ក្រចេះ៖ ជីវិតប្តីប្រពន្ធមួយគូ រស់នៅមិនចុះសម្រុងនឹងគ្នា ចេះតែរកាំរកោសក្នុងគ្រួសារ ធ្វើឲ្យប្រពន្ធសម្រេចចិត្តសុំលែងលះ តែប្ដីអត់ព្រម កើតចិត្តខឹង ពួនស្ទាក់លួចចាំកាប់សម្លាប់ប្រពន្ធ រួចទម្លាក់សពចូលក្នុងប្រឡាយទឹកលូ។
ឃាតកម្មខាងលើនេះ កើតឡើងកាលពីវេលាម៉ោង៧៖៣០នាទីយប់ថ្ងៃទី៥ ខែសីហា ឆ្នាំ២០១៩ ស្ថិតនៅភូមិអូរឬស្សី២ សង្កាត់អូរឬស្សី ក្រុងក្រចេះ ខេត្តក្រចេះ។
ជនរងគ្រោះ ឈ្មោះ គង់ ស្រីទូច ភេទស្រី អាយុ២៧ឆ្នាំ (ត្រូវជាប្រពន្ធ) ជនសង្ស័យឈ្មោះ សំ សុភ័ក្ត្រា ហៅភ័ក្ត្រ ភេទប្រុស អាយុ៣១ឆ្នាំ (ត្រូវជាប្តី ) អ្នកទាំងពីរមានទីលំនៅកន្លែងកើតហេតុខាងលើ។
សមត្ថកិច្ចក្រុងក្រចេះ បានឲ្យដឹងថា កន្លងមកប្ដីប្រពន្ធខាងលើ តែងតែមានជម្លោះរកាំរកោសក្នុងគ្រួសាររហូតដល់ប្រពន្ធសម្រេចចិត្តដាក់ពាក្យបណ្តឹងសុំលែងលះគ្នា ប៉ុន្តែប្តីមិនយល់ព្រមឡើយ។ លុះថ្ងៃកើតហតុម៉ោងជាង៧យប់ ជនរងគ្រោះ បានជិះម៉ូតូទៅទិញបង្អែម ពេលត្រឡប់មកផ្ទះវិញ តាមផ្លូវត្រង់ចំណុចផ្លូវលំច្រកចូលផ្ទះ ត្រូវបានជនសង្ស័យជាប្ដីធ្វើសកម្មភាពកាន់កាំបិតផ្គាក់កាប់ជាច្រើនកាំបិត ត្រូវចំបំពង់ក និងកញ្ចឹងក ហើយទម្លាក់សពចូលក្នុងប្រឡាយទឹកលូ បណ្តាលឲ្យដាច់ខ្យល់ស្លាប់ភ្លាមតែម្តង។ ក្រោយពីធ្វើសកម្មភាពរួច ជនសង្ស័យបានរត់គេចខ្លួនបាត់។
បច្ចុប្បន្នសមត្ថកិច្ចកំពុងធ្វើការស្រាវជ្រាវស្វែងរកជនសង្ស័យ ដើម្បីចាត់ការទៅតាមនីតិវិធីច្បាប់ ចំណែកសពត្រូវបានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី៕
