កំពង់ធំៈ ពិតជាសាហាវណាស់ កូនប្រសាហ៊ានលើកដៃសម្លាប់ម្ដាយក្មេក ដោយសារគំនុំ។ឃាតកម្មដ៏ឃោឃៅនេះ កើតឡើងកាលពីវេលាម៉ោងប្រហែល២៖៣០នាទីយប់ តែដឹងម៉ោង៥ព្រឹកថ្ងៃទី៤ ខែកញ្ញា ឆ្នាំ២០១៩ ស្ថិតក្នុងភូមិត្រពាំងជ្រៃ ឃុំបល្ល័ង្ក ស្រុកបារាយណ៍ ខេត្តកំពង់ធំ។
នគរបាលស្រុកបារាយណ៍ បានឲ្យដឹងថា ជនរងគ្រោះឈ្មោះ ដួល ឃាង ភេទស្រី អាយុ៥១ឆ្នាំ រស់នៅភូមិត្រពាំងជ្រៃ ឃុំបល្លង្ក័ ស្រុកបារាយណ៍ ខេត្តកំពង់ធំ ត្រូវបានឃាតកកាប់ឲ្យរបួសសុះសាច់។
តាមការបំភ្លឺពីអ្នកជិតខាង បានឲ្យដឹងថា នៅល្ងាចថ្ងៃទី៣ ខែកញ្ញា ឆ្នាំ២០១៩ ពេលហូបបាយរួច ជនរងគ្រោះ បាននាំចៅៗពីរនាក់ ទៅដេកនៅលើផ្ទះធម្មតា លុះព្រឹកឡើងម៉ោងប្រហែល៥ភ្លឺ ឈ្មោះ លក ខ្នាត អនុប្រធានភូមិបានឮចៅយំនៅលើផ្ទះ ហើយដើរទៅមើលឃើញ ស្ត្រីរងគ្រោះដេកស្លាប់នៅលើផ្ទះ ទើបរាយការណ៍ជូនសមត្ថកិច្ចតែម្តង។
សមត្ថកិច្ចបានសន្និដ្ឋានថា នេះជាករណីឃាតកម្ម សម្លាប់ដោយប្រើឧប្បករណ៍រឹង និងមុត កាប់ទៅលើស្ត្រីរងគ្រោះ បណ្តាលឲ្យស្លាប់នៅនឹងកន្លែង។
សមត្ថកិច្ច បានឲ្យដឹងទៀតថា ឃាតក គឺជាកូនប្រសាឈ្មោះ ម៉ុល វុទ្ទ ភេទប្រុស អាយុ២៨ឆ្នាំ រស់នៅភូមិត្រពាំងជ្រៃ ឃុំបល្ល័ង្ក ស្រុកបារាយណ៍ ខេត្តកំពង់ធំ។ ចំពោះមុខសមត្ថកិច្ចឃាតក បានសារភាពថា មូលហេតុដែលខ្លួនសម្លាប់ម្ដាយក្មេក ដោយសាររឿងគំនុំ។
បច្ចុប្បន្នឃាតក ត្រូវបានសមត្ថកិច្ចកំពុងកសាងសំណុំរឿងបញ្ជូនទៅសាលាដំបូងខេត្ត ដើម្បីចាត់ការតាមនីតិវិធីច្បាប់៕
