ភ្នំពេញៈ ទីតាំងបើក Internet យីហោ Net 365 លួចបង្កប់ល្បែងភ្នាល់បាល់តាមអនឡាញជ្រកក្រោមស្លាក អ៊ីនធើណេត ២៤ម៉ោង ដែលមានទីតាំងជាច្រើន នៅតាមបណ្ដាលខណ្ឌមួយចំនួន ក្នុងរាជធានីភ្នំពេញ ជាក់ស្តែងទីតាំងអ៊ិនធើណេត បង្កប់ល្បែងស៊ីសងខុសច្បាប់ យីហោ 365 នៅក្នុងមូលដ្ឋានសង្កាត់ផ្សារដើមគរ ខណ្ឌទួលគោក រាជធានីភ្នំពេញ ត្រូវបានសមត្ថកិច្ចខណ្ឌទួលគោកចុះបង្ក្រាប។
ប្រតិបត្តិការខាងលើ បានធ្វើឡើងកាលពីវេលាម៉ោង៣រសៀលថ្ងៃទី៥ ខែសីហា ឆ្នាំ ២០១៩ ផ្ទះ លេខ២៦១ ផ្លូវលេខ២៤៥ ក្រុមទី៩ ភូមិ១ សង្កាត់ផ្សារដើមគរ ខណ្ឌទួលគោក រាជធានី ភ្នំពេញ ។
ប្រតិបត្តិការនេះ សមត្ថកិច្ចបានត្រួតពិនិត្យមើលឃើញមានកុំព្យូទ័រទាំងអស់ បើកដំណើរការ មានបើកអនឡាញបាល់ (ភ្នាល់ចាក់បាល់ស៊ីសងតាមអនឡាញ )។
តាមសម្តីបុគ្គលិកណេតខាងលើ៤នាក់ បានបញ្ជាក់ថា ទីតាំងនេះ ពិតជាមានការភ្នាល់ចាក់បាល់តាមអនឡាញពិតប្រាកដមែន ទើបកម្លាំងបង្ក្រាបជាក់ស្តែងតែម្តង។
ក្នុងកិច្ចប្រតិបត្តិការនោះ កម្លាំងបានចាប់យកវត្ថុតាងរួមមាន ៖ ១- ម៉ូនីទ័រចំនួន២០គ្រឿង, ២-CPU ចំនួន១២គ្រឿង, ៣- ម៉ៅចំនួន១៨គ្រឿង ឃីប៊តចំនួន១៣, ៤-ធុងឆ្នោតផ្សងសំណាង១, ៥- ឯកសារបុងភ្នាល់បាល់មួយចំនួន។
ចំពោះទីតាំង សមត្ថកិច្ចសម្រេចបិទអាជីវកម្មជាបណ្ដោះអាសន្ន តែមិនមានការឃាត់ខ្លួនមនុស្សទេ។ ចំណែកវត្ថុតាងពាក់ព័ន្ធល្បែងខាងលើ បានចាប់ដកហូតយកទៅសាលាខណ្ឌ ទួលគោក រក្សាទុក ដើម្បីអនុវត្តបន្តតាមនីតិវិធី៕
