តាកែវៈ ដោយមានការសម្របសម្រួលពីតំណាងអយ្យការអមសាលាដំបូងខេត្តតាកែវ និងតាមការបញ្ជាពីឧត្តមសេនីយទោ សុខ សំណាង ស្នងការនគរបាលខេត្តតាកែវ កម្លាំងជំនាញអធិការដ្ឋាននគរបាលស្រុកសំរោង កាលពី៣៖៣០នាទីរសៀលថ្ងៃទី១៧ ខែមិថុនា ឆ្នាំ២០១៩ បានឃាត់ខ្លួនជនសង្ស័យម្នាក់ ពាក់ព័ន្ធករណីទទួលផលចោរកម្ម(លួចរថយន្ដ)។
ជនសង្ស័យទទួលផលចោរកម្មឈ្មោះ ជីម សំនិត ភេទប្រុស អាយុ២៥ឆ្នាំ មានទីលំនៅភូមិកូនរមា ឃុំបឹងត្រាញ់ខាងជើង ស្រុកសំរោង។
យោងតាមពាក្យបណ្តឹងឈ្មោះ ម៉ូសំ រីពិសិដ្ឋ ភេទប្រុស អាយុ២៨ឆ្នាំ រស់នៅខណ្ឌទួលគោក រាជធានីភ្នំពេញ បានបាត់រថយន្តពីខេត្តព្រះសីហនុ ហើយតាមរកឃើញតាមរយៈប្រពន្ធ GPS នៅផ្ទះជនសង្ស័យខាងលើ នាថ្ងៃទី១៧ ខែមិថុនា ឆ្នាំ២០១៩។
ក្រោយឃាត់ខ្លួន ឈ្មោះ ជីម សំនិត បានសារភាពថា រូបគេបានទិញរថយន្តមួយគ្រឿងម៉ាក lexus RX300 ពីឈ្មោះ ហេង ជាអ្នកបកប្រែភាសាចិន រស់នៅខេត្តកំពត ក្នុងតម្លៃ៤០០០ដុល្លារ ដោយអោយ១០០០ដុល្លារសិន នៅសល់ចាំអោយ ក្រោយប្រគល់ឯកសារគ្រប់។
បច្ចុប្បនជនសង្ស័យ និងវត្ថុតាង កម្លាំងជំនាញកំពុងកសាងសំណុំរឿងតាមនីតិវិធី និងស្រាវជ្រាវរកជនសង្ស័យជាចោរលួចរថយន្តយកមកផ្តន្ទាទោសតាមច្បាប់៕