ភ្នំពេញៈ សំឡេងផ្ទុះគ្រាប់បែកមួយគ្រាប់ បានផ្ទុះឡើង ធ្វើឲ្យផ្អើលប្រជាពលរដ្ឋ ភ្ញាក់ពីដំណេក ចោមរោមមើលពេញមុខខុនដូ បន្ទាប់ពីមានជនសង្ស័យ បានបោកគ្រាប់បែក១គ្រាប់ បណ្តាលឲ្យខូចខាតរថយន្ត Highlander មួយគ្រឿង និងជញ្ជាំងខុនដូ ផ្អើលដល់សមត្ថកិច្ចចុះពិនិត្យមើលទាំងរំលងអធា្រត្រ។
ករណីផ្ទុះគ្រាប់បែកនេះ បានកើតឡើងកាលពីវេលាម៉ោង២៖៣០នាទីរំលងអធ្រាត្រឈានចូលថ្ងៃទី៨ ខែសីហា ឆ្នាំ២០១៩ នៅមុខផ្ទះលេខ៦ ផ្លូវលេខ៣១២ ស្ថិតក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ ។
តាមសន្តិសុខដែលយាមនៅខុនដូក្បែរកន្លែងកើតហេតុ បានឲ្យដឹងថា មុនពេលកើតហេតុ ខណៈរូបគាត់កំពុងដេកយាមជាប់ច្រកទ្វារខុនដូ ស្រាប់តែមានឮសំឡេងផ្ទុះមួយគ្រាប់ នៅលើផ្លូវមុខខុនដូរ ពេលនោះគាត់ចេញមកមើលឃើញមានតែផ្សែង ដោយសង្ស័យមានជនមិនស្គាល់មុខបោកគ្រាប់បែក។
ករណីនោះផងដែរ ធ្វើអោយរថយន្តម៉ាកហាយឡែនឌ័រមួយគ្រឿង ដែលនៅក្បែរបែកកញ្ចក់ម្ខាង និងរបងខុនដូ រងការខូចខាតស្នាមអំបែងគ្រាប់ ខ្ទាតត្រូវ តែហេតុការណ៍នេះ មិនមានមនុស្សរងរបួសនោះទេ។
ក្រោយកើតហេតុសមត្ថកិច្ចបានចុះមកដល់ចំណុចកើតហេតុ និងធ្វើការពិនិត្យជាក់ស្តែង ដើម្បីបើកការស្រាវជ្រាវរកមុខជនបង្ក យកមកផ្តន្ទាទោសតាមច្បាប់៕
