ព្រះសីហនុៈ លោក គួច ចំរើន អភិបាលខេត្តព្រះសីហនុ ដែលទើបចូលកាន់តំណែងថ្មីថ្មោង នាថ្ងៃទី១ នៃការជួបប្រជុំសំណេះសំណាលជាមួយមន្ត្រីសាលាខេត្ត បានណែនាំឲ្យមន្រ្តីទាំងអស់ គប្បីធ្វើការទៅតាមច្បាប់ និងលិខិតបទដ្ឋានគតិយុត្តនានា ដាច់ខាតកុំធ្វើការតាមទម្លាប់។
លោក គួច ចំរើន បានសរសេរលើបណ្ដាញសង្គមហ្វេសប៊ុកថា មន្ត្រីរាជការ ត្រូវមានសាមគ្គីភាព និងទំនួលខុសត្រូវ ក្នុងការបំពេញការងារទៅតាមតួនាទី និងភារកិច្ច ដែលបាកំណត់ដោយច្បាប់។ សូមមន្ត្រីរាជការទាំងអស់ គប្បីកុំធ្វើការងារតាមទម្លាប់ ត្រូវធ្វើការទៅតាមច្បាប់ និងលិខិតបទដ្ឋានគតិយុទ្ធនានា ព្រោះថាច្បាប់ និងលិខិតបទដ្ឋាន គតិយុទ្ធនានា តែងតែវិវត្តន៍ ពីមួយថ្ងៃទៅមួយថ្ងៃ ទៅតាមការរីកចម្រើននៃសង្គមជាតិយើង។
គួរបញ្ជាក់ថា លោក គួច ចំរើន ត្រូវបានប្រកាសចូលកាន់តំណែង ជាអភិបាលខេត្តព្រះសីហនុ កាលពីថ្ងៃទី២៩ ខែមិថុនា កន្លងទៅ។
ប្រភពព័ត៌មានពីខេត្តព្រះសីហនុ បានអោយដឹងថា គ្រាន់តែចូលកាន់តំណែងបានមួយថ្ងៃ ចៅហ្វាយខេត្តព្រះសីហនុ បានបញ្ជាអោយសមត្ថកិច្ចឃាត់ទុករថយន្តសេរីទំនើបជាច្រើនគ្រឿងរបស់ជនជាតិចិន ដែលចតគ្មានសណ្ដាប់ធ្នាប់ បង្កការកកស្ទះចរាចរណ៍តាមដងផ្លូវសាធារណៈ ដែលកន្លងទៅអាជ្ញាធរនៅទីនោះ មិនរវល់អ្វីទាំងអស់ ធ្វើអោយក្រុងព្រះសីហនុធ្លាក់ក្នុងស្ថានភាពឥតសណ្ដាប់ធ្នាប់៕
