏បានដេញស្ទាក់ នាំយករថយន្ត និងកូនៗតូចពីរនាក់បងប្អូនបានមកវិញ ហើយក៏នាំយករថយន្ត និងជនរងគ្រោះទៅអធិការដ្ឋានគរបាលខណ្ឌចំការមន ដើម្បីធ្វើការសាកសួរនិងដាក់ពាក្យបណ្ដឹង ដើម្បីស្រាវជ្រាវស្វែងរកក្រុមចោរយកមកផ្ដន្ទាទោសតាមផ្លូវច្បាប់៕
