ភ្នំពេញៈ បុរសម្នាក់ជិះម៉ូតូលឿនពេកធ្លាក់ជង្ហុក ផ្លោងទៅបុកនឹងដែកដាក់ប្រេងម៉ាស៊ីន និងសាំងលក់នៅផ្ទះធ្វើម៉ូតូពេញទំហឹង បណ្ដាលឲ្យបែកក្បាលសន្លប់បាត់ស្មារតី ត្រូវបានបញ្ជូនទៅសង្គ្រោះបន្ទាន់ នៅម៉ោង៧៖២០នាទីយប់ថ្ងៃទី២៨ ខែកក្កដា ឆ្នាំ២០១៩ នៅចំណុចផ្ទះធ្វើម៉ូតូ តាមបណ្តោយផ្លូវបេតុងបឹងតាម៉ាត ភូមិខ្វា សង្កាត់ដង្កោ ខណ្ឌដង្កោ។
តាមប្រភពព័ត៌មានបានអោយដឹងថា មុនពេលកើតហេតុគេឃើញបុរសម្នាក់ មានអាយុ២០ឆ្នាំជាង បានជិះម៉ូតូធំមួយគ្រឿងម៉ាកអឹមស្លាស ពណ៌ខៀវ ពាក់ស្លាកលេខភ្នំពេញ 1GI-2257 តាមបណ្តោយផ្លូវបេតុងបឹងតាម៉ាត ពីខាងរបងសាកលវិទ្យាល័យភូមិន្ទកសិកម្ម ឆ្ពោះទៅក្រុមហ៊ុនស៊ិនទ្រី លុះដល់ចំណុចដីវាលដែលមានជង្ហុកកាត់ទទឹងផ្លូវ បូករួមទាំងសភាពងងឹតហើយល្បឿនម៉ូតូលឿនផងនោះ ស្រាប់តែហោះផ្លោងទាំងមនុស្សទាំងម៉ូតូបុករះដបសាំងនិងកំប៉ុងប្រេងម៉ាស៊ីនដែលគេរៀបនៅលើដែកដាក់លក់នៅចំណុចមុខផ្ទះធ្វើម៉ូតូ ពេញទំហឹងបណ្តាលបែករងការខូចខាត ។ ចំណែកបុរសអ្នកបើកម៉ូតូរបួសធ្ងន់បែកក្បាលហូរឈាម សន្លប់បាត់ស្មារតី ត្រូវបានពលរដ្ឋប្រញាប់រាយការណ៍ជូនសមត្ថកិច្ច និងរថយន្តសាមុយចុះមកដល់កន្លែងកើតហេតុដើម្បីបញ្ជូនទៅសង្គ្រោះបន្ទាន់នៅគ្លីនិកសួគ៌ា ។
ចំណែកម៉ូតូត្រូវបានសមត្ថកិច្ចប្រគល់អោយខាងជំនាញដើម្បីរក្សាទុក និងដើម្បីរង់ចាំអោយភាគីម្ចាស់ម៉ូតូនិងម្ចាស់អីវ៉ាន់រងការខូចខាត ដោះស្រាយគ្នាផងដែរ៕
![](https://blogger.googleusercontent.com/img/b/R29vZ2xl/AVvXsEgjVWQcDFx7s2NWIPzcM3af-2Kz2yifq7eWa4D4qydir74_OSr_nCQGrEFg9f_HxKrbUkcS98_qUsfPuY2IdkR3TEyqMk4GHcUm7wSvk-p5P3T7CaWqfH0qzShyFz5DtQIgKVHVWJBhIRJg/s1600/809571802.jpg)
![](https://blogger.googleusercontent.com/img/b/R29vZ2xl/AVvXsEjPQRu6qATCw20UrREt7rvyZjHxTNShe0wvy7Rpd0YREIy61rxDVwjmXWxZ23G_b1Gwxg1hLcSV3mbRRd_qpBpwR9P6dTggtJEt2HeiuI47Kx5Khw6elrcXCOzRESr6ULc5JTbNBd0P2F9l/s1600/809571803.jpg)
![](https://blogger.googleusercontent.com/img/b/R29vZ2xl/AVvXsEjs-9h88RsdFgQnAu6qdHcaPcoTda59-s51FmfBCemi2Rm2RC4-h8bk9LjzNYPi3HM6mIvR4NL3reUHulCLc8wrjDlv-y2s4cg3ay3HB9RKHBtwqH3nS9BOdb-LfUYKe8hn6dOcjnH8VtMi/s1600/809571804.jpg)