ព្រះសីហនុៈ ទាក់ទងនឹងសាលារៀននៃក្តីសង្ឃឹមក្នុងខេត្តព្រះសីហនុ អស់ពេលជិត ២០ ឆ្នាំមកហើយដោយបណ្ដុះបណ្ដាលសិស្សក្រីក្រ និងចិញ្ចឹមកុមារកំព្រាប្រមាណ ៧ ម៉ឺននាក់ គិតមកទល់បច្ចុប្បន្ន ស្រាប់តែក្រសួងសង្គមកិច្ចបានបញ្ជាឲ្យសាលា លោកគ្រូ អ្នកគ្រូរៀបចំឯកសាររើចេញពីក្នុងសាលា។
នាយកសាលានៃសេចក្តីសង្ឃឹមថា ក្រសួងសង្គមកិច្ចបានប្រើល្បិចកលទុច្ចរិតបញ្ឆោតឲ្យប្រធានអង្គការរបស់លោកដែលជាជនបរទេសមិនចេះភាសាខ្មែរ ចុះហត្ថលេខាលើឯកសារសរសេរជាអក្សរខ្មែរក្នុងការផ្ដល់ដីសាលាជូនក្រសួងសង្គមកិច្ចខណៈដីជាង ១ ហិកតានោះ អង្គការបានដោះដូរជាទឹកប្រាក់ពីពលរដ្ឋ និងបន្តកាន់កាប់តាំងពីឆ្នាំ ២០០២ មកនោះ។
ឯកឧត្តម សុខសុវណ្ណ វឌ្ឍនាសាប៊ុង ប្រធានគណបក្សខ្មែរក្រោកបានចុះស្រាវជ្រាវ ហើយបានចាត់ទុកថា ករណីនេះគឺជារឿងអំពើពុករលួយ ព្រោះក្រោយពីផ្ទុះរឿងនេះក៏មានអនុប្រធានមន្ទីរសង្គមកិច្ចមួយរូបបានយកលុយចំនួន ៤ ម៉ឺនដុល្លារអាមេរិកមកឲ្យខាងសាលាដើម្បីជាថ្នូរកុំឲ្យប្ដឹងតវ៉ា និងផ្សព្វផ្សាយព័ត៌មានទាំងនេះ និងឃុបឃិតជាប្រព័ន្ធក្នុងចេតនាយកដីសាលានេះលក់ឲ្យក្រុមហ៊ុនឯកជន ហើយជុំវិញភាពមិនប្រក្រតីទាំងនេះ ឯកឧត្តមនឹងដាក់របាយការណ៍ស្រាវជ្រាវទៅលោកនាយករដ្ឋមន្ត្រី ហ៊ុន សែន នៅសប្តាហ៍ក្រោយ ដើម្បីសុំអន្តរាគមន៍ករណីចោទប្រកាន់គ្នាទៅវិញទៅមក ជុំវិញដីសាលានៃក្តីសង្ឃឹមទំហំជាង ១ ហិកតា នៅខេត្តព្រះសីហនុដែលក្រសួងសង្គមកិច្ចដាក់ឱសានវាទ ៣ ខែឲ្យសាលានេះរើចេញ។
យ៉ាងណាលោក តូច ចាន់នី អ្នកនាំពាក្យក្រសួងសង្គមកិច្ច អតីតយុវនីតិសម្បទាបានប្រាប់ឲ្យដឹងថា ការសម្រេចរបស់ក្រសួងគឺមានឯកសារត្រឹមត្រូវដែលបញ្ជាក់ថា ដីទាំងនេះគឺជាកម្មសិទ្ធិរបស់ក្រសួង ហើយការដែលតម្រូវឲ្យសាលានេះរើចេញ ពីព្រោះក្រសួងត្រូវការទីតាំងដើម្បីអភិវឌ្ឍ។ ប៉ុន្តែលោកមិនបានបញ្ជាក់ថាគម្រោងអភិវឌ្ឍន៍នេះជាអ្វីនោះទេ ដោយលោកគ្រាន់តែឆ្លើយតបថា ការផ្តល់ដីឲ្យក្រុមហ៊ុនឯកជនគ្រប់គ្រងក៏ជាគម្រោងអភិវឌ្ឍន៍របស់រដ្ឋាភិបាលដែរ។
ឯកឧត្តម វឌ្ឍនាសាប៊ុង ហៅ វិល្លាម បញ្ជាក់ថា៖ «បើយើងចង់អភិវឌ្ឍ ធ្វើវា (សាលា) ឲ្យទៅជាស្តង់ដាអន្តរជាតិទៅ ប៉ុន្តែវាមិនមែនអ៊ីចឹងទៀតតាមដឹងមានប្លង់រហូតទៅដល់ក្រុមហ៊ុនឯកជន ហើយនៅពេលមានការប្តឹងដល់ខ្ញុំ មានអ្នកយកលុយទៅសូក ហើយនេះគឺបង្ហាញពីភាពមិនប្រក្រតីហើយ»។ «ខ្ញុំនឹងប្រឹងឲ្យអស់លទ្ធភាពក្នុងកិច្ចការនេះមិនថា ប្រឈមធំប៉ុនណាទេ សំខាន់ខ្ញុំរីករាយនឹងបម្រើប្រជាជនរបស់ខ្ញុំដោយស្ម័គ្រចិត្តហើយរឿងនេះអ្នកពាក់ព័ន្ធក៏ត្រូវត្រៀមខ្លួនដែរ កុំថា គេចទៅណា អត់គេចរួចទេ»។
