Thursday, July 11, 2019

មន្រ្តីជំនាញ បិទទីតាំងផលិតទឹកបរិសុទ្ធ “អូគីថាណា” ២កន្លែង ក្នុងក្រុងសែនមនោរម្យ ក្រោយពិនិត្យឃើញមានភាពមិនប្រក្រតី

មណ្ឌលគិរីៈ ក្រោយ​ពិនិត្យឃើញ នៃ​ដំណើរ​ការផលិត និង​ការ​ចែកចាយ​ផលិតផល​ទឹក​សុទ្ធ okithana រួមទាំង​លក្ខណៈ​បច្ចេកទេស នៃ​អនាម័យ​ផលិតកម្ម របស់​សិប្បកម្មផលិត​ទឹកបរិសុទ្ធពីរ​កន្លែង នៅក្នុង​ក្រុង​សែន​មនោ​រម្យ ពុំមាន​លក្ខណៈ​ត្រឹមត្រូវ ​មន្ត្រី​ជំនាញធ្វើការ​ផ្អាក​នូវ​ដំណើរការបណ្ដោះអាសន្ន​របស់​អាជីវ​កម្ម​ទាំងនោះ​។

ការចុះ​បិទ​បណ្តោះអាសន្ន​របស់​មន្ត្រី​ជំនាញ​ គឺធ្វើឡើង​កាលពី​រសៀល​ថ្ងៃទី​១០ ខែកក្កដា ឆ្នាំ​២០១៩ ដោយ​មន្ទីរ​ឧស្សាហកម្ម និង​សិប្បកម្ម​ខេត្តមណ្ឌលគិរី សហការ​ជាមួយ​អាជ្ញាធរ​ក្រុង​សែន​មនោ​រម្យ ដឹកនាំ​ដោយ​លោក សុខ ប៊ុនធឿន អនុប្រធាន​មន្ទីរ​ឧស្សាហកម្ម និង​សិប្បកម្មខេត្ត។

លោក សុខ ប៊ុនធឿន អនុប្រធាន​មន្ទីរ​ឧស្សាហកម្ម និង​សិប្បកម្មខេត្ត បានឲ្យដឹងថា ការចុះ​ត្រួតពិនិត្យ​សិប្បកម្ម​ផលិត​ទឹក​ពិសា​ដប ដោយ​ឃើញថា សិប្បកម្ម​ទាំងនេះ​បាន​ដំណើរ​ការផលិត និង​ចែកចាយ​ផលិតផល​របស់ខ្លួន​នៅលើ​ទីផ្សារ​ដោយ​គ្មាន​ច្បាប់​អនុញ្ញាត ពី​មន្ទីរ​ឧស្សា​កម្ម និង​សិប្បកម្ម​ទេ​។ ឧបករណ៍​ចម្រោះ​ទឹក​ដែល​ប្រើប្រាស់​នោះ គឺអាច​ប្រើប្រាស់​បាន​ត្រឹម​លក្ខណៈ​ក្នុង​រង្វង់​គ្រួសារ​តែប៉ុណ្ណោះ ទាំង​បរិមាណ​ផលិត ទាំង​គុណភាព​ផលិត រួមទាំង​លក្ខណៈ​បច្ចេកទេស​ក្បួន​អនាម័យ​ផលិតកម្ម និង​ទីតាំង​ផលិត​។

លោកបន្តថា ខ្សែសង្វាក់​ផលិតកម្ម​ច្រក​ដប និង​វេច​ខ្ចប់​របស់​សិប្បកម្ម​ទាំងពីរ​នេះ គឺ​មិន​អនុលោម​ទៅតាម​បទដ្ឋាន​បច្ចេកទេស​ទឹក​ពិសារ​ដប​ដែល​ចែង​ក្នុង​ច្បាប់ ស្តីពី​ការគ្រប់គ្រង​រោងចក្រ​-​សិប្បកម្ម​របស់​ក្រសួង​ឧស្សាហកម្ម និង​សិប្បកម្ម ដែល​អាចធ្វើឱ្យ​ប៉ះពាល់​ដ​ល់​​គុណភាព​ទឹក​ពិសារ និង​សុខភាព​អ្នកប្រើប្រាស់​នៅលើ​ទីផ្សារ​។

ប្រតិ​ប​ត្តិការ​នោះ មន្ត្រី​ជំនាញ​ក៏​បានឱ្យ​ម្ចាស់​សិប្បកម្ម​ផលិត​ទឹក​ពិសាដប​ស្លាក​យីហោ​( អូ​គិ​ថា​ណា​)​ចំនួន​ពីរ​កន្លែង ស្ថិតនៅ​ក្រុង​សែន​មនោ​រម្យ ត្រូវ​បញ្ឈប់​សកម្ម​ផលិត និង​ធ្វើ​អាជីវកម្ម រហូត​ដល់ពេល​ទទួល​បាន​ច្បាប់​អនុញ្ញាត​ពី​មន្ទីរ​ឧស្សាហកម្ម និង​សិប្បកម្ម​។​

​លោក សុខ ប៊ុនធឿន បានធ្វើ​ការណែនាំ​ដល់​ម្ចាស់​សិប្បកម្ម​ទាំងអស់ ត្រូវ​មក​ទំនាក់ទំនង​សុំច្បាប់ បង្កើត​រោងចក្រ​សិប្បកម្ម​នៅ​មន្ទីរ​ឧស្សាហកម្ម និង​សិប្បកម្ម​ខេត្ត ដើម្បី​កែប្រែ​នូវ​ប្រព័ន្ធ​ផលិតកម្ម និង​គុណភាព​ឱ្យ​សមស្រប​តាម​ស្តង់ដារ​បច្ចេកទេស​ទឹក​ពិសា​ដប និង​និ​តី​វិធី​ផ្លូវច្បាប់​។ លោក​បន្ថែមថា ក្នុងករណី​ម្ចាស់​សិប្បកម្ម​មិន​អនុវត្តន៍​តាម​ការណែនាំ​របស់​មន្ត្រី​ជំនាញ ហើយ​ឃើញ​នៅតែ​បន្ត​ការផលិត និង​ចរាចរណ៍​ចែកចាយ​លក់​លើ​ទីផ្សារ​ទៀត មន្ទីរ​នឹង​ចាត់វិធានការ​តាម​នីតិវិធី​ច្បាប់ ដោយមាន​ស្ថាន​ប័ន​ជំនាញ​ពាក់ព័ន្ធ​ចូលរួម​អនុវត្ត​ច្បាប់ និង​ផាកពិន័យ​តាមច្បាប់​ជា​ធរមាន​។​

​គួ​បញ្ជាក់ថា​ កាលពី​ថ្ងៃទី​២៦ ខែមិថុនា​កន្ក​ង​ទៅនេះ សិប្បកម្ម​ផលិត​ទឹក​ពិសា​ដប​ស្លាក​យីហោ អូ​គិ​ថា​ណា ចំនួន​ពីរ​កន្លែង និង​ស្មូត ១​កន្លែង បាន​រង​នូវ​ការបិទ​បណ្តោះអាសន្ន​ដូចគ្នា រង់ចាំ​ការពិនិត្យ​និង​ផ្តល់​ច្បាប់​សិប្ប​កម្មបាន​ត្រឹមត្រូវ​ជាមុន មុន​និង​ធ្វើ​អាជីវកម្ម​បន្ត​ផងដែរ​៕

Feature Ads