![](https://blogger.googleusercontent.com/img/b/R29vZ2xl/AVvXsEhYvFWtEytrl7rCz-vNI8jYNeQoymnZhLnx8e3ghKsxJAw3B42SJRXjAU_IoFbNHAS5V4pxMoUBckE0efoUZ0JWxMQen6HIpEI0NWQmCzjB0nYDAl4GicRyp0YPsVLc878nyAAbLyVLLz0H/s1600/Thumbnail-Recovered.jpg)
កំពត៖ កាលពីម៉ោង៦ និង៣០នាទីព្រលប់ថ្ងៃទី៣០ ខែកក្កដា ឆ្នាំ២០១៩ អធិការរងនគរបាលក្រុងកំពតទទួលផែនចរាចរណ៍ លោក ឆែម ហាក់ ខណៈបើករថយន្តម្នាក់ឯងឆ្លងផ្លូវដែក ក៏ត្រូវរថភ្លើងមកដល់បុករុញរថយន្តរបស់គាត់ជិតកន្លះគីឡូម៉ែត្រ បណ្ដាលឲ្យរងរបួសធ្ងន់ នៅចំណុចផ្លូវរថភ្លើង វត្តអណ្តូងព្រេង ស្ថិតក្នុងភូមិតូច សង្កាត់អណ្តូងខ្មែរ ក្រុងកំពត។
មន្ត្រីនគរបាលចរាចរក្រុងកំពត បានឱ្យដឹងថា លោក ឆែម ហាក់ អាយុ៥០ឆ្នាំ ខណៈបើកបររថយន្ត ម៉ាករេហ្វ័រ ពណ៌ស្ករ ពាក់ផ្លាកលេខ ភ្នំពេញ 2AK-1538 ត្រូវរថភ្លើងបើកដល់ក៏បុក បណ្តាលឲ្យរងរបួសតែម្តង។
មន្ត្រីនគរបាលបានបញ្ជាក់ថា «មុនកើតហេតុ ជនរងគ្រោះបានបើករថយន្តម្នាក់ឯង ចេញពីផ្ទះទៅប្រចាំការនៅអធិការដ្ឋាននគរបាលក្រុងកំពត លុះមកដល់ចំណុចកើតហេតុ ក៏បើកឆ្លងកាត់ផ្លូវរថភ្លើង ទិសដៅពីជើងទៅត្បូង ដោយមិនបានដឹងថារថភ្លើងមកដល់ ពីព្រោះមិនបានឮរថភ្លើងស៊ីប្លេរ ក៏បណ្តាលឱ្យរថភ្លើង បើកមកពីទិសលិចទៅកើត បុករុញរថយន្តទៅឆ្ងាយជិត ៥០០ម៉ែត្រ ទើបរថភ្លើងឈប់ធ្វើឱ្យជនរងគ្រោះរងរបួសធ្ងន់តែម្តង»។
ក្រោយហេតុការណ៍ភ្លាម កម្លាំងសមត្ថកិច្ចចុះទៅដល់ និងបានដឹកជនរងគ្រោះ ទៅសង្រ្គោះបន្ទាន់នៅមន្ទីរពេទ្យស៊ុនយ៉ាឃៀលចំការដូង។ ចំណែករថយន្ត ត្រូវសមត្ថកិច្ចជំនាញ នាំយកទៅរក្សាទុកនៅអធិការដ្ឋាននគរបាលក្រុងកំពត៕
![](https://blogger.googleusercontent.com/img/b/R29vZ2xl/AVvXsEiTARGO-GKrXNMsGF9L_F5bdkH9-MgXRpYAPlTN5zjSbV6U0YW_27_wXdKs1WIeTGFVW92MNbnp6Ckn9A0m_80R94nwTxT65QJAqrRrdsccxgMi757gkTISo7kbqdNOvlJ4xQRAI7bXz8I1/s1600/1+%25281%2529.jpg)
![](https://blogger.googleusercontent.com/img/b/R29vZ2xl/AVvXsEj7YqpsMPlloBXvWEqnKM7uAUVoKkiw4ZAeFT-z-LC57lhgGKXDy4B7AkQ5OAO6lHynBT5D12s7-eMMdtNOfXX72lnkWkrz3kljnOdAEAEAq3fqj0cwebkDgoLp5fvuj2774Gh0JFtZbVSo/s1600/1+%25282%2529.jpg)
![](https://blogger.googleusercontent.com/img/b/R29vZ2xl/AVvXsEjuImAV7pazYG8s1kOzCHjh1-TzdKmMlBNomvOZEmbDKiw5LDoxOcJiMIREB_WhXUgdUb_tQRoVGCrrf7OuDU0eAz_WZBuM-4oBm7E1C4W8fctuefBmWiaSoyxsIYloguyGRJeLhNjwJIjU/s1600/1+%25283%2529.jpg)