ខេត្តព្រះសីហនុ៖ កាលពីព្រឹកថ្ងៃទី ២៣ ខែកញ្ញា ឆ្នាំ ២០១៩ កម្មករកម្មការិនីជាច្រើននាក់របស់កាសុីណូ (ជយកាសុីណូ) នៅក្នុងសង្កាត់លេខ២ ក្រុងព្រះសីហនុ បានធ្វើការតវ៉ារឿងមេការជនជាតិចិនវាយមេការជនជាតិខ្មែរ រងរបួស ។
បើតាមកម្មករដែលធ្វើការតវ៉ានោះបានលើកឡើងថា ជនជាតិម្នាក់ជាមេការបានយកចានដាក់កន្ទុយបារីវាយទៅលើមេការខ្មែរដែលកំពុងធ្វើការនៅក្នុងកាសុីណូ ដោយចោទថា មេការខ្មែរ(ជនរងគ្រោះ) រូបនេះបានប្រើល្បិចឲ្យភ្ញៀវដែលមកលេងល្បែងក្នុងកាសុីណូនេះឈ្នះលុយពីខាងកាសុីណូច្រើន ទើបជនជាតិចិន(ជនបង្ក)ដែលជាមេការរូបនេះរករឿងវាយតែម្ដង។
កម្មករបានលើកឡើងទៀតថា បន្ទាប់ពីត្រូវបានវាយរួចមក ថៅកែកាសុីណូទាំងនោះបានប្ដឹងទៅស្នងការដ្ឋាននគរបាលខេត្តព្រះសីហនុនិងបានដឹកយកជនរងគ្រោះទៅស្នងការទៀតផង ទើបពួកគាត់លើកគ្នាធ្វើការតវ៉ាស្នើសុំឲ្យខាងថៅកែក៏ដូចជាអាជ្ញាធរពាក់ព័ន្ធ មានមន្ទីរការងារ និងបណ្ដុះបណ្ដាលវិជ្ជាជីវៈខេត្តព្រះសីហនុ ក៏ដូចជាស្នងការដ្ឋាននគរបាលខេត្ត ពិសេសលោក ឧត្ដមសេនីយ៍ទោ ជួន ណារិន្ទ និង លោក គួច ចំរើន អភិបាល នៃគណៈអភិបាលខេត្តព្រះសីហនុ មេត្តាជួយរកដំណោះស្រាយជូនពួកគាត់ផង។
បើទោះជាកម្មករ កម្មការិនីជាច្រើននាក់បានធ្វើការតវ៉ាជាច្រើនម៉ោងយ៉ាងណាក្ដី ក៏គេបានសង្កេតឃើញថា មិនមានក្រុមការងាររបស់មន្ទីរការងារ ខេត្តព្រះសីហនុមកធ្វើការសម្របសម្រួលឬដោះស្រាយនោះឡើងរហូតដល់ម៉ោងជាង១១ ថ្ងៃដដែលនេះ។ គេក៏បានឃើញមានប៉ូលិសម្នាក់បានដើរចូលទៅក្នុងកាសុីណូខាងលើនេះផងដែរ ដោយមិនដឹងថា គាត់ចូលទៅដោះស្រាយឬយ៉ាងណានោះទេ។
ពាក់ព័ន្ធកម្មករធ្វើការតវ៉ានេះ ភ្លាមៗភ្នាក់ងារព័ត៌មានយើងក៏បានធ្វើការជូនដំណឹងបឋមទៅលោក យ៉ូវ ខេមរា ប្រធានមន្ទីរការងារខេត្តរួចហើយ ដោយស្នើសុំឲ្យខាងមន្ទីរចាត់ក្រុមការងារចុះមកពិនិត្យដោយផ្ទាល់ទៀតផង ប៉ុន្តែប្រហែលជាលោកមានការមមាញឹកខ្លាំងទើបមិនបានចុះមកភ្លាមៗនោះ។ ចំណែកឯខាងអ្នកតំណាងកាសុីណូព័ត៌មានយើងមិនបានឃើញបង្ហាញមុខនិងមានវត្តមានចំពោះការតវ៉ានេះទេ។(ព័ត៌មានលំអិតយ៉ាងណានោះ រហូតមកដល់ល្ងាចថ្ងៃទី ២៣ ខែកញ្ញា ឆ្នាំ ២០១៩ មិនទាន់បានទទួលនៅឡើយ)៕
